قوعام • 14 قاراشا, 2024

استانادا «WorldSkills Kazakhstan 2024» ۇلتتىق چەمپيوناتى باستالدى

200 رەت

كورسەتىلدى

1 مين

وقۋ ءۇشىن

2024 جىلدىڭ 14-16 قاراشا ارالىعىندا استانادا جۇمىسشى ماماندىقتارى بويىنشا «WorldSkills Kazakhstan 2024» ۇلتتىق چەمپيوناتى وتەدى, دەپ حابارلايدى Egemen.kz وقۋ-اعارتۋ مينيسترلىگىنىڭ ءباسپاسوز قىزمەتىنە سىلتەمە جاساپ.

قىرمىزى جۇماعاليقىزى

استانادا «WorldSkills Kazakhstan 2024» ۇلتتىق چەمپيوناتى باستالدى

فوتو: وقۋ-اعارتۋ مينيسترلىگى

ۆەدومستۆونىڭ مالىمەتىنشە, بيىلعى چەمپيوناتتا قازاقستاننىڭ بارلىق وڭىرىنەن 555 قاتىسۋشى 30 ءتۇرلى ماماندىق بويىنشا ءوز شەبەرلىكتەرىن كورسەتەدى.

ۇلتتىق چەمپيوناتتى اشۋ سالتاناتىندا وقۋ-اعارتۋ ءمينيسترىنىڭ ءبىرىنشى ۆيتسە-ءمينيسترى ناتاليا جۇمادىلداەۆا WorldSkills قوزعالىسىنىڭ الەمدە جۇمىسشى ماماندىقتارىنىڭ بەدەلىن كوتەرۋگە كومەكتەسەتىن ماڭىزدى قۇرال ەكەنىن ايتتى. بۇگىندە بۇل قوزعالىس 89 ەلدى بىرىكتىرەدى جانە قازاقستان دا وسى ەلدەر قاتارىندا.

«جىل سايىن ءبىزدىڭ ستۋدەنتتەر حالىقارالىق ارەنادا جاقسى ناتيجە كورسەتىپ كەلەدى. وسى قىركۇيەكتە ۇلتتىق قۇراما فرانتسيادا وتكەن چەمپيوناتتا 6 ايىرماشىلىق مەدالونى مەن «ۇلت ۇزدىگى» اتاعىن جەڭىپ الىپ, بۇرىن-سوڭدى بولماعان جەڭىسكە جەتتى. بۇل مەملەكەت باسشىسىنىڭ قولداۋىنىڭ ارقاسىندا مۇمكىن بولدى. كوللەدجدەرگە قابىلداۋ ورىندارى 145 مىڭعا كوبەيىپ, ستۋدەنتتەردىڭ شاكىرتاقىسى ەكى ەسەگە ءوستى», دەدى ناتاليا جۇمادىلداەۆا.

سونىمەن قاتار چەمپيوناتتا كوللەدج ستۋدەنتتەرى كىرپىش قالاۋ, اۆتو جوندەۋ, باستاۋىش سىنىپتاردى وقىتۋ, بيزنەسكە ارنالعان IT-شەشىمدەر, اسپازدىق, شاشتاراز ونەرى جانە باسقا دا ماماندىقتار بويىنشا ءوز داعدىلارىن كورسەتەدى.

ايتا كەتەيىك, «WorldSkills Kazakhstan 2024» چەمپيوناتىنىڭ جەڭىمپازدارى ۇلتتىق قۇرامانىڭ قاتارىنا قوسىلىپ, كەلەسى جىلى قىركۇيەك ايىندا دانيادا وتەتىن EuroSkills-2025 حالىقارالىق چەمپيوناتىندا قازاقستاننىڭ اتىنان قاتىسادى.