فوتو:baiterek.gov.kz/
كەلىسىمنىڭ ماقساتى – ەلىمىزدەگى تەحنولوگيالاردى دامىتۋعا, ءبىلىم الماسۋعا جانە تۇراقتى دامۋعا جاردەمدەسۋ. مەموراندۋم تالاپتارىنا سايكەس, سەرىكتەستىك جاڭا تەحنولوگيالاردى ەنگىزۋگە, تسيفرلىق ترانسفورماتسيا مەن ونەركاسىپتىك دامۋعا باسا نازار اۋدارادى, بۇل اۋىل شارۋاشىلىعى جانە ونەركاسىپ سەكتورلارىنىڭ تيىمدىلىگىن ارتتىرماق.
«الدىڭعى قاتارلى تەحنولوگيالاردى پايدالانىپ, ءبىلىم الماسۋدى قولداۋ ارقىلى ءبىز ەكونوميكاعا دا, جەرگىلىكتى حالىققا دا پايدا اكەلەتىن تۇراقتى ءوسۋدىڭ نەگىزىن قالىپتاستىرامىز», دەپ مالىمدەدى John Deere-ءدىڭ تمد جانە ورتالىق ازيا بويىنشا «اۋىل شارۋاشىلىعى جانە كوگالدار» باعىتىنداعى پرەزيدەنتى چابا لەيكو.
ال «بايتەرەك» حولدينگى باسقارما توراعاسىنىڭ ورىنباسارى جاندوس شايحى: «قازاقستانعا تىكەلەي ينۆەستيتسيالار سالۋعا دەگەن الەمدىك سالالىق كوشباسشىلاردىڭ قىزىعۋشىلىعىن قۇپتايمىز, ويتكەنى بۇل ءبىزدىڭ ەل مەن ءوڭىردىڭ اگروونەركاسىپتىك الەۋەتىن ىسكە اسىرۋ ارقىلى تۇراقتى ەكونوميكالىق ءوسۋدى قامتاماسىز ەتەدى», دەيدى.
بۇل كەلىسىم جاڭا جۇمىس ورىندارىن اشۋعا, ەكونوميكالىق تاۋەلسىزدىكتى ارتتىرۋعا جانە قازاقستاننىڭ اۋىل شارۋاشىلىعى سالاسىنىڭ تۇراقتى وسۋىنە ىقپال ەتەدى دەپ كۇتىلەدى. ول Deere & Company, Eurasia Group جانە «بايتەرەك» حولدينگىنىڭ قازاقستاننىڭ باسەكەگە قابىلەتتىلىگىن ارتتىرۋعا جانە ونى ورتالىق ازياداعى اۋىل شارۋاشىلىعى مەن ونەركاسىپتىك دامۋداعى كوشباسشى رەتىندە قالىپتاستىرۋعا باعىتتالعان ورتاق ماقساتىن كورسەتەدى.
ايتا كەتەيىك, Deere & Company – اۋىل شارۋاشىلىعى, قۇرىلىس جانە ورمان شارۋاشىلىعى جابدىقتارىن ءوندىرۋ بويىنشا الەمدىك كوشباسشى كومپانيانىڭ ءبىرى.
