جۇمىسىن 2019 جىلدىڭ جەلتوقسانىنان باستاعان كومپانيا نەگىزىنەن استىق جيناۋ كومبايندارىن شىعارادى. بولشەكتەردىڭ كوبىن «كز «روستسەلماش» پەن «كلەۆەر» كومپانيالارىنان الادى. «Vector 410», «Acros 550» استىق كومبايندارىنىڭ بىرنەشە ءتۇرىن ۇسىنادى. شاعىن جانە ورتا قۋاتتى «YTO-X904», «YTO-X1304» تراكتورلارىن دا قۇراستىرادى. دايىن تەحنيكالار «قازاگروفينانس» جانە «ونەركاسىپتى دامىتۋ قورى» ارقىلى استىقتى القاپتا ەل ىرىسىن مولايتىپ جاتقان داڭعايىر ديقاندارعا جەتكىزىلەدى.
– ەگىنشىلىك مادەنيەتىن جەتىلدىرىپ, تەحنولوگيانى تاپ-تۇيناقتاي اتقارۋىڭ ءۇشىن قولدا بار تەحنيكا ۇزدىكسىز ءجۇرىپ تۇرۋى كەرەك, – دەيدى زەرەندى اۋدانىنداعى «قۇلان» شارۋا قوجالىعىنىڭ اگرونومى ماعجان قۇلان ۇلى, – اكەم شارۋا قوجالىعىن قۇراردا جوقتان بار جاساپ, كۇرەسىندە قالعان كەڭەس زامانىنداعى ەسكى تەحنيكاسىنىڭ قاڭقاسىنان جيناپ, قارەكەت ەتكەن بولاتىن. ءبىر كۇن جۇرسە, ەكى كۇن توقتاپ تۇراتىن ونداي تەحنيكامەن جۇمىس ىستەۋ قازىر مۇمكىن ەمەس. سوڭعى جىلدارى اۋا رايى مۇلدەم وزگەرىپ كەتتى. ويعا العان شارۋانى ساتىمەن ساباقتاۋعا قوجالىقتىڭ ماشينا-تراكتور پاركىن زامان تالابىنا ساي جاڭعىرتۋعا ۇمتىلىپ جاتىرمىز. جاڭانىڭ اتى جاڭا, بيىلعىداي جاۋىن-شاشىن كوپ بولعان جىلى كوكتەمگى ەگىستە دە, كۇزگى وراقتا دا ءجىتى قيمىلداپ ۇلگەردىك. مۇنداي ناتيجەگە مەملەكەت تاراپىنان كورسەتىلگەن قولداۋ سەپتىگىن تيگىزىپ وتىر.
ديقاندار كوڭىلىنەن شىعىپ وتىرعان زاماناۋي استىق كومبايندارى مەن تراكتور دايىندايتىن كومپانيانىڭ ءوندىرىس الاڭىندا قاجەتتى مەتاللداردى كەسىپ, ءيىپ, وڭدەپ, بوياپ, كەپتىرەتىن, دانەكەرلەيتىن زاماناۋي ستانوكتار بار. وسى مۇمكىندىكتىڭ ارقاسىندا كاسىپورىن جىلىنا 5 ءتۇرلى كومبايننىڭ 1 000 داناسىن, جاتكانىڭ 760-ىن, ودان وزگە دە شارۋاشىلىققا قاجەتتى جۇزدەگەن قۇرىلعى شىعارا الادى. وسى جۇمىستى قولعا العاننان بەرى 2 012 استىق كومباينىن, 959 تراكتور, 1 526 جاتكا جانە وزگە دە اۋىل شارۋاشىلىعىنا قاجەتتى قۇرىلعىلاردى شىعارىپتى. اۋىل شارۋاشىلىعى قۇرىلىمدارىنىڭ سۇرانىسىنا وراي تراكتوردىڭ 9 ءتۇرىن شىعارۋدى قولعا العان. قازىر بيىك ماقسات ءبىرشاما ورىندالىپ, قۋاتى ارقيلى 7 ءتۇرلى جاڭا تراكتور ۇلگىسى قۇراستىرىلىپ جاتىر.
