بيىل 6 ايدا شاعىن جانە ورتا بيزنەس (شوب) سالاسىندا جۇمىس ىستەيتىن ادامدار سانى بىلتىرمەن سالىستىرعاندا 95,2%-عا وسكەن. بۇل وتە جوعارى كورسەتكىش, قازىر اۋىل تۇرعىندارى مەملەكەتتەن گرانت الىپ, كاسىبىن باستاپ, 2-3 ادامدى جۇمىسپەن قامتىپ وتىر. ال وڭالتۋ ورتالىعىنا بولىنگەن قارجى اۋەلى ۇلتتىڭ دەنساۋلىعىن جاقسارتۋدا ۇلكەن كومەك بولماق. مۇنى «بالاجان» جەكەمەنشىك تۇزەتۋ ورتالىعىنىڭ ديرەكتورى لاۋرا داركەنباەۆامەن تىلدەسكەندە اڭعاردىق.
«ەكى جىل بۇرىن 2021–2025 جىلدارعا ارنالعان كاسىپكەرلىكتى دامىتۋ جونىندەگى ۇلتتىق جوبا شەڭبەرىندە گرانت الدىم. سونىڭ ناتيجەسىندە بالالارعا ارنالعان تۇزەتۋ ورتالىعىنا كەرەكتى ءتۇرلى ترەناجەر مەن مەديتسينالىق اپپاراتۋرالار ساتىپ الدىق. ورتالىق اشۋ تۋرالى ويلاعانىمدا, ءبىرىنشى كەزەكتە ادامدارعا پايدام تيسە دەگەن وي بولدى. سوندىقتان بالالارعا ارنالعان تۇزەتۋ ورتالىعىن اشۋ تۋرالى شەشىم قابىلدادىم. ءسويتىپ, بيىل قىركۇيەك ايىندا تالدىقورعاندا تۇزەتۋ ورتالىعىمىز, دامىتۋ مەن قوسىمشا ورتالىقتارىمىز جۇمىسىن باستادى. قىزمەتىمىزدىڭ ماقساتى – پسيحوفيزيكالىق دامۋى جاعىنان بۇزىلىسى بار بالالارعا پسيحولوگيالىق-پەداگوگيكالىق كەشەندى كومەك كورسەتۋ. بالانىڭ بەلسەندى-ينتەللەكتۋالدى, سويلەۋ, ەموتسيونالدى مارتەبەسىن وزگەرتۋگە كومەكتەسەمىز. بار بالاعا تەڭدەي جاعداي جاساي وتىرىپ, ولاردى قاتارلاستارىمەن ارالاسۋعا, ءوز-وزىنە قىزمەت كورسەتۋگە ۇيرەتەمىز», دەيدى ل.داركەنباەۆا.
ونىڭ ايتۋىنشا, ورتالىقتا بالالارمەن جۇرگىزىلەتىن كوررەكتسيالى-دامىتۋ جۇمىستارىن پەداگوگ-پسيحولوگ, دەفەكتولوگ مۇعالىم, لوگوپەد مۇعالىم, سۋرەت مۇعالىمى, ەمدىك دەنە شىنىقتىرۋ نۇسقاۋشىسى, مۋزىكالىق جەتەكشى سياقتى ديپلومى بار بىلىكتى ماماندار اتقارادى. تۇزەتۋ جۇمىستارىنىڭ ۇزاقتىعى ءار بالاعا جەكە بەلگىلەنىپ, جەكە وقۋ جوسپارى جاسالادى. ورتالىقتا 15 ادام جۇمىس ىستەيدى.
كومەكتى قاجەت ەتەتىن ادامدارعا مەملەكەتتىك گرانتپەن اشىلعان جەكەمەنشىك وڭالتۋ ورتالىعى دا ۇلكەن ىقپال ەتىپ جاتىر. وتكەن جىلى 500-گە جۋىق ادام وسىندا وڭالتۋدان وتسە, جىل باسىنان بەرى ولاردىڭ سانى 700-گە جەتكەن. سولاردىڭ ىشىندە شىعىس قازاقستان مەن الماتى وڭىرلەرىنەن كەلگەن ەمدەلۋشىلەر دە بار. ال ورتالىق قىزمەتكەرلەرىنىڭ سانى 2 ەسە, ياعني 16-دان 32-گە ارتتى.
