اۋستراليا ۇكىمەتىندەگى جاڭا لاۋازىم

باس پروكۋروردىڭ ءباسپاسوز قىزمەتى تاراتقان مالىمدەمەسىندە اۋستراليانىڭ قۇلدىققا قارسى كوميسسارى وسى جىلدىڭ 2 جەلتوقسانىندا قىزمەتىنە كىرىسەدى. ونىڭ وكىلەتتىك مەرزىمى – 5 جىل.

«كوميسسار قىزمەتى قازىرگى قۇلدىق قاناۋدىڭ بارلىق ءتۇرىن قامتيدى. ونىڭ ىشىندە ادام ساۋداسى, ءماجبۇرلى نەكە, ەرىكسىز ەڭبەككە ماجبۇرلەۋ, زاڭسىز ادام جالداۋ بار. قۇلدىققا قارسى كوميسسار اۋستراليا ۇكىمەتىنىڭ مۇنداي قۇقىق بۇزۋشىلىقتاردىڭ الدىن الۋ, قۇلدىق قۇرباندارىنا قولداۋ كورسەتۋ جونىندەگى جۇمىسىن باسقارادى ءارى ۇيلەستىرەدى», دەپ مالىمدەدى م.درەيفۋس.

ەل بيلىگى جاڭا كوميسسار مەن ونىڭ كەڭسەسىن قامتاماسىز ەتۋگە 8 ملن اۋستراليا دوللارىن (5,3 ملن دوللار) بولگەنىن ايتتى.

«Walk Free» ۇيىمىنىڭ جاھاندىق قۇلدىق يندەكسىنە سۇيەنسەك, قازىر اۋستراليادا 41 مىڭ ادام قۇلدىق قۇرساۋىندا ءجۇر. ماسەلەن, قىركۇيەك ايىندا جاڭا وڭتۇستىك ۋەلستىڭ قۇلدىققا قارسى كوميسسارى, دوكتور دجەيمس كوكەين جاريالاعان ەسەبىندە اۋستراليانىڭ ەڭ كوپ قونىستانعان شتاتىندا 16 400 ادام قۇلدىقتا ءومىر ءسۇرىپ جاتقانىن ايتادى. بۇعان جاڭا وڭتۇستىك ۋەلستىڭ پارلامەنتى جاۋاپ بەرىپ, وسى ماسەلەگە قاتىستى تەكسەرىس باستاعان.

«ۋاقىتشا ەڭبەك ميگرانتتارىنا, اسىرەسە, جاڭا وڭتۇستىك ۋەلستىڭ اۋىلدىق جەرلەرىندەگى اۋىل شارۋاشىلىعى, باۋ-باقشا جانە ەت وڭدەۋ سالالارىنداعى جالاقىسى تومەن جۇمىسشىلارعا جالاقىسى ۋاقىتىندا تولەنبەيدى. ولار قارىز قۇل­دىعى, الداپ ادام جالداۋ, ءماجبۇرلى ەڭبەككە تار­تىلىپ, سەكسۋالدىق قۇلدىق, ادام ساۋداسى قاۋپى­نە ۇشىراعان», دەپ كورسەتتى د.كوكەين.

وسىنىڭ سالدارىنان مىڭداعان جۇمىسشى جۇمىس ورىندارىن تاستاپ, قاشا باستاعان. الايدا ولار­دىڭ ۆيزاسى مەن اۋستراليادا بولۋ قۇقىعى ناق­تى جۇمىس بەرۋشىگە بايلانىستى بولعاندىقتان, ولار­دىڭ قۇقىقتارىن قورعاۋ قيىنعا سوعىپ تۇر. قۇجات­سىز جۇرگەن ميگرانتتاردىڭ سانى ارتقان, ولار تۇر­عىلىق­تى جەر تابا الماي, مەديتسينالىق ساقتان­دىرۋ­دان قاعىلىپ, زاڭدى جۇمىسقا دا ورنالاسا الماي ءجۇر.

«The Guardian» مالىمەتىنە ساسكەس, جۇزدە­گەن جۇمىسشى قازىر جاڭا وڭتۇستىك ۋەلستىڭ Riverina قالاسىنداعى لاگەرلەرگە قونىستانعان, ولارعا قولداۋ كورسەتەتىن قاۋىمداستىق توپتارى كومەكتەسۋگە تىرىسىپ جاتىر. الايدا تۇرۋعا قاجەتتى شاتىرلار جەتىسپەي, ازىق-ت ۇلىكپەن قامتاماسىز ەتۋ دە قيىندىق تۋعىزعان.

جالپى, ەڭبەك ميگرانتتارىنىڭ قۇقىعىن قورعاۋدا مەملەكەتارالىق كەلىسىمدەر ماڭىزدى ءرول اتقارادى. ال ەگەر ادام زاڭسىز جولمەن وزگە ەلگە بارىپ اقشا تاۋىپ, قۇلدىققا تاپ بولسا, ودان شىعۋ وڭايعا سوقپايدى. مىسالى, تايلاند, ميانما, لاوس ەلدەرىنىڭ اراسىنداعى «التىن ءۇشبۇرىش» دەپ اتالاتىن قاۋىپتى ايماقتاردا 100-گە جۋىق وتانداسىمىز جوعالىپ كەتكەنى باق-دا جاريالانعان ەدى. ستاتيستيكالىق مالىمەتتەرگە سۇيەنسەك, كەيىنگى ەكى جىلدا قىلمىستىق توپتاردان 28 ەل ازاماتى قۇتقارىلعان. سوندىقتان شەتەلگە جۇمىسقا بارام دەۋشىلەرگە قازاقستان بىرنەشە ەلمەن ۇكىمەتارالىق كەلىسىمدەرگە قول قويعانىن ەسكە سالامىز. وسى جىلدىڭ مامىرىندا ەڭبەك جانە حالىقتى الەۋمەتتىك قورعاۋ مينيسترلىگى كوشى-قون ساياساتىنىڭ 2023–2027 جىلدارعا ارنالعان تۇجىرىمداماسىن ىسكە اسىرۋ اياسىندا بىرقاتار ەلمەن ەكىجاقتى كەلىسسوزدەر جۇرگىزىپ, تۇركيا, ءباا, ساۋد ارابياسى, ۇلىبريتانيا, كورەيا, يزرايل, گەرمانيا, لاتۆيا جانە جاڭا زەلانديامەن ۇكىمەتارالىق كەلىسىمدەرگە قول قويدى. مۇندا ەڭ­بەك ميگرانتتارىنىڭ كەلۋى, ەلدە بولۋى مەن كەتۋ ءتار­تىبى, ەڭبەك جاعدايلارى, جالاقى, وتەماقىلار تولەۋ ءتارتىبى رەتتەلىپ, كورسەتىلگەن.