فوتو: pixabay.com
قۇرامىندا ەسىرتكى بار وسىمدىكتەردى ءوسىرۋ فاكتىلەرىن انىقتاۋعا, جاسىرىن ەگىستىكتەر جانە پلانتاتسيالاردى جويۋعا باعىتتالعان ءىس-شارالار بارىسىندا 1607 ەسىرتكى قىلمىسى انىقتالعان. ونىڭ ىشىندە 799 ساتۋ فاكتىسى, ەسىرتكىنى زاڭسىز ساقتاۋدىڭ 194 فاكتىسى, 245 ءوسىرۋ فاكتىسى.
زاڭسىز اينالىمنان 21,5 توننا ەسىرتكى تاركىلەنگەن, ونىڭ ىشىندە 1,5 كگ-نان استام گەروين, شامامەن 4,5 توننا ماريحۋانا, 200 كگ-نان استام گاشيش, 187 كگ سينتەتيكا, 16 توننادان استام كاننابيس وسىمدىگى, قۇرامىندا ەسىرتكى بار وسىمدىكتەردىڭ 180 مىڭ بۇتاسى انىقتالعان.
«سونىمەن قاتار وپەراتسيا بارىسىندا پوليتسيا ەكى ۇيىمداسقان قىلمىستىق توپتىڭ ارەكەتىنە توسقاۋىل قويدى. قاراعاندى وبلىسىندا ۇيىمداسقان توپ انىقتالدى. 15 كۇدىكتى ۇستالدى. ولار «مەفەدروندى» Telegram ارقىلى ساتقان. قازىرگى ۋاقىتتا تەرگەۋ جالعاسۋدا. الماتىدا 5 ادامنان تۇراتىن ۇيىمداسقان توپ اشكەرەلەندى. بۇلار دا ينتەرنەت-رەسۋرستاردىڭ كومەگىمەن سينتەتيكالىق ەسىرتكى ساتۋمەن اينالىسقان. ءتىنتۋ كەزىندە كۇدىكتىلەردەن 20 كگ «مەفەدرون» جانە 750 كگ پرەكۋرسور تاركىلەندى», دەدى ءىىم رەسمي وكىلى شىڭعىس الەكەشەۆ.
