سۋرەت: Sputnik.kz / ابزال كاليەۆ
سيريا ۇكىمەتىنىڭ كەلىسسوز توبىنا سىرتقى ىستەر جانە ەكسپاتريانتتار ىستەرى جونىندەگى ءمينيستردىڭ ورىنباسارى ايمان رااد جەتەكشىلىك ەتسە, سيريا وپپوزيتسياسى اتىنان احماد توما باسشىلىق جاسادى.
سونىمەن قاتار كەزدەسۋگە كەپىلگەر ەلدەردىڭ دەلەگاتسيالارى قاتىستى. رەسەي دەلەگاتسياسىن سيرياداعى جاعدايدى رەتتەۋ بويىنشا رف پرەزيدەنتىنىڭ ارنايى وكىلى الەكساندر لاۆرەنتەۆ, تۇركيا دەلەگاتسياسىن تر ءسىم-ءنىڭ ەكىجاقتى ساياسي قاتىناستار جونىندەگى باس ديرەكتورى مۋستافا يۋرداكۋل, ال يران دەلەگاتسياسىن ير ءسىم-ءنىڭ ارنايى ساياسي ماسەلەلەر جونىندەگى كومەكشىسى الي اسگار حادجي باسقاردى.
كەلىسسوزدەرگە باقىلاۋشى رەتىندە يوردانيا, ليۆان جانە يراك وكىلدەرى, سونداي-اق حالىقارالىق ۇيىمدار – بىرىككەن ۇلتتار ۇيىمى, بۇۇ-نىڭ بوسقىندار ىستەرى جونىندەگى جوعارعى كوميسسارىنىڭ باسقارماسى جانە قىزىل كرەست وكىلدەرى قاتىستى.
سيرياداعى جاعدايدى رەتتەۋگە ارنالعان استانا پروتسەسى اياسىنداعى حالىقارالىق كەلىسسوزدەردىڭ 22-راۋندى ناتيجەلى اياقتالعانىن اتالعان كەلىسسوزدەردىڭ جالپى وتىرىسىندا قازاقستان سىرتقى ىستەر ءمينيسترىنىڭ ورىنباسارى الىبەك باقاەۆ مالىمدەدى.
«ەكى كۇن ىشىندە كەلىسسوزگە قاتىسۋشى تاراپتار استانا پروتسەسىنىڭ كەزەكتى وتىرىسى اياسىندا سيرياداعى جاعدايدى ءارى قاراي تۇراقتاندىرۋعا جانە ونداعى گۋمانيتارلىق جاعدايدى جاقسارتۋعا باعىتتالعان اسا ماڭىزدى ءارى مازمۇندى كەلىسسوزدەر وتكىزدى. وزدەرىڭىزگە ءمالىم, قازاقستان ءوزىنىڭ مۇمكىندىكتەرىنە وراي دوستاس سيريا حالقىن جانە سيرياىشىلىك رەتتەۋ پروتسەسىن قولداۋعا كۇش-جىگەرىن سالىپ كەلەدى. سيريا جونىندەگى استانا فورماتى اياسىندا وتكەن كەلىسسوزدەردىڭ دەەسكالاتسيا ايماقتارىن قۇرۋ, جانجالداسۋشى تاراپتار اراسىنداعى شيەلەنىستى توقتاتۋ جانە ادام شىعىنىن ازايتۋ ءتارىزدى باستاپقى ماقساتتارى بۇگىندە تولىقتاي ورىندالىپ, سيريالىقتاردىڭ قالىپتى تۇرمىس-تىرشىلىگىن قايتا قالپىنا كەلتىرۋگە زور مۇمكىندىك اشىپ وتىر. وسى ورايدا مۇددەلى تاراپتار استانا پروتسەسىنىڭ ناتيجەسىندە قالىپتاسقان قولايلى جاعدايدى بارىنشا ءتيىمدى پايدالانا وتىرىپ, قاقتىعىستىڭ ساياسي شەشىمىن تابۋعا بارىنشا ىقپال ەتەدى دەپ كامىل سەنىم بىلدىرەمىز», دەدى ءا.باقاەۆ.
2017 جىلدىڭ قاڭتار ايىنان باستاپ سيريا بويىنشا استانا فورماتىندا يران, رەسەي جانە تۇركيانىڭ دەلدالدىعىمەن, بۇۇ-نىڭ قولداۋىمەن كەلىسسوزدەر ءوتىپ كەلەدى. بۇل پلاتفورما بىزگە دەەسكالاتسيا ايماقتارىن دامىتۋعا جانە زورلىق-زومبىلىقتى ازايتۋعا ىقپال ەتەتىن ماڭىزدى كەلىسىمدەرگە قول جەتكىزۋگە مۇمكىندىك بەردى. قازاقستان قاقتىعىسۋشى تاراپتاردى تاتۋلاستىرۋ ءۇشىن حالىقارالىق ىنتىماقتاستىقتىڭ وتە ماڭىزدى ەكەنىن ءتۇسىنىپ, استانا پروتسەسىنە بەيىلدى بولىپ قالا بەرەدى. سيريا تاريحىنداعى وسى قايعىلى جايتتى شەشۋدىڭ جالعىز جولى – بۇۇ جارعىسى مەن قارارلارىنا سايكەس ۇيلەستىرىلگەن ساياسي جانە ديپلوماتيالىق ءتاسىل.
