ءىس-شارا ەلىمىزدىڭ ءبىرىنشى قورعانىس ءمينيسترى ساعادات نۇرماعامبەتوۆتىڭ بيۋستىنە گۇل شوقتارىن قويىپ, باتىردى ءبىر مينۋت ۇنسىزدىكپەن ەسكە الۋىمەن باستالدى. حالىق قاھارمانى, وتستاۆكاداعى گەنەرال-لەيتەنانت باقىتجان ەرتاەۆ جيىندى اشىپ, وسى جىلدار ىشىندە 1 700-دەن اسا تۇلەك شىققان ءبىلىم ورداسىنىڭ قۇرىلۋ تاريحى تۋرالى ايتتى.
قورعانىس ءمينيسترىنىڭ ورىنباسارى, گەنەرال-مايور شايح-حاسان جازىقباەۆ اسكەري كوللەدج ەل قارۋلى كۇشتەرىنىڭ كىشى بۋىن كومانديرلەرىن دايارلاۋدىڭ نەگىزگى ورداسى دەپ اتاپ ءوتتى.
«بولىمشەلەردەگى اسكەري ءتارتىپتىڭ جاعدايى, جاۋىنگەرلىك داعدىلار مەن جەكە قۇرامنىڭ مورالدىق-جاۋىنگەرلىك رۋحى سەرجانتتاردىڭ كاسىبيلىگىنە بايلانىستى. كوللەدج قابىرعاسىندا العان ساپالى ءبىلىم مەن سانالى تاربيە – تۇلەكتەرىمىزدىڭ سەنىمدى بولاشاعىنىڭ باستاۋى», دەدى ول.
اتاۋلى كۇنگە وراي گەنەرال-مايور شايح-حاسان جازىقباەۆ اسكەري كوللەدج باستىعى پولكوۆنيك عازيز تولەۋشەۆكە قورعانىس ءمينيسترىنىڭ اتىنان العىسحات تابىس ەتتى.
كوللەدج ۇجىمى مەن ونىڭ تۇلەكتەرىن 25 جىلدىعىمەن قارۋلى كۇشتەردىڭ ارداگەرلەرى وتستاۆكاداعى گەنەرال-مايور ءاليحان جاربولوۆ پەن وتستاۆكاداعى گەنەرال-لەيتەنانت اباي تاسبولاتوۆ تا قۇتتىقتادى. ءوز كەزەگىندە «قارۋلى كۇشتەردىڭ ارداگەرلەرى» رقب توراعاسىنىڭ ورىنباسارى, وتستاۆكاداعى گەنەرال-مايور مارات ناعۇمانوۆ كوللەدج وقىتۋشىلارى مايور باقبەرگەن سەرىكباەۆ پەن كۇنساي نۇرعاليەۆاعا «ساعادات نۇرماعامبەتوۆكە 100 جىل» مەدالىن تابىس ەتتى.
اسكەري وقۋ ورنىنىڭ العاشقى تۇلەكتەرىنىڭ ءبىرى, اسكەري-اۋە كۇشتەرى قولباسشىسى باسقارماسىنىڭ اعا وفيتسەرى, پودپولكوۆنيك المات اقىش «جاس ۇلان» رەسپۋبليكالىق مەكتەبىنە 1999 جىلى تۇسكەنىن جەتكىزدى.
«مۇندا وتكىزگەن جىلداردى ءاردايىم ەرەكشە ساعىنىشپەن ەسكە الامىن. ءبىرىنشى كەزەكتە تارتىپكە ۇيرەندىك. وتان الدىنداعى بورىشقا بەرىك بولۋ جانە پاتريوتتىق دەگەننىڭ نە ەكەنىن بىلدىك. مەنىڭ تۇسىنىگىمدەگى پاتريوتيزم – تەك جارعى, مارش جانە ساپتا تۇرۋ عانا ەمەس, بۇل ءوز ەلىڭنىڭ الدىنداعى جاۋاپكەرشىلىك سەزىمى, ءوز ءۇيىڭدى قورعاۋعا دايىن بولۋ. اسكەري ءبىلىم ماعان ۇلكەن ومىرگە جولداما بەردى. بۇل ءۇشىن مەن پەداگوگتەر ۇجىمىنا العىسىمدى بىلدىرەمىن», دەدى ا.اقىش.
ايتا كەتسەك, كوللەدجدى بىتىرگەن تۇلەكتەر بىردەن اسكەري قىزمەتكە جىبەرىلەدى. اراسىندا وقۋدى جالعاستىرۋعا شەشىم قابىلداعاندار دا بار. بيىل كوللەدجدى 82 كۋرسانت ءبىتىردى.
ءىس-شارا ۇلتتىق اسكەري-پاتريوتتىق ورتالىعىنىڭ شىعارماشىلىق ۇجىمى دايىنداعان مەرەكەلىك كونتسەرتپەن اياقتالدى. ەستەرىڭىزگە سالا كەتسەك, ارميا گەنەرالى ساعادات نۇرماعامبەتوۆ اتىنداعى اسكەري كوللەدج 2021 جىلى استانادا «جاس ۇلان» رەسپۋبليكالىق مەكتەبىنىڭ بازاسىندا قۇرىلعان. وعان ءبىرتۋار تۇلعا ساعادات نۇرماعامبەتوۆتىڭ ەسىمى 1999 جىلى بەرىلگەن.
