ماسەلەن, بيىل تالدىقورعان قالاسىنىڭ قالا بولعانىنا 80 جىل تولىپتى. قالا اكىمدىگىنىڭ سايتىندا 9 قىركۇيەكتە جاريالانعان اقپاراتقا كوز سالساق, وڭىرلىك كوممۋنيكاتسيالار قىزمەتىندە قالا كۇنىن تويلاۋ ماسەلەسىنە ارنالعان بريفينگ وتكەن. وندا تالدىقورعان قالاسى اكىمىنىڭ ورىنباسارى جەڭىس اندابەكوۆ قالا كۇنىن تويلاۋ ءبىر ايعا جالعاسىپ, قىركۇيەكتىڭ 28-ىنە دەيىن اتاپ وتىلەتىنىن ايتادى. «مەن تالدىقورعاندىقپىن» ۇرانىمەن وتكىزىلەتىن ءىس-شارا قالا تۇرعىندارىنىڭ ەسىندە قالاتىنداي وتەتىنىنە سەنىمدىمىز. ايتا كەتەيىك, «جاستار» ساياباعىنىڭ باس ساحناسىندا «قالاعا سىيلىق» اتتى 80 جۇپتىڭ ءۆالسى, قازاق ەسترادا جۇلدىزدارى «Kalifarniya», «Say Mo», «Umberto» كەلىپ ونەر كورسەتىپ, سوڭى مەرەكەلىك وت شاشۋمەن اياقتالماق», دەپ مالىمدەگەن شەنەۋنىك. اكىمدىك قىزمەتكەرى بۇل ءىس-شارانىڭ بيۋدجەتىن جاريالاماسا دا, جوبالاپ سەزىپ وتىرمىز.
ال ەندى ءوزىمىز كۋا بولعان ۇلىبريتانيانىڭ ءدال وسى تالدىقورعان قالاسى سەكىلدى لانكاستەر قالاسىنىڭ تۋعان كۇنى قالاي اتاپ وتىلگەنىن ايتايىق.
1193 جىلى 12 ماۋسىمدا لانكاستەر قالاسى ىرگە كوتەرىپ, جارعىعا قول قويىلعان. وسى جىلدىڭ 12 ماۋسىمىندا قالا ورتالىعىندا قالا كۇنىنە وراي 1 ساعاتقا جەتەر-جەتپەس ۋاقىتقا سوزىلعان ءىس-شارا ءوتتى. قالالىق مۇراجاي الدىندا جارعى تۇپنۇسقاسىن جانە قالا تاريحىن ەكى كىسى وقىپ بەردى. سول زامان ۋاقىتىنا ساي كيىنگەن. ورتالىقتا شارۋالارىمەن جۇرگەن حالىق جينالا قويىپ, ەكەۋىنىڭ ءسوزىن مۇقيات تىڭداپ, قول شاپالاقتادى. ءسوز سوڭىن ءبىرىنشىسى «Love Lancaster», ەكىنشىسى «God Save the King» (جاراتقان باسشىمىزدى ساقتاي گور) دەپ اياقتادى. تۇرعىندار تاريحقا, قالاعا قۇرمەت تانىتتى. فوتوعا ءتۇسىپ, تاراستى. 800 جىلدان اسا تاريحى بار لانكاستەر قالاسىنىڭ تۋعان كۇنى وسىلاي ءوتتى. قالا كۇنىن اتاپ وتۋگە قىرۋار اقشا شاشىپ دۇرلىككەن جوق. بىراق كورولعا جانە تۋعان قالاسىنا دەگەن سۇيىسپەنشىلىك ەرەكشە. كىشكەنە عانا ءىس-شارادا قانداي مادەنيەت پەن قۇرمەت جاتىر.
اعىلشىنداردىڭ نەگە باي ەكەنىن ەندى تۇسىنگەندەيمىز. قالانىڭ تاريحىنا, جالپى تاريحقا دەگەن قۇرمەتى زور. تاريحي عيماراتتاردى, تاۋ-تاستى كوزدىڭ قاراشىعىنداي قورعايدى. قۇلايىن دەپ تۇرعان ەسكى ءۇيدى جوندەپ الەك. ءبىر كىرپىشى قۇلاسا, ونى قايتا قالايدى. بىرنەشە عاسىر بۇرىنعى بەكىنىستەرى سول قالپىندا تۇر. ۇكىمەت تاريحقا اقشا ايامايدى. بولماسا, جەرگىلىكتى حالىق اسارلاتىپ, اقشا جينايدى. قايىرىمدىلىق ءىس-شارالارىن ءجيى وتكىزەدى. ءبارى وزدەرى ءۇشىن. تاريحى تەرەڭ ەلگە تۋريست تە كوپ كەلەدى. ماسەلەن, ستوۋنحەندج (Stonehenge) دەگەن تاريحي جەرى بار. لوندوننان 130 شاقىرىمداي جەردە ورنالاسقان. تۋريست كوپ بارادى. تاريحىن تارتىمدى ەتىپ جازعان. بارعىڭ كەپ تۇرادى. بىراق تاستان باسقا ەشتەڭە جوق. بارعاندار «وسى ما ستوۋنحەندجى» دەپ جاتادى. قىسقاسى, جارناماسى كەرەمەت, سەرۆيسى ساپالى. تۋريزم ەندى بۇل – باسقا ماسەلە.
ناعىز مادەنيەتتىڭ ۇلگىسىن كورسەتەتىن, قالىپتاستىراتىن بۇقارالىق ءىس-شارا «قالا كۇنى» بىزدە توي تويلاپ, دۋمانداتقان فورماتتا وتەدى. انشىلەردى شاقىرۋ, وت شاشۋ, «قالانىڭ قۇرمەتتى ازاماتىن» تاڭداپ, ماراپاتتاۋ. وتىز كۇن ويىن, قىرىق كۇن تويىن وتكىزىپ, دۋمانداتىپ جۇرگەنىمىز. ونىڭ بىزگە بەرەرى از, ارينە. بي بيلەپ, ءان شىرقاپ جۇرگەنىمىزدە سول قالانىڭ تاريحىنان حاباردار بولىپ, قۇندىلىعىن ساقتاۋعا دا ق ۇلىقتى ەمەسپىز. ويتكەنى ويىن-ساۋىق قۇرۋدان قول بوساماي, ميىمىز دا اقپارات قابىلداعىسى كەلمەي تۇرادى.
ساۋىق-سايرانمەن دۋمانداتىپ وتكەن ءىس-شارالار مادەنيەت قالىپتاستىرۋدىڭ ورتاسى ەمەس ەكەنى بەلگىلى. بۇقارالىق ءىس-شارالار مادەني سيپاتتا وتكىزىلۋى كەرەك. حالىق تويدى ونسىز دا وزدەرى وتكىزەدى. قالا كۇنىن ءبىر اي تويلاۋدىڭ ماڭىزى قانداي ەكەنىن اكىمدىك سارالاپ, دامىعان ەلدەردەن ۇلگى السا, قارجى حالىقتىڭ وزگە مۇقتاجىنا جۇمسالار ەدى.
