وسى اياداي مايبۇلاق اۋىلىندا تۇپ تۋرا 97 جىل بۇرىن قاراپايىم شارۋا ازىمباەۆ گاۋھاردىڭ جانۇياسىندا ومىرگە حاميت اتتى تورسىقتاي ۇل كەلدى. ءسابيدى تيلليا اپامىز باۋىرىنا باستى. حاميت 14 جاسىندا اكەدەن ايىرىلىپ, بار وتباسىلىق تاۋقىمەتتى ءوزى كوتەردى. 1937 جىلى, مايبۇلاق باستاۋىش مەكتەبىنىڭ 7 سىنىبىن ءبىتىردى. 1943 جىلى قاراتاس اۋدانى, جۇما اۋىلدىق سوۆەتىنە قاراستى, مايبۇلاق اۋىلىنا كەلىپ جۇمىس ىستەدى. 1944 جىلى شىمكەنت قالاسىندا 2 جىلدىق مۇعالىمدەر دايارلايتىن ۋچەليششەگە ءتۇسىپ, 1946 جىلى مۇعالىم ماماندىعىن الدى. 1946-1949 جىلدارى جاڭاتالاپ مەكتەبىندە مۇعالىم بولىپ ەڭبەك ەتتى. 1949-1951 جىلدارى, ماسكەۋدەگى ماركسيزم – لەنينيزم ينستيتۋتىنىڭ سىرتتاي ءبولىمىن ءبىتىردى. 1949 جىلى كپسس مۇشەسىنە قابىلداندى.1948-1949 جىلدارى اۋداندىق كومسومول كوميتەتىنىڭ سەكرەتارى بولدى. 1950 جىلى «كوممۋنيزم جولى» اۋداندىق گازەتىندە جاۋاپتى حاتشى, 1951-1952 جىلدارى اۋداندىق پارتيا كوميتەتىنىڭ ينسترۋكتورى,1952-1959 جىلدارى اۋداندىق «كوممۋنيزم جولى» گازەتىنىڭ رەداكتورى قىزمەتتەرىن اتقاردى. 1959-1961 جىلدار ارالىعىندا اۋداندىق پارتيا كوميتەتىنىڭ ۇيىمداستىرۋ ءبولىمىن باسقارعان, ىسكەر ازامات. «كۇيىك» سوۆحوزىن «وڭتۇستىك قازاق» ميرونوس قويىن وسىرەتىن اسىل تۇقىمدى قوي سوۆحوزىنا اينالدىرۋداعى ەڭبەگى زور. وسى باعىتتا پروفەسسور, اۋىل شارۋاشىلىعى عىلىمىنىڭ دوكتورى ا.پەشكوۆ جانە پروفەسسور ا.تسوي سياقتى عالىمدارمەن قويان قولتىق ەڭبەك ەتتى.
«ەلىم دەيتىن ەر بولماسا, جەرىم دەيتىن ەرى قايدان بولسىن» دەپ الاشتىڭ زيالىسى م.جۇماباەۆ ايتقانداي ەل دەگەندە ەڭسەسىن كوتەرىپ, جان تانىمەن ەڭبەك ەتە بىلگەن حاميت اعاعا جەرلەستەرى «كوكىبەلدىڭ بەل بالاسى» دەگەن اتاۋ بەرگەن.
اينالاسىنا مەيىرىمى مەن شۋاعىن شاشىپ, ۇلكەن جىلى جۇرەگىنىڭ جىلۋىمەن جىلىتا بىلەتىن حاميت اعا بۇگىندە ومىردە جوق. ونىڭ تەك ۇرپاقتارى قالعان. سول ۇرپاقتارىنىڭ قالاۋى اكەلەرىنىڭ اتىنا اۋداننان ءبىر كوشەنىڭ اتى بەرىلسە دەيدى.
سول كەزدەگى قاراتاس اۋداندىق پارتيا كوميتەتىنىڭ ءبىرىنشى حاتشىسى ب.احمەتوۆتىڭ ەستەلىگىندە كەيىپكەرىمىز تۋرالى بىلاي دەپ جازىلعان:
«جولداس حاميت گاۋھاروۆ تەرەڭ ءبىلىمدى, ءارى ءىستىڭ كوزىن تابا بىلەتىن, وزىنە دە باسقا ادامدارعا دا تالاپ قويا بىلەتىن ازامات. پارتيالاس جولداستارىنىڭ الدىندا ءبىلىمدى, ارىپتەستەرىنە وتە سىيلى بولاتىن. جولداس گاۋھاروۆ حاميت ۇنەمى ساياسي ءبىلىمىن جەتىلدىرىپ, پارتيانىڭ جينالىستارىندا, كونفەرەنتسياسىندا قاي تاقىرىپقا بولماسىن, وتە ساۋاتتى بايانداما جاسايتىن. ساياسي جانە شارۋاشىلىقتى جاقسى باسقاراتىن».
