بۇل – قىتايداعى تسزيانسۋ پروۆينتسياسىنداعى حۋاسي اۋىلى. حۋاسي – قىتايدا العاشقىلاردىڭ ءبىرى بولىپ قور بيرجاسىنا اكتسيا شىعارعان اۋىل. سونداي-اق اۋىلدىڭ جەكەمەنشىك ۇشاقتارى مەن تىكۇشاقتارى بار. بۇل اۋىلداعى ەڭ ەرەكشە عيمارات – 74 قاباتتان تۇراتىن, بيىكتىگى 328 مەتر لۋن سي حالىقارالىق قوناقۇيى. ونى حۋاسي تۇرعىندارى ءوز قارجىسىنا سالعان. قوناقۇي قىتايداعى ەڭ بيىك عيماراتتار اراسىندا سەگىزىنشى ورىنعا يە.
ماحاببات قۇدىرەتى
ءۇندىستان فەرمەرى داشراتح مانجحي ءوز قولىمەن تاۋدى تەسىپ, 22 جىل بويى توننەل قازعان. ونىڭ بۇل قادامعا بارۋىنا سۇيىكتى جارىنىڭ قايعىلى ءولىمى سەبەپ بولعان.
داشراتح مانجحي ايەلىمەن بىرگە ءۇندىستاننىڭ گاي قالاسىنىڭ ماڭىنداعى شاعىن اۋىلدا ءومىر سۇرگەن. قاراپايىم شارۋالار سەكىلدى ولاردىڭ دا تۇرمىسى ناشار بولادى. ءبىر كۇنى ايەلى اۋىر سىرقاتقا شالدىعادى. جەدەل جاردەم شاقىرعانىمەن, ول 70 شاقىرىمدىق تاۋ جولىن اينالىپ وتەتىندىكتەن, دارىگەرلەر ۋاقىتىندا جەتە المايدى. ءسويتىپ ايەلى قايتىس بولادى. سۇيىكتى جارىنىڭ ءولىمى فەرمەردىڭ ءومىرىن تۇبەگەيلى وزگەرتەدى. ايەلىن قۇتقارا الماعانىنا قاتتى قينالعان داشراتح تاۋدان توننەل قازۋعا بەل بۋادى. ونىڭ ماقساتى – قالاعا تەز جەتكىزەتىن تۋرا جول سالۋ. ول 1960 جىلدان باستاپ 22 جىل بويى ادام ايتقىسىز ەڭبەك پەن تاباندىلىقتىڭ ارقاسىندا ۇكىمەتتىڭ قولىنان كەلمەگەن ءىستى جۇزەگە اسىردى.
ۇشاتىن اۆتوبۋس
قىتايدىڭ ۇشاتىن اۆتوبۋس جوباسى – فۋتۋريستىك كولىك جۇيەسىنىڭ جاڭا ءبىر كەزەڭى. ول قالا ىشىندە كولىك قوزعالىسىن تۇبەگەيلى وزگەرتۋگە مۇمكىندىك بەرەدى.
قىتايدىڭ «Xpeng», «EHang» كومپانيالارى ۇشاتىن اۆتوبۋس جوباسىن جاساپ جاتىر. جوبانىڭ باستى ماقساتى – قالاداعى كولىك كەپتەلىسىن ازايتۋ. ۇشاتىن اۆتوبۋس كولىكتەرىنىڭ اۋەگە كوتەرىلۋى ءۇشىن ارنايى ەلەكترلى جۇيەلەر مەن جوعارى تەحنولوگيالى قوزعالتقىشتار قولدانىلادى. بۇل ۇشاتىن اۆتوبۋستار تولىق ەلەكترمەن جۇمىس ىستەيتىن كولىك ءتۇرى بولماق. سونىمەن قاتار اۆتوبۋستاردىڭ جىلدامدىعى ءداستۇرلى كولىكتەرگە قاراعاندا, بىرنەشە ەسە جوعارى. ەگەر بۇل جوبا ءساتتى ىسكە اسسا, ول بولاشاقتاعى كولىك يندۋسترياسىنىڭ نەگىزگى دامۋ باعىتىنا اينالۋى بەك مۇمكىن.
