ۆيتسە-پرەمەردىڭ نازارىنا «شاڭىراق» بوبەكجايىندا اتا-انالارعا بالالارىن دامىتۋ جانە تاربيەلەۋگە كومەكتەسەتىن «SabiDamu» پلاتفورماسى ۇسىنىلدى. ونىڭ نەگىزگى مىندەتتەرى – ەرتە دامۋ سكرينينگى جانە ءوزىن-ءوزى دياگنوستيكالاۋ.
ء«بىز جاڭا پلاتفورما قۇرىپ جاتىرمىز. بۇل جوبا بالالارى قانداي دا ءبىر سەبەپتەرمەن بالاباقشالارعا بارمايتىن اتا-انالارعا ارنالعان. ولارعا بالانى ۇيدە قالاي دامىتۋ كەرەكتىگى ايتىلادى. اتا-انالار كەز كەلگەن پروبلەمانى انىقتاۋ ءۇشىن تەست تاپسىرادى. ولاردى تۇزەتۋگە لوگوپەدتەر, دەفەكتولوگتەر, پسيحولوگتەر كومەكتەسەدى», دەدى «ورلەۋ» كومپانياسىنىڭ باسشىسى فاريدا اقشولاقوۆا.
پلاتفورمادا قازاق جانە ورىس تىلدەرىندە بالانى دامىتۋعا ارنالعان مۋلتفيلمدەر, ءتۇرلى تاپسىرما بار. مەكتەپكە دايىندىق ۇدەرىسى ونلاين فورماتتا اۆتوماتتاندىرىلادى.
جەكەمەنشىك جانە مەملەكەتتىك مەكتەپكە دەيىنگى مەكەمەلەردىڭ باسشىلارىمەن وتكەن كەڭەستە ۆاۋچەرلىك قارجىلاندىرۋدى ەنگىزۋ بويىنشا قاناتقاقتى جوبا تانىستىرىلدى. ونىڭ باستى قاعيداسى – اقشا بالامەن قوسا ەرىپ جۇرەدى. بۇل يننوۆاتسيالىق جۇيە قاراجاتتى پايدالانۋدىڭ اشىقتىعى مەن تيىمدىلىگىن ارتتىرۋعا, سونداي-اق بالاباقشالار اراسىنداعى باسەكەلەستىكتى ىنتالاندىرۋعا باعىتتالعان. جوباعا قاتىسۋشى – تاراز قالاسىنداعى №9 بالاباقشا مەڭگەرۋشىسى جانار وسپانوۆا جۇيەنى ەنگىزۋ تاجىريبەسى تۋرالى باياندادى.
«ۆاۋچەرلىك ءادىستى ەنگىزۋ مەكتەپكە دەيىنگى ۇيىمنىڭ قارجىلىق جاعدايىنا اسەر ەتكەن جوق. كەرىسىنشە, بالاباقشاعا تاعى 100-دەن استام بالا كەلدى. بۇل ءادىس بويىنشا اتا-انالار بالاباقشانى وزدەرى تاڭدايدى. وسىلايشا, مەكەمەلەر اراسىنداعى باسەكەلەستىك پەن جاعدايدى جاقسارتۋعا دەگەن ىنتا ارتا تۇسەدى», دەپ اتاپ ءوتتى ج.وسپانوۆا.
كەڭەستە تامارا دۇيسەنوۆا ءبىلىم بەرۋ جۇيەسىندەگى ساباقتاستىق ماسەلەسىن كوتەرىپ, بالالار مەكتەپكە وتكەندە سترەسكە ۇشىراماي, وقۋ ۇدەرىسىنە تەز بەيىمدەلۋى ءۇشىن مەكتەپكە دەيىنگى مەكەمەلەر مەن باستاۋىش سىنىپتاردىڭ ءبىلىم بەرۋ باعدارلامالارىن بىرىزدەندىرۋ قاجەتتىگىن اتاپ ءوتتى. ماڭىزدى ءرول اتقاراتىن دۇنيە — بالانىڭ جەكە دامۋ كارتاسى, ونى ەرتە جاستان باستاپ جۇرگىزىپ, كەيىن باستاۋىش مەكتەپكە تاپسىرۋ قاجەت.
مەكتەپ ديرەكتورلارىمەن وتكەن جيىندا ءبىلىم ساپاسىن ارتتىرۋ ماسەلەلەرى تالقىلاندى. «قازاقستان حالقىنا» قورى مەن ءبىلىم بەرۋدى تۇراقتى دامىتۋ قورى بىرلەسىپ جۇزەگە اسىرىپ جاتقان تىرەك مەكتەپتەر جوباسى ءوز تيىمدىلىگىن كورسەتىپ وتىر. قاراعاندى وبلىسىندا 10 مەكتەپ قامتىلىپ, تاعى ءبىر ءبىلىم مەكەمەسىن قوسۋ جوسپارلانۋدا. جوبانىڭ ماقساتى – اۋىل بالالارىنا قالاداعىداي ءبىلىم الۋعا مۇمكىندىك جاساۋ.
