فوتو: depositphotos.com
اناسىنىڭ ايتۋىنشا, ونىڭ قىزى مەكتەپتەن قايتىپ كەلە جاتقاندا ەسىك الدىنا قۇلاپ قالعان. ايەلدىڭ ايتۋىنشا, ول العاشىندا بالانى كوشەدە بىرەۋ ۇرىپ-سوققان دەپ ويلاعان, بىراق قىزى ءوزىن جايسىز سەزىنە باستاعاننان كەيىن جەدەل جاردەم شاقىرىپ, ونىڭ انتيبيوتيكتەردەن ۋلانعانىن بىلگەن.
ء«دارى قابىلداۋ ءۇشىن مەكتەپ مەيىربيكەسى قىزىمدى شاقىرىپ العان. ۇيدە وڭايلىقپەن ءدارى ىشۋگە كەلىسە قويمايتىن قىزىما مەديتسينا قىزمەتكەرى بىردەن سەگىز ءتۇيىر ءدارىنى ماجبۇرلەپ ىشكىزگەن», دەيدى قىزدىڭ اناسى اقتاماق اپپاس.
بالا ەسىن جيعان كەزدە اتا-انا 27-ءشى گيمنازيا مەكتەبىنىڭ باسشىلىعىنان تۇسىنىكتەمە الۋعا تىرىسقان. بىراق اناسىنىڭ ايتۋىنشا, ول ديرەكتوردىڭ قابىلداۋىنا كىرە الماعان. قازىر دەنساۋلىق ساقتاۋ مينيسترلىگى بۇل وقيعانى زەرتتەپ جاتىر.
دەنساۋلىق ساقتاۋ ۆيتسە-ءمينيسترى ەرجان نۇرلىباەۆتىڭ ايتۋىنشا, اۋماقتىق كوميتەت قىزمەتتىك تەكسەرۋ جاريالادى.
تەلەارنانىڭ مالىمەتىنشە, وقۋشى قىزعا ءدارى بەرگەن مەديتسينا قىزمەتكەرى وقۋ ورنىنىڭ وزىندە ەمەس, قالالىق ەمحانالاردىڭ بىرىندە جۇمىس ىستەيدى. انتيبيوتيكپەن ەمدەۋدى فتيزياتر دارىگەر تاعايىنداعان, سەبەبى قىز ءبىر جىلداي بۇرىن تۋبەركۋلەزبەن اۋىراتىن سىنىپتاسىمەن بايلانىستا بولعان.
«وسى جىلى فتيزياتر دارىگەرگە قارالدى, بالام ساپ-ساۋ», دەپ ءتۇسىندىردى قىزدىڭ اناسى.
دارىگەرلەر انتيبيوتيكتەردى بەلگىلى مولشەردە تاعايىنداۋعا بولاتىنىن ايتادى. بىراق ول ءۇشىن اتا-انانىڭ كەلىسىمى كەرەك.
سونىمەن قاتار پەدياتردىڭ ايتۋى بويىنشا, كەز كەلگەن ءدارىنى تاماق كەزىندە نەمەسە ودان كەيىن قابىلداۋ كەرەك. ال ايساۋلە ولاردى ەكىنشى اۋىسىم بىتكەندە, ياعني اش قارىنعا قابىلداعان.
بۇگىندە قىزدىڭ اناسى پروكۋراتۋراعا ارىز جولداپ ۇلگەرگەن.
