بەينەۋدە تۇڭعىش رەت زامان تالابىنا ساي اۋداندىق كىتاپحانا مەن جاڭا كينوتەاتر اشىلادى. قازىر سوڭعى دايىندىق جۇمىستارى ءجۇرىپ جاتقان كينوتەاتر جاقىن كۇندەرى سالتاناتتى جاعدايدا تۇرعىندار يگىلىگىنە ۇسىنىلادى. اۋماعى 400 شارشى مەتر بولاتىن كينوتەاتر عيماراتى 180 ورىنعا ارنالعان. مادەنيەت وشاعىنا مانساپ ورتالىعى ارقىلى جۇمىسسىزدىق كەزەگىندە تۇرعان 10 ادام جۇمىسقا الىنادى.
تاعى ءبىر جارقىن جاڭالىق – اۋدانداعى العاشقى زاماناۋي كىتاپحانانىڭ قۇرىلىسى. بۇل جوبا مەملەكەت باسشىسى قاسىم-جومارت توقاەۆتىڭ جاستاردىڭ كىتاپقا دەگەن قىزىعۋشىلىعىن ارتتىرۋ جونىندەگى تاپسىرماسى اياسىندا جۇزەگە اسىپ جاتىر. كولەمى 825 شارشى مەتر بولاتىن ەكى قاباتتى عيمارات ءبىر مەزەتتە 62 ادامدى قابىلداي الادى. عيماراتتا وقۋشى بالالارعا, ەرەسەكتەرگە, مۇمكىندىگى شەكتەۋلى ادامدارعا ارنالعان 5 وقۋ زالى, كىتاپ ساقتاۋ قويماسى مەن ينتەرنەت جەلىسىمەن جابدىقتالعان ارنايى كابينەتتەر بار. جاڭا كىتاپحانا عيماراتى ىسكە قوسىلاتىن ۋاقىت تا الىس ەمەس, 2025 جىلدىڭ ءبىرىنشى جارتىجىلدىعىنا بەلگىلەنگەن.
بۇل يگى شارا 218 123 دانا كىتاپ قورىن قامتيتىن, 62 قىزمەتكەر جۇمىس ىستەيتىن بەينەۋدىڭ قازىرگى كىتاپحاناسىنا زور قولداۋ. بيىلعى جىلدىڭ ون ايىندا كىتاپحاناعا 89 مىڭ ادام كەلىپ, ولاردىڭ 26 765-ءى تۇراقتى وقىرمان رەتىندە تىركەلگەن.
ۇلكەن اۋىلداعى 154 كوشەنىڭ 66-سىنا اسفالت توسەلگەن. قازىرگى تاڭدا تۇرعىندارعا قولايلى جاعداي جاساۋ ماقساتىندا 127 كوشە جارىقتاندىرىلىپ, توزىعى جەتكەن 553 دانا ەلەكتر باعاناسى اۋىستىرىلىپ جاتىر. 108 ملن تەڭگەنى قۇرايتىن جوبا اياسىندا اۋىل كوشەلەرىنە 589 دانا جارىق شام ورناتىلدى. الداعى ۋاقىتتا بەينەۋ اۋدانىنا قاراستى باسقا دا ەلدى مەكەندەردەگى كوشە شامدارىن كەزەڭ-كەزەڭىمەن جاڭالاۋ جوسپارلانىپ وتىر.
بيىل اۋىلدا 18 جاڭا قوعامدىق كولىك پايدالانۋعا بەرىلدى. جولاۋشىلار اۆتوبۋستارى قوزعالىس كەزىندە تۇرعىنداردىڭ قاۋىپسىزدىگى مەن جايلىلىعىن تولىق قامتاماسىز ەتەتىن زاماناۋي قۇرال-جابدىقتارمەن جابدىقتالعان ءارى حالىقارالىق ەكولوگيالىق ستاندارتتارعا ساي جاسالعان, قورشاعان ورتاعا زيانىن تيگىزبەيدى, ەلەكتروندى جول اقىسىن تولەۋ جۇيەسى دە بار.
بەينەۋدە الەۋمەتتىك از قامتىلعان وتباسىلارعا ارنالعان جاڭا ۇيلەر سالىنىپ جاتىر. رەسپۋبليكالىق بيۋدجەتتەن بولىنگەن 284 ملن تەڭگەگە جىل سوڭىنا دەيىن 20 ءۇيدىڭ قۇرىلىسى اياقتالىپ, تۇرعىن ءۇي الۋ كەزەگىندە تۇرعان حالىقتىڭ الەۋمەتتىك جاعىنان وسال توپتارىنا جاتاتىن ازاماتتارعا بەرىلەدى. ەل اۋزىندا «بەرەكەلى بەينەۋ» اتانعان وڭىردە قولعا الىنعان يگىلىكتى جۇمىس جۇيەلى جالعاسا بەرەدى.
ماڭعىستاۋ وبلىسى
