مەملەكەت باسشىسىنىڭ قۇتتىقتاۋىندا الەۋمەتتىك كاسىپكەرلەردىڭ ەۋرازيا قۇرىلتايى بەلسەندى, ازاماتتىق ۇستانىمى ايقىن, قوعامدا يگى قۇندىلىقتاردىڭ ورنىعۋىنا اتسالىسىپ جۇرگەن كاسىپكەرلەر, ساراپشىلار جانە كوشباسشىلار باس قوساتىن بىرەگەي ديالوگ الاڭى ەكەنى ايتىلعان.
«الەۋمەتتىك كاسىپكەرلىك الەم ەكونوميكاسىنىڭ ماڭىزدى قىرى سانالادى. وسى باعىتتاعى باستامالار ينكليۋزيۆتى ورتا قالىپتاستىرۋ جانە مۇمكىندىگى شەكتەۋلى جانداردىڭ تۇرمىس ساپاسىن جاقسارتۋ ىسىندە ەرەكشە ءرول اتقارادى. قازاقستاندا الەۋمەتتىك كاسىپكەرلىككە ايرىقشا ءمان بەرىلەدى, وعان جان-جاقتى قولداۋ كورسەتىلەدى. سونىڭ ناتيجەسىندە بيزنەستىڭ جاسامپازدىق پەن جاناشىرلىققا نەگىزدەلگەن وسى ءتۇرى ەلىمىزدە قارقىندى دامىپ كەلەدى. بۇل سالانىڭ وكىلدەرى ءتۇرلى ماسەلەنىڭ ءتۇيىنىن تارقاتاتىن يننوۆاتسيالىق تاسىلدەر ۇسىنىپ ءجۇر. بۇگىنگى باسقوسۋدا دا سالماقتى ويلار مەن ساليقالى پىكىرلەر ايتىلادى دەپ سەنەمىن. فورۋم ەۋرازيا حالىقتارى اراسىنداعى سەرىكتەستىكتى نىعايتۋعا سەرپىن بەرىپ, ءوزارا ىقپالداستىقتى ارتتىرا تۇسەرى ءسوزسىز», دەلىنگەن ەل پرەزيدەنتىنىڭ قۇتتىقتاۋ حاتىندا.
م.اشىمباەۆ ءوز سوزىندە قازىر الەمدە ۋاقىت وتكەن سايىن الەۋمەتتىك كاسىپكەرلىككە سۇرانىس ارتىپ كەلە جاتقانىن اتاپ ءوتتى. الەۋمەتتىك ماسەلەلەردى شەشۋگە باعىتتالعان بيزنەس ينۆەستورلار, مەملەكەتتىك قۇرىلىمدار جانە جالپى قوعام تاراپىنان كوبىرەك قولداۋعا يە. بۇل رەتتە ەلىمىز دە بيزنەستىڭ اتالعان ساناتىن ورنىقتى دامۋدىڭ ۇلتتىق ستراتەگياسىنىڭ ءبىر بولىگى رەتىندە ماقساتتى ءارى جۇيەلى نەگىزدە قولداپ, وركەندەتىپ كەلەدى. سەنات توراعاسى مەملەكەت باسشىسىنىڭ باستاماسىمەن وسى باعىتتا ناقتى شارالار قابىلدانعانىن جانە الەۋمەتتىك كاسىپكەرلىكتى قولداۋ جونىندە زاڭنامالىق وزگەرىستەر ەنگىزىلگەنىن اتاپ ءوتتى. ناتيجەسىندە, بىلتىردان باستاپ الەۋمەتتىك كاسىپكەرلىك سۋبەكتىلەرىنىڭ تىزىلىمىنە تىركەلگەن كومپانيالاردىڭ سانى ايتارلىقتاي ارتقان.
– الەۋمەتتىك كاسىپكەرلەر وزەكتى قوعامدىق ماسەلەلەردى شەشۋ جولىندا مەملەكەتتىڭ ماڭىزدى سەرىكتەستەرى ەكەنىن اتاپ وتكەن ءجون. پرەزيدەنتىمىز قاسىم-جومارت توقاەۆتىڭ تاپسىرماسىمەن «الەۋمەتتىك كاسىپكەرلىك تۋرالى» زاڭ ازىرلەنىپ, قابىلداندى. سونداي-اق الەۋمەتتىك كودەكسكە ءتيىستى وزگەرىستەر ەنگىزىلدى. بۇل العاش رەت الەۋمەتتىك كاسىپكەرلەر قىزمەتىنىڭ قۇقىقتىق مارتەبەسىن انىقتاۋعا جانە وعان قاجەتتى قۇقىقتىق نەگىز قالىپتاستىرۋعا جول اشتى. وسىعان بايلانىستى الەۋمەتتىك كاسىپكەرلەر مەملەكەت تاراپىنان قارجىلىق, ينفراقۇرىلىمدىق جانە كونسۋلتاتسيالىق قولداۋ الۋ مۇمكىندىگىنە يە بولدى», – دەدى پالاتا سپيكەرى.
