عىلىمي شارادا قازاقستانداعى تۇڭعىش فارابيتانۋشى اقجان ءال-ماشانيگە ارنالعان مۇراجاي سالتاناتتى تۇردە اشىلدى.
وعان قر پارلامەنتى سەناتى مەن پارلامەنت ءماجىلىسىنىڭ دەپۋتاتتارى, قازاقستاننىڭ حالىق جازۋشىسى, مەملەكەت جانە قوعام قايراتكەرى ولجاس ومار ۇلى سۇلەيمەنوۆ, قازاقتان شىققان تۇڭعىش عارىشكەر, ۇشقىش, كەڭەس وداعىنىڭ باتىرى, حالىق قاھارمانى توقتار وڭعارباي ۇلى اۋباكىروۆ, يران يسلام رەسپۋبليكاسىنىڭ قازاقستان رەسپۋبليكاسىنداعى ەلشىلىگىنىڭ مادەني ىستەرى جونىندەگى كەڭەسشىسى ءالي اكبار تالەبي ماتين ارنايى شاقىرىلىپ, عۇلاما عالىمنىڭ ءومىر ارناسىنان سىر شەرتەتىن تاعىلىمعا تولى عۇمىرىن ناسيحاتتاپ, قۇندى ەستەلىكتەرمەن ءبولىستى.
«اقجان ءال-ءماشانيدىڭ ەڭبەكتەرىن ءالى دە ناسيحاتتاۋىمىز قاجەت. الداعى جىلى عالىمنىڭ 120 جىلدىق مەرەيتويى اتالىپ وتەدى. ونى كەڭ اۋقىمدا ۇيىمداستىرىپ, جاس عالىمداردى تاربيەلەۋگە ىقپال ەتۋىمىز قاجەت», دەدى قولجازبالار جانە سيرەك كىتاپتار ۇلتتىق ورتالىعىنىڭ ديرەكتورى جاندوس بەكدىلدا ۇلى.
ءىس-شاراعا اقجان جاقسىبەك ۇلىنىڭ ۇرپاقتارى قاتىسىپ, قۇندى اقپاراتتارمەن ءبولىستى. ەكى بولىمنەن تۇراتىن جيىندا «ماشانيتانۋ» وقۋلارىن جىل سايىن وتكىزۋدى راسىمگە اينالدىرۋ, اقجان ءال-ماشانيدىڭ قالامىنان تۋىنداعان 23 قولجازبانى جاڭا تەوريالىق-مەتودولوگيالىق تۇرعىدا زەرتتەپ, عىلىمي ەڭبەكتەر دايىنداۋ, اقجان ءال-ماشاني اتىنداعى №92 مەكتەپ-ليتسەيىنىڭ ۇزدىك وقۋشىلارىنا «تۇڭعىش فارابيتانۋشى-عالىم اقجان ءال-ماشاني» اتىنداعى شاكىرتاقىنى تاعايىنداۋ, مەكتەپ باعدارلاماسىنا 5 – 11 سىنىپتارعا ارنالعان «ماشانيتانۋ» تاڭداۋ ءپانىن ەنگىزۋ سياقتى ۇسىنىستار ايتىلدى.
ايتا كەتەيىك, العاش رەت عالىمنىڭ اتى بەرىلگەن №92 مەكتەپ-ليتسەيىندە جاس عالىمدار كوبەيىپ كەلە جاتقانى كوپشىلىكتى ءتانتى ەتتى.
