مەملەكەتتىك كەڭەسشىسى ەرلان قاريننىڭ توراعالىعىمەن مەكتەپتەردەگى تاربيە جۇمىسى جونىندە كەڭەس ءوتتى. وعان مەملەكەتتىك ورگانداردىڭ وكىلدەرى مەن ء«بىرتۇتاس تاربيە» باعدارلاماسىن ازىرلەگەن جۇمىس توبىنىڭ مۇشەلەرى قاتىستى.
اتالعان قۇجات مەملەكەت باسشىسىنىڭ ۇلتتىق قۇرىلتايدىڭ «ادال ادام – ادال ەڭبەك – ادال تابىس» اتتى ءۇشىنشى وتىرىسىندا بەرگەن تاپسىرماسىنا سايكەس دايىندالدى. بۇل باعدارلاما ءبىلىم بەرۋ ۇيىمدارىنا بيىلعى 1 قىركۇيەكتەن ەنگىزىلە باستادى.
مەملەكەتتىك كەڭەسشى تاربيە جۇمىستارىن ۇيىمداستىرۋ مەكتەپ پەن اتا-انالاردان كۇش جۇمىلدىرۋدى تالاپ ەتەتىن كۇردەلى ۇدەرىس ەكەنىن اتاپ ءوتتى. باعدارلاما وتانشىلدىق, جاۋاپكەرشىلىك, ەڭبەكقورلىق, ىنتىماقتاستىق, جاسامپازدىق پەن جاڭاشىلدىق سەكىلدى ىرگەلى قۇندىلىقتاردى كەڭىنەن دارىپتەپ, وسكەلەڭ ۇرپاقتىڭ بويىنا ءسىڭىرۋدى كوزدەيدى.
جيىن سوڭىندا ەرلان قارين بارلىق ءبىلىم بەرۋ مەكەمەسىندە تاربيە جۇمىسىنىڭ جاڭا باعدارلاماسىن ءتيىمدى جۇزەگە اسىرۋعا ءارى ونى ودان ءارى ىلگەرىلەتۋگە قاتىستى ناقتى تاپسىرمالار بەردى.
