قازاق كسر مەملەكەتتىك حور كاپەللاسىنىڭ رەپەرتۋارىندا اناتولي مولودوۆتىڭ جەتەكشىلىگىمەن قازاقستان كومپوزيتورلارىنىڭ كوپتەگەن كانتاتالارى مەن وراتوريالارى پايدا بولدى. اتاپ ايتساق, مۇقان تولەباەۆ, عازيزا جۇبانوۆا, ەركەعالي راحماديەۆ, سىدىق مۇحامەدجانوۆ, بازارباي جۇمانيازوۆ, مانسۇر ساعاتوۆ, ت.ب. بار. كلاسسيكالىق مۋزىكا ۆ.ا.موتسارت, دج. ۆەردي, گ.فورە رەكۆيەمدەرى, ل.بەتحوۆەننىڭ «9-سيمفونياسى», ن.يومەلليدىڭ «ميزەرەرە», س.ۆ.ءراحمانينوۆتىڭ «ۆەسنا», «ليتۋرگيا», «ۆسەنوششنوە بدەنيە» سياقتى شىعارمالارمەن تولىقتى. مولودوۆ قازاق جانە ورىس حالىق اندەرىن, ارالاس حور مەن بالالار حور ۇجىمدارىنا ارنالعان ۇلتتىق كومپويتورلاردىڭ شىعارمالارىن وڭدەدى.
اناتولي مولودوۆتىڭ كوپتەگەن شاكىرتتەرى مەن ءىزباسارلارى ۇستازدارىن ەسكە الىپ, ءوز شىعارمالارىن ارنادى. حورمەيستەردى ەسكە الۋ كونتسەرت-فەستيۆالى الماتى فيلارمونياسىنىڭ ساحناسىندا باقىتجان بايقاداموۆ اتىنداعى مەملەكەتتىك حور كاپەللاسى, ە.راحماديەۆ اتىنداعى استانا قالاسىنىڭ مەملەكەتتىك اكادەميالىق فيلارمونياسىنىڭ كامەرالىق حورى, قۇرمانعازى اتىنداعى قازاق ۇلتتىق كونسەرۆاتورياسىنىڭ ارالاس حورى جانە الماتى قالاسىنداعى №79 مەكتەپ-گيمنازياسىنىڭ «بايتەرەك» بالالار حورى سياقتى ۇجىمداردىڭ باسىن قوستى.
كەش بارىسىندا حور ۇجىمدارىنىڭ كوركەمدىك جەتەكشىلەرى جانە باس ديريجەرلەرى – قازاقستاننىڭ ەڭبەك سىڭىرگەن قايراتكەرلەرى گۇلميرا قۇتتىباداموۆا مەن بەيىمبەت دەمەۋوۆ, ەلەنا بايىسباەۆا جانە يان رۋدكوۆسكي ونىڭ حور ونەرىن دامىتۋ جولىنداعى ەڭبەگى تۋرالى ەستەلىكتەرىمەن ءبولىستى.
«اناتولي ۆاسيلەۆيچ – قازاق حور ونەرىن جاڭا ساپالى دەڭگەيگە كوتەرگەن العاشقى حور ديريجەرى. ونىڭ شاكىرت تاربيەلەۋدەگى ادىستەرى ارقايسىمىزدىڭ ەسىمىزدە. سولفەدجيونىڭ ۆوكالدىق جانە حور مادەنيەتى بويىنشا ساباقتارى كۇندەلىكتى كاپەللادا وتكىزىلدى. وسىنىڭ ارقاسىندا كاپەللا ۇلكەن ۇجىم رەتىندە قالىپتاستى. ول قازاقستان كومپوزيتورلارىنىڭ شىعارماشىلىق زەرتحاناسى, رەسپۋبليكادا عانا ەمەس, بۇكىل كەڭەس وداعىندا تانىلعان كانتاتالار, وراتوريالار, حور سيۋيتالارى مەن مينياتيۋرالاردىڭ العاشقى ورىنداۋشىسى بولدى», دەدى گ.قۇتتىباداموۆا.
استانادان ارنايى كەلگەن ە.راحماديەۆ اتىنداعى مەملەكەتتىك اكادەميالىق فيلارمونيانىڭ كامەرالىق حورى ا.مولودوۆتىڭ حورعا وڭدەگەن «ارىس جاعاسىندا» ء(انى ش.قالداياقوۆ, ءسوزى م.شاحانوۆ), «پروششانيە» ء(انى ع.جۇبانوۆا, ءسوزى م.تسۆەتاەۆا) «قارلىعاش» ء(انى ا.جۇبانوۆ, ءسوزى ي.ماتاقوۆ), «بىۆايتسە زدوروۆى» ء(انى م.ليۋبانا, ءسوزى ا.رۋساك) شىعارمالارىن شەبەر ورىندادى.
