فوتو: الماتى قالاسى تجد
جاس قاھارمان ءاليحان جاقسىلىق توتەنشە جاعدايلار ءمينيسترىنىڭ بۇيرىعىمەن «سۋعا باتقانداردى قۇتقارعانى ءۇشىن» مەدالىمەن ماراپاتتالدى. وعان سىيلىعىن الماتى قالاسى توتەنشە جاعدايلار دەپارتامەنتىنىڭ باستىعى نۇرلان اتىعاەۆتىڭ ءوزى تابىس ەتتى.
«شۇعىل ارەكەت ەتكەنىڭىز ءۇشىن ريزاشىلىعىمىزدى بىلدىرەمىز — ءسىزدىڭ شەشىمتالدىعىڭىز ارقاسىندا قايعىلى جاعدايدىڭ الدى الىنىپ, بالانىڭ ءومىرى ساقتالدى», دەدى تجد باسشىسى.
ايتا كەتەيىك, ءاليحان جاقسىلىق 2020 جىلى قىزىلوردا وبلىسىنداعى «بولاشاق» ۋنيۆەرسيتەتىن دەنە شىنىقتىرۋ جانە سپورت ماماندىعى بويىنشا تامامداعان. ونى قولداۋعا اتا-اناسى ساكەن ورازباەۆ پەن باقىتگۇل سۇگىروۆا, اجەسى باعجان قالبايقىزى باردى.
ەسكە سالايىق, 27 قازان كۇنى قىزىلوردا قالاسىنىڭ تۋماسى ءاليحان جاقسىلىق جۇمىس جانە ۋاقىتشا باسپانا ىزدەپ الماتىعا كەلگەن. ساعات 14:00 شاماسىندا ماقاتاەۆ كوشەسى ماڭىنداعى ەسەنتاي وزەنىنىڭ جاعالاۋىندا كەلە جاتىپ, كەنەتتەن بالالاردىڭ ايعايلاعان داۋىسىن ەستىگەن. بىرنەشە سەكۋندتان كەيىن وعان ءبىر بالا جۇگىرىپ كەلىپ, ءمان-جايدى ءتۇسىندىرىپ, وزەنگە قۇلاپ كەتكەن دوسىنا كومەكتەسۋىن ءوتىندى. ءاليحان دەرەۋ وزەنگە ءتۇسىپ, سۋعا باتىپ بارا جاتقان بالانى قۇتقارىپ قالعان ەدى.
