اسىرەسە سىن مەن سىقاققا, ءازىل مەن اجۋاعا تولى «قىزىعى مول سول جىلدار» اتتى ءبىرىنشى ءبولىمى وقىماسىڭا قويمايتىن سىندى. «بەتاشاردىڭ بەس سومى» دەگەن تاقىرىپتىڭ ءوزى مەنمۇندالاپ تۇرعان جوق پا؟
ەكىنشى, ءۇشىنشى بولىمدەرى – «ەگەمەندىكتىڭ العاشقى لەبى» ءھام ء«ومىردىڭ ءوز بەينەسى» اتالىپتى. بۇل جونىنەن كەلگەندە, كىتاپ تۋرالى جازعان اۆتورلاردىڭ پىكىرى نازار اۋدارتادى. «مىنا كىتاپقا جازىلعان ماقالالاردىڭ ءبىر بولىگى وتكەن عاسىردىڭ سوناۋ توقسانىنشى جالدارىنىڭ باسىندا جازىلىپ, قازىر تاريح تورىندە قالعان «وركەن» اپتالىعىندا جاريالانعانىمەن, قۇندىلىعى ءالى جوعالماعانىنا تاڭعالامىز. سول سياقتى, ەندى عانا «ەگەمەن قازاقستان» اتانعان گازەتتە كوتەرگەن تاقىرىپتارى شيرەك عاسىردان سوڭ دا جۇرتشىلىقتى تولعاندىرادى ەكەن. مۇنى اسىرەسە, بايقوڭىر عارىش ايلاعىنا قاتىستى ماقالالارىنان بايقادىق. بايقوڭىرعا بارىپ, بۇل كۇردەلى كەشەنمەن ەگجەي-تەگجەيلى تانىسىپ, ىشەك قىرىندىسىن اقتارۋعا قابىلەتى جەتكەندەر بىرەن-ساران» دەپتى قالامگەر قاينار ولجاي.
ماقالالار جيناعىنىڭ ءتورتىنشى ءھام بەسىنشى بولىمدەرى «يگى ىسپەن ءىز سالعاندار» جانە «كۋرستاستار كەلبەتى» دەپ ايدارلانىپتى. قۇرعاق, قارا ماقالالار ەمەس, كىتاپتىڭ كوتەرگەن جۇگى ماتەريالداردىڭ تاقىرىبىنان-اق كورىنەدى. وقىرمان ولجاسىنا اينالار دەگەن ويدامىز.