دەگەنمەن م.اشىمباەۆ اتاپ وتكەندەي, الەۋمەتتىك كاسىپكەرلىك سالاسىندا بىرقاتار وزەكتى سىن-قاتەر بار. ولاردى ەڭسەرۋ ءۇشىن كەشەندى جۇمىس جانە بارلىق مۇددەلى تاراپتىڭ ءىس-ارەكەتىندە بىرىڭعاي ءتاسىل قاجەت. وسىعان بايلانىستى سەنات توراعاسى ارىپتەستەرىن مەملەكەت باسشىسىنىڭ تاپسىرماسىمەن قۇرىلعان ورنىقتى دامۋ سالاسىنداعى ۇلتتىق ماقساتتار مەن مىندەتتەردىڭ ىسكە اسىرىلۋىنا مونيتورينگ جۇرگىزۋ جونىندەگى پارلامەنتتىك كوميسسيا اياسىنداعى ءۇش مىندەت توڭىرەگىندە بىرلەسىپ جۇمىس ىستەۋگە شاقىردى.
– الەۋمەتتىك كاسىپورىندار كوبىنە گرانتتار مەن قايىرىمدىلىققا تاۋەلدى. سوندىقتان الەۋمەتتىك جوبالاردى قولداۋ ءۇشىن ميكروقارجىلاندىرۋ تەتىكتەرىن جانە باسقا مەحانيزمدەردى دامىتۋدىڭ ماڭىزى زور. وقىتۋ جانە تالىمگەرلىك باعدارلامالارىن ىسكە اسىرۋ الەۋمەتتىك كاسىپكەرلىكتى قولداۋ مەن دامىتۋدىڭ نەگىزگى باعىتتارىنىڭ ءبىرى بولا الادى. سونداي-اق وڭىرلەردەگى الەۋمەتتىك-كاسىپكەرلىك كورپوراتسيالارى جانىنان جۇمىس ىستەۋگە قولايلى كەڭىستىك ۇسىنىپ قانا قويماي, كونسۋلتاتسيالىق قىزمەتتەردى, وقىتۋ مەن ترەنينگتەردى جانە قارجىلاندىرۋعا قول جەتكىزۋدى قامتاماسىز ەتەتىن ارنايى ينفراقۇرىلىم قالىپتاستىرعانى ابزال. پارلامەنت دەپۋتاتتارى وسى جانە باسقا دا ماسەلەلەردى شەشۋ ءۇشىن الەۋمەتتىك كاسىپكەرلەرمەن, سونداي-اق بارلىق مۇددەلى تاراپپەن بىرلەسىپ, بەلسەندى جۇمىس ىستەۋگە مۇددەلى, – دەدى م.اشىمباەۆ.
بۇعان قوسا ول الەۋمەتتىك كاسىپكەرلەر مەن ەل ەرتەڭىنە بەيجاي قارامايتىن بەلسەندى ازاماتتاردىڭ باستامالارىنا ودان ءارى قولداۋ كورسەتۋگە دايىن ەكەنىن جەتكىزدى.
قۇرىلتاي بارىسىندا اۋىلداردا الەۋمەتتىك كاسىپكەرلىكتى دامىتۋ جونىندە ۇسىنىستار, ساپالى ءبىلىم مەن دەنساۋلىق ساقتاۋعا قولجەتىمدىلىكتى ارتتىرۋعا قاتىستى بىرلەسكەن جوبالار بويىنشا تىڭ باستامالار جانە سالانى ودان ءارى جەتىلدىرۋگە ارنالعان ۇتىمدى پىكىرلەر ايتىلدى. ءىس-شارادا الەۋمەتتىك يننوۆاتورلار قاۋىمداستىعىنىڭ پرەزيدەنتى ەمين اسكەروۆ, ۇلتتىق ەكونوميكا مينيسترلىگىنىڭ, استانا قالاسى اكىمدىگىنىڭ جانە ەۋرازيالىق توپ باسشىلىعىنىڭ وكىلدەرى, سونداي-اق رەسەيدەن, تاجىكستاننان, وزبەكستاننان جانە حالىقارالىق ۇيىمداردان كەلگەن قاتىسۋشىلار ءسوز سويلەدى.
ايتا كەتەيىك, ەۋرازيالىق قۇرىلتاي اياسىندا الەۋمەتتىك كاسىپكەرلەرگە ارنالعان ءتۇرلى فورماتتاعى ءىس-شارالار, ونىڭ ىشىندە تاقىرىپتىق ترەنينگتەر, كورمەلەر مەن جارمەڭكەلەر وتكىزۋ جوسپارلانعان.
