- قازىرگى ۋاقىتتا ءبىز جاھاندىق قارجى نارىقتارى تىم قاتتى قۇبىلىپ تۇرعانىن بايقاپ وتىرمىز. بۇعان, البەتتە, اقش-تاعى پرەزيدەنت سايلاۋىنىڭ ناتيجەسى ايتارلىقتاي ىقپال ەتتى. ترامپتىڭ جەڭىسى اقش دوللارىن كۇشەيتىپ, دامۋشى ەلدەردىڭ ۆاليۋتالارى, سونىڭ ىشىندە تەڭگە دە السىرەدى, – دەيدى ۇلتتىق بانكتىڭ ءباسپاسوز قىزمەتى.
نەگىزگى الەمدىك ۆاليۋتالارعا شاققانداعى دوللار باعامىن كورسەتەتىن DXY يندەكسى قىركۇيەك ايىنىڭ سوڭىندا 100,8 تارماقتا تومەن مانگە جەتكەننەن كەيىن 5%-عا دەيىن نىعايىپ, 105,5 تارماققا دەيىن ءوستى. ەم ۆاليۋتالارىنىڭ يندەكسى قىركۇيەك ايىنىڭ سوڭىنان 4,2%-عا تومەندەدى (11 قاراشاداعى جاعداي بويىنشا).
- ونىڭ ۇستىنە, مۇناي كوتيروۆكالارى دا قالىپتى تۇردە تومەندەپ, 1 باررەلى 74-75 اقش دوللارىنان 71,83 اقش دوللارىنا دەيىن ءتۇستى (2024 جىلعى 11 قاراشاداعى جاعداي بويىنشا). سەبەبى الەۋەتتى ساۋدا باجدارى مەن د.ترامپتىڭ پرەزيدەنتتىك كەزەڭىندە اقش-تان كوپتەپ مۇناي جەتكىزۋدىڭ ءوزى شامادان تىس ارتىق ۇسىنىسقا اكەلەدى دەگەن ەكونوميستەردىڭ بولجامى اسەر ەتتى. ونىڭ ۇستىنە, قۋاتتى دوللار – قاشاندا شيكىزات تاۋارلارى ءۇشىن نەگاتيۆتى فاكتور سانالادى, - دەلىنگەن حابارلامادا.
ۇلتتىق بانكتىڭ حابارلاۋىنشا, سىرتقى نارىقتارداعى قۇبىلمالى جاعداي ۆاليۋتا نارىعىنا قاتىسۋشىلاردىڭ قيمىل-ارەكەتىنە دە اسەر ەتەدى.
- ءبىز شەتەل ۆاليۋتاسىنا ۇسىنىس ايتارلىقتاي تومەندەپ, وعان دەگەن سۇرانىستىڭ ءبىر مەزگىلدە وسكەنىن بايقاپ وتىرمىز. بۇل ءوز كەزەگىندە تەڭگە باعامىنىڭ السىرەۋىنە ىقپال ەتەدى. 2024 جىلعى قاراشانىڭ باسىنان بەرى ۇلتتىق ۆاليۋتانىڭ بيرجالىق ساۋدا-ساتتىقتاعى باعامى 1,4%-عا السىرەپ, 1 اقش دوللارى ءۇشىن 495 تەڭگەگە جەتتى. وكىنىشكە قاراي, سپەكۋلياتيۆتىك سيپاتتاعى مامىلەلەردىڭ كوبەيگەنى دە بايقالىپ وتىر. بۇل دا ايىرباس باعامىن تىم قۇبىلتىپ جىبەرەدى. وتىمدىلىك جەتكىلىكسىز جاعدايدا بۇل – باعامنىڭ ايتارلىقتاي اۋىتقۋىنا اكەلۋى مۇمكىن. ءبىز بۇعان دەيىن مالىمدەگەنىمىزدەي, ۇلتتىق بانك ۇلتتىق ۆاليۋتا باعامىنا ءتان وزگەرىستەرگە ءمان بەرە قويمايدى. ويتكەنى مۇنىڭ بارلىعى فۋندامەنتالدى فاكتورلارمەن دايەكتەلگەن. الايدا, سوڭعى كۇندەردەگى تەڭگەنىڭ قۇبىلۋىنا – تەك قانا فۋندامەنتالدى فاكتورلار ىقپال ەتپەي وتىرعانىن ايتۋعا ءماجبۇرمىز. وسىعان بايلانىستى ۇلتتىق بانك ۇلتتىق ۆاليۋتانىڭ قۇبىلۋ شاماسىن – شامادان تىس دەپ باعالايدى, - دەپ حابارلادى ۇلتتىق بانك.
ۇلتتىق بانك ىشكى ۆاليۋتا نارىعىنداعى جاعدايدى قاداعالاپ وتىرعانىن اتاپ ءوتتى.