مەملەكەت باسشىسى 2025 جىلدى جۇمىسشى ماماندىقتارى جىلى دەپ جاريالادى. قاراعاندى تەحنيكالىق-قۇرىلىس كوللەدجىندە «بەساسپاپ» بيزنەس-ينكۋباتورى قاناتقاقتى جوباسى تانىستىرىلدى. ستۋدەنتتەر وندىرىستىك وقىتۋ شەبەرلەرىمەن بىرگە حالىققا قىزمەتتىڭ 4 ءتۇرىن – سانتەحنيكا, اعاش ۇستاسى, جيھاز جاساۋ جانە ەلەكتر قىزمەتتەرىن كورسەتەدى. ىلكىمدى باستاما «جاس مامان» جوباسىن كوممەرتسيالاندىرۋعا ىقپال ەتەدى.
كوللەدجدە ينكليۋزيۆتى ءبىلىم بەرۋ ماسەلەسىنە دە ەرەكشە ءمان بەرىلەدى. ەرەكشە قاجەتتىلىكتەرى بار ستۋدەنتتەر ءۇشىن قولونەر ورتالىعى قۇرىلىپ, ولار مۇندا شەبەرلىكتەرىن شىڭداي الادى. ۆيتسە-پرەمەر بۇل باعىتتاعى جۇمىستى وڭ باعالادى. كوللەدج ديرەكتورلارىنىڭ قاتىسۋىمەن وتكەن كەڭەستە ەڭبەك نارىعىندا سۇرانىسقا يە جۇمىسشى كادرلاردى دايارلاۋ ماقساتىندا تەحنيكالىق جانە كاسىپتىك ءبىلىم بەرۋدى تۇرلەندىرۋ قاجەتتىگى تالقىلاندى.
ت.دۇيسەنوۆا وبلىستا ءدارى-دارمەكتەردى تاڭبالاۋ جۇيەسىنىڭ قالاي جۇزەگە اسىرىلىپ جاتقانىن دا تەكسەردى. اتالعان جۇيە ءدارىنىڭ وندىرۋشىدەن تۇتىنۋشىعا دەيىنگى جولىن باقىلاۋعا مۇمكىندىك بەرەدى, بۇل كونترافاكتىلى ونىمدەر مەن جەتكىزۋ تىزبەگىندەگى قۇقىق بۇزۋشىلىقتاردىڭ الدىن الۋعا كومەكتەسەدى.
ۆيتسە-پرەمەر قاراعاندى فارماتسەۆتيكالىق كەشەنىن ارالاپ كوردى. بۇگىنگى كۇنى مۇندا 16 اتاۋلى دارىلىك زات وندىرىلەدى. كاسىپورىن رەسپۋبليكاداعى قاناتقاقتى جوباعا قاتىسقان. دارىلەردىڭ تاڭبالانۋى مۇندا 2 جىل بويى تاجىريبەدەن ءوتتى. زاڭدى وندىرۋشىلەر ءۇشىن بۇل ۇلكەن ارتىقشىلىق دەيدى «قاراعاندى فارماتسەۆتيكالىق كەشەنى» جشس باس ديرەكتورى سەرگەي بارون.
ت.دۇيسەنوۆا سونداي-اق ءىرى ءدارىحانا قويمالارىن ارالاپ, وسى جۇيەنىڭ قالاي جۇمىس ىستەيتىنىن كوردى.
«مەملەكەت باسشىسى ءبىلىم بەرۋ مەن مەديتسينالىق كومەك ساپاسىن ارتتىرۋ بويىنشا بىرقاتار تاپسىرما بەردى. قاراعاندى وبلىسىندا اتالعان باعىتتا اتقارىلىپ جاتقان جۇمىستاردىڭ ناتيجەسى جەمىستى. ءبىز تاعى قاي باعىتتاردا جۇمىس ىستەۋ كەرەكتىگىن تالقىلادىق. دەنساۋلىق ساقتاۋ سالاسىندا تەلەمەديتسينانى دامىتۋ — ماڭىزدى باعىتتاردىڭ ءبىرى. بۇل تەك قاراعاندى وبلىسىندا ەمەس, بۇكىل ەل بويىنشا داميدى», دەپ اتاپ ءوتتى ت.دۇيسەنوۆا.
