فوتو: ۆەدومستۆو
قازاقستان ورتالىق ازيا ەلدەرىمەن جاسالعان كەلىسىمدەر ناتيجەسىندە 2025 جىلدىڭ ءساۋىر ايىنا دەيىن سىرداريا وزەنى ارقىلى شامامەن 11 ملرد تەكشە مەتر سۋ الادى.
مينيستر نۇرجان نۇرجىگىتوۆ تۇركىمەنستاننىڭ اشحاباد قالاسىندا مەملەكەتارالىق سۋ شارۋاشىلىعىن ۇيلەستىرۋ كوميسسياسىنىڭ (مسشۇك) 87-ءشى وتىرىسىنا ەلىمىزدىڭ اتىنان قاتىستى. كەزدەسۋگە تاجىكستان, تۇركىمەنستان وزبەكستاننىڭ سۋ شارۋاشىلىعى ۆەدومستۆولارىنىڭ باسشىلارى قاتىستى. ال قىرعىزستان ەلىنىڭ وكىلدەرى باقىلاۋشى رەتىندە قاتىستى.
ناتيجەسىندە, 1 ساۋىرگە دەيىن ەلىمىزدەگى شاردارا سۋ قويماسىنا 11 ملرد تەكشە مەتر سۋ جىبەرىلەدى دەپ كۇتىلىپ وتىر. بۇل 2025 جىلعى سۋارۋ ماۋسىمىندا ەلىمىزدىڭ وڭتۇستىك ايماقتارىنا قاجەت سۋ كولەمىن جيناقتاۋعا مۇمكىندىك بەرەدى.
ايتا كەتسەك, وتىرىسقا قاتىسۋشىلار سىرداريا جانە ءامۋداريا وزەندەرى باسسەيندەرىندەگى سۋ قويمالارىنىڭ بولجامدى جۇمىس كەستەسىن بەكىتتى, سونىمەن قاتار 2024-2025 جىلداردىڭ كۇزگى-قىسقى كەزەڭىنە ورتالىق ازيا ەلدەرىنە سۋ بەرۋ كولەمىن ايقىندادى.
«بيىل كەلىسسوزدەر مەن بىرلەسكەن جۇمىستىڭ ناتيجەسىندە ءبىز سىرداريا وزەنى باسسەينىندە سۋدى ءتيىمدى بولۋگە قول جەتكىزدىك. سونداي-اق 86-شى وتىرىس قورىتىندىسى بويىنشا بىرلەسىپ اتقارىلعان جۇمىسقا وڭ باعامدى بەرگىم كەلەدى. اتاپ ايتقاندا, قىرعىزستانمەن سۋ-ەنەرگەتيكالىق ىنتىماقتاستىق تۋرالى كەلىسىمدەر جۇزەگە اسىرىلدى, سونداي-اق بيىل سۋارۋ ماۋسىمىندا «باحري-توچيك» سۋ قويماسىنىڭ جۇمىس كەستەسىن ۇيلەستىرۋ بويىنشا ءىس-شارالار قابىلداندى», دەدى مينيستر نۇرجان نۇرجىگىتوۆ.
ايتا كەتەيىك, مسشۇك 88-ءشى وتىرىسى 2025 جىلدىڭ ءبىرىنشى توقسانىندا دۋشانبە قالاسىندا وتەدى.