«2022 جىلدىڭ سوڭىندا «باستاۋ بيزنەس» جەلىسىمەن وقۋدان ءوتتىم, كەيىن كاسىپكەرلىكتى دامىتۋ جونىندەگى ۇلتتىق جوبا اياسىندا ءوز جوبامدى تانىستىرىپ, 5 ملن تەڭگە گرانت ۇتىپ الدىم. وسى اقشاعا رەسەيلىك «لەۆيتاس» ارنايى قۇرىلعىسىن, پولشادان ءجۇرۋ يميتاتورىن ساتىپ الدىم. ينسۋلت, ينفاركت العان, جول اپاتىنا تۇسكەن ادامدار مەملەكەتتىك الەۋمەتتىك مەديتسينالىق ساقتاندىرۋ ء(مامس) جۇيەسىمەن قازىر ءبىزدىڭ ورتالىقتا وڭالتۋدىڭ تولىق كۋرسىنان ءوتىپ جاتىر. زاماناۋي وزىق دياگنوستيكالىق قۇرالدارىمىز بار. ءمامس اياسىندا تەگىن وڭالتۋمەن قاتار, كوممەرتسيالىق نەگىزدە دە قىزمەت كورسەتەمىز. بۇل رەتتە ءبىزدىڭ ورتالىعىمىز – تالدىقورعاندا تاۋلىك بويى قىزمەت كورسەتەتىن جالعىز ورتالىق», دەيدى «مەيىرىم» وڭالتۋ ورتالىعىنىڭ ديرەكتورى ەراسىل ەدىلحان ۇلى.
ازاماتتار دەنساۋلىق جاعدايىنا قاراي ستاتسيوناردا 10-14 كۇن كولەمىندە ەمدەلەدى. ورتالىقتىڭ كۇندەلىكتى 60 ادام قابىلداۋعا قاۋقارى بار.
كاسىپكەر الداعى ۋاقىتتا تاۋلىگىنە 24 ساعات بويى ۇزدىكسىز كۇتىمدى قاجەت ەتەتىن اۋىر جاعدايداعى ناۋقاستارعا ءپاللياتيۆتى توسەك ساتىپ الۋ جوسپارى بار ەكەنىن ايتادى. ال وعان مەملەكەت تاراپىنان قولداۋ ماڭىزدى. بۇگىندە وبلىس اۋماعىندا 7 وڭالتۋ ورتالىعى جۇمىس ىستەيدى. سونىڭ 5-ەۋى – مەملەكەتتىك بولسا, قالعانى جەكەمەنشىك سانالادى.
بيزنەستى دامىتۋدىڭ 2022–2023 جىلدارعا ارنالعان مەملەكەتتىك قولداۋ شارالارى اياسىندا جەتىسۋ وبلىسىندا جالپى سوماسى 680 ملن تەڭگەگە 142 جوبا ماقۇلداندى. الەۋمەتتىك كاسىپكەرلىك پەن ء«بىر اۋىل – ءبىر ءونىم» جوباسىنىڭ جەڭىمپازدارىنا مەملەكەتتىك گرانت بەرۋ قاراستىرىلعان. وسى ماقساتتارعا جەرگىلىكتى بيۋدجەتتەن 170,0 ملن تەڭگە ءبولىندى. كونكۋرس بيىل قاراشادا وتكىزىلەدى دەپ جوسپارلانعان.
جالپى, وڭىردە 6 ايدا شاعىن جانە ورتا بيزنەستە جۇمىس ىستەيتىن ادام سانى 104,7 مىڭدى قۇرادى. شوب-تىڭ جالپى وڭىرلىك ونىمدەگى ۇلەسى – 33,2%. كەلەر جىلى وسى سالاعا بولىنەتىن قارجى كولەمى ارتادى.
جەتىسۋ وبلىسى