ۇلى گاۋھاروۆ تولەگەن حاميت ۇلىنىڭ ەستەلىگىنەن:
«اكەمىز حاميت گاۋھاروۆتىڭ ەسىمى كەيىنگى ۇرپاقتىڭ ارداقتاۋىنا, قۇرمەتپەن ەسكە الۋىنا ابدەن لايىقتى دەپ ويلايمىن. 2016 جىلى مايبۇلاق جالپى ورتا مەكتەبىنىڭ العاشقى اسكەري دايىندىق ءپانى كابينەتىنە اكەمىزدىڭ ەسىمى بەرىلدى. اتام گاۋھار مەن اكەمنىڭ ءىنىسى شاادات ەكەۋى بىرىنەن سوڭ ءبىرى سوعىسقا اتتانىپ, ەكەۋى دە حابار وشارسىز كەتتى. شاادات اتامىز ۇشقىش بولىپتى, ونىڭ ءىزىن جالعاستىرۋشى مەنىڭ ۇلىم ايدار حاميتوۆ اقتوبە قالاسىنداعى اۋە, قورعانىس - كۇشتەر اسكەري ينستيتۋتىن ۇزدىك ءبىتىردى. قازىرگى تاڭدا شىمكەنت قالاسىندا اسكەري بولىمىندە ۇشقىش ينجەنەر بولىپ قىزمەت ەتۋدە. اۋدان ورتالىعىنان ءبىر كوشەگە حاميت گاۋھاروۆتىڭ ەسىمى بەرىلسە ءجون بولار ەدى».
مايبۇلاق اۋىلىنىڭ تۇرعىنى نارىمبەتوۆتىڭ ءپان كابينەتىنىڭ لەنتاسىن قيۋ كەزىندەگى حاميت گاۋھاروۆ تۋرالى ەستەلىگىنەن:
« حاميت گاۋھاروۆ 1939 جىلى وسى اۋىلعا كەلىپ 1942 جىلى اۋدان ورتالىعىنداعى ۆ.ي.لەنين اتىنداعى ورتا مەكتەپتىڭ 10 سىنىبىن مەرزىمىنەن بۇرىن تامامداعان ەدى. «ەنگەلس» اتىنداعى مەكتەپتە تاريح, گەوگرافيا پانىنەن ساباق بەرگەن. كەيىن اۋداندىق كومسومول, پارتيا كومميتەتىندە ءتۇرلى سالادا ەڭبەك ەتىپ, اۋداندىق گازەتتە رەداكتور بولدى. لەنگىر اۋدانىنان, ءبىزدىڭ (لەنين) قازىرگى قازىعۇرت اۋدانىن ءبولىپ الۋعا ات سالىستى, وتە ىسكەر, ۇيىمداستىرۋشىلىق قابىلەتى مول ەدى. وسى حاميت گاۋھاروۆتىڭ ارقاسىندا لەنين اۋدانى ۇيىمداستىرىلىپ, قىزىلتاڭ, ەنگەلس, لەنين كولحوزدارىن, سارىاعاش اۋدانىنان ءبولىپ الدى. بۇگىن مەكتەپتە سىنىپ كابينەتىنە ەسىمى بەرىلدى, ەندى اۋدان ورتالىعىنان ءبىر كوشەگە ەسىمى بەرىلسە ەكەن».
زەينەتكەر قاجى, قازىعۇرت اۋدانىنىڭ قۇرمەتتى ازاماتى, جەرلەسى تاستانبەك بەردىقۇلوۆتىڭ پىكىرى.
«حاميت گاۋھاروۆ وتە سىمباتتى,تازا كيىنىپ, ءتۇزۋ جۇرەتىن ەدى. ول كەزدە مەن وقۋشى ەدىم. وسى حاميت اعايعا قاراپ بوي تۇزەدىك. سول سياقتى ۇستاز بولساق دەيتىنبىز. كەيىن ارمان قۋالاپ تاشكەنت قالاسىنداعى نيزامي اتىنداعى پەداگوگيكالىق ينستيتۋتىنىڭ فيزيكا – ماتەماتيكا فاكۋلتەتىندە وقىدىم. بىزگە بيولوگيا جانە گەوگرافيا پانىنەن ساباق بەرگەن ەدى. كەيىننەن اۋداندىق كومسومول پارتيا كومميتەتىندە جۇمىس ىستەدى. حاميت اعا «تىڭ جەردى يگەرگەنى ءۇشىن», ۇلى وتان سوعىسى كەزىندەگى تىلداعى ەڭبەگى ءۇشىن» سياقتى مەدالداردىڭ يەسى, پارتيا ارداگەرى. وكىنىشكە وراي, 40 جاسىندا دۇنيەدەن ءوتتى. اۋدان ورتالىعىنان ءبىر كوشەگە ەسىمىن بەرسە, ءوزى تۋىپ وسكەن اۋىلىنا بيۋست-ەسكەرتكىشىن ورناتسا جاقسى بولار ەدى. اۋدان ورتالىعىنداعى «وتان ءۇشىن وت كەشكەندەر» ساياباعىندا اكەسى گاۋھار مەن ءىنىسى شااداتتىڭ ەسىمدەرى تاسقا قاشالىپ جازىلىپ تۇر».
