حالىقارالىق فورۋمنىڭ العا قويعان باستى ماقساتىنىڭ ءبىرى – تۇركى ەلدەرىنىڭ مەديا كەڭىستىگىندەگى سالالىق جۋرناليستيكانىڭ ساپاسىن ارتتىرۋ. بۇنى قالاي تۇسىنەمىز؟ كوپشىلىك ساناسىندا جۋرناليستيكا كەز كەلگەن تاقىرىپتى قامتي بەرۋگە ءتيىس دەگەن جالپى جانە جاداعاي تۇسىنىك بار. الايدا دۇنيە ديدارىنا دۇربىمەن ۇڭىلە قاراساق, ونىڭ كۇن وتكەن سايىن كۇردەلەنىپ بارا جاتقانىن بايقاۋعا بولادى. بۇل ۇدەرىستىڭ نەگىزىندە بىلىكتىلىگى جوعارى ماماندى تالاپ ەتەتىن سالالار دامىپ كەلەدى. جالپىلاما تاقىرىپپەن جۇمىس ىستەيتىن ءتىلشىنىڭ داعدىسى ەندى ازدىق ەتىپ, ءار سالانىڭ قىر-سىرى مەن كۇردەلى قۇرىلىمىن تۇسىنەتىن ماماننىڭ قاجەتتىلىگى تۋىپ وتىر. ولار سول كۇردەلى دۇنيەنى اۋديتورياعا تۇسىنىكتى تىلمەن جەتكىزۋگە ءتيىس.
اقپارات ايدىنىندا ەندى-ەندى دامىپ كەلە جاتقان وسىنداي سالانىڭ ءبىرى – ەكونوميكالىق جۋرناليستيكا. ءبىز حابارلاپ وتىرعان مەديا فورۋمنىڭ باستى جاڭالىعى – قارجى تاقىرىبىندا حالىقتى اقپاراتتاندىرىپ جۇرگەن جۋرناليستەر اراسىندا وتكەن «ەركىن ءسوز-2024» شىعارماشىلىق بايقاۋى. بايقاۋ «تۇركىتىلدەس جۋرناليستەر قورى» مەن «حالىق بانك» اكتسيونەرلىك قوعامنىڭ ىجداعات-قولداۋىمەن جىل سايىن ءداستۇرلى تۇردە ءوتىپ كەلەدى.
سونىمەن مەديا-بايگە قورىتىندىسى بويىنشا «ۇزدىك تەلەسيۋجەت» اتالىمى كتك ارناسىنىڭ ءتىلشىسى ۇلان نۇراحمەتكە بۇيىردى. ال «سايتتاعى ۇزدىك ماقالا» اتالىمىنا atrpress.kz سايتىنىڭ ءتىلشىسى اماندىق ساعىنتاي ۇلى لايىق دەپ تانىلدى. ال باسىلىم بەتىندە جارىق كورگەن «ۇزدىك ماقالا» اتالىمىن ارىپتەسىمىز, «ەگەمەن قازاقستان» گازەتىنىڭ ءتىلشىسى ەلىگىماي توڭكەر جەڭىپ الدى. جۋرناليست «جەكە تۇلعا بانكروتتىعى: ماسەلەنىڭ ءمانىسى» تاقىرىبىندا زەرتتەۋ جاساپ, الاياقتىق جولمەن نەسيە راسىمدەيتىن كريمينالدى نارىقتىڭ كىلتيپانىن انىقتاپ, قارجىلىق قاۋىپسىزدىك جولدارىن ايقىنداعان.
فورۋمنىڭ قورىتىندى بولىمىندە تۇركى ەلدەرىنە ورتاق مەديا پلاتفورما جاساقتاۋ قاجەتتىلىگى تالقىلانىپ, تاراپتار ءوزارا ءتيىمدى جوبا ازىرلەۋگە ۋاعدالاستى.