كاسىپورىن شارۋا قوجالىقتارىنا ءوز ونىمدەرىن تىكەلەي دە ساتادى. شاعىن شارۋاشىلىقتاردىڭ مۇمكىندىگىن ەسكەرىپ, تەحنيكانىڭ قولجەتىمدى بولۋىن دا قاداعالايدى. بۇل اراداعى باستى سەبەپ – باسەكەلەستىك. سۇرانىستى وتەۋ ءۇشىن ءوندىرىس كولەمىن ارتتىرا ءتۇسۋ كەرەك. 2024 جىلى №3 تسەحتىڭ قۇرىلىسىن قولعا الۋدى جوسپارلاپ وتىر. سونداي-اق مەتالل وڭدەۋگە زاماناۋي ستانوكتار دا قاجەت. ال دايىن تەحنيكانى وبلىس ورتالىعىنىڭ شىعا بەرىسى مەن كوكشەتاۋ-ششۋچە باعىتىنداعى كۇرە جولدىڭ بويىنا ورنالاسقان ديللەرلىك ورتالىقتاردا شارۋالاردىڭ نازارىنا ۇسىنادى.
ورتالىقتا جاڭا تەحنيكانىڭ بار مۇمكىندىگى تەگىس كورسەتىلمەك ءارى تەحنيكانى كۇتىپ-باپتاۋ جايىن دا بىلىكتى ماماندار ۇعىندىرماق.
– كوكتەمگى جانە كۇزگى دالا جۇمىستارىنىڭ ۋاقتىلى, تىڭعىلىقتى اتقارىلۋى قۋاتتى تەحنيكاعا بايلانىستى, – دەيدى وبلىستىق اۋىل شارۋاشىلىعى جانە جەر قاتىناستارى باسقارماسىنىڭ باسشىسى كەنەش ءالىمجانوۆ, – بيىل كۇزگى وراق ناۋقانىندا ءوڭىر ديقاندارى 8,9 مىڭ استىق كومباينىن پايدالاندى. 4,8 مىڭى – زاماناۋي جوعارى ءونىمدى تەحنيكا. ءبىر جاقسىسى, بيىل اۋىل شارۋاشىلىعى قۇرىلىمدارى جالپى قۇنى 28,5 ملرد تەڭگە بولاتىن 246 تراكتور, 115 كومباين ساتىپ الدى. جەڭىلدەتىلگەن نەسيە ارقىلى 80 تراكتور, 140 كومباين, 25 ءارتۇرلى قۇرىلعى الىندى.
2020-2021 جىلدارى جامان تۇماۋ ورشىگەن تۇستا كومپانيا وڭىردەگى اۋىل شارۋاشىلىعى سالاسىنىڭ ۇزدىكسىز جۇمىس ىستەۋىنە ايتارلىقتاي قولعابىسىن تيگىزدى. الەۋمەتتىك جاۋاپكەرشىلىكتى جاقسى سەزىنگەن ۇجىم تەحنيكامەن قاتار, ماتەريالدىق كومەك تە كورسەتتى.
كومپانيا ەڭبەكتى قورعاۋ ماسەلەسىن نازاردان تىس قالدىرمايدى. كاسىپورىن جۇمىسشىلارى الەۋمەتتىك جاعىنان تولىق قامتاماسىز ەتىلگەن. العاشقى كەزەڭدە 77 ادام, قازىر 175 ادام تۇراقتى جۇمىسقا ورنالاسقان. ءاربىر جۇمىسشىمەن جەكە كەلىسىمشارت جاسالادى. وندا تەگىن مەديتسينالىق قىزمەت كورسەتۋ, دەنساۋلىعىن قاداعالاۋ, ءدارى-دارمەكپەن قامتاماسىز ەتۋ كورسەتىلگەن. جۇمىسشىلار تەگىن تاماقتانادى, جۇمىس ورنىنا كومپانيا كولىگىمەن تاسىمالدانادى.
تاعى ءبىر جاقسىلىعى – جەرگىلىكتى كاسىبي ءبىلىم بەرەتىن وقۋ ورىندارىمەن بايلانىسىن نىعايتقان. جاس مامانداردى تاجىريبەدەن وتكىزىپ, تۇراقتى جۇمىسقا ورنالاسۋ ماسەلەسىن دە شەشەدى.
بەينەتى بەس باتپان دالا جۇمىستارىنىڭ بەل ورتاسىندا جۇرگەن ديقان قاۋىمىنىڭ ەڭ باستى تىلەگى – بەس قارۋىنىڭ ساي بولۋى. ونىڭ ءبىرى ءارى بىرەگەيى – ساپالى تەحنيكا. قالعانى ورتاق ىسكە دەگەن ىنتا-ىقىلاس. ىرىزدىق جولىنداعى قالىڭ قاۋىمدى زاماناۋي تەحنيكامەن قارۋلاندىرىپ وتىرعان كاسىپورىننىڭ وڭ ءىسى اتاپ ايتۋعا تۇرارلىق.
كوكشەتاۋ
