جەتىمدەر ۇيىنەن شىققاندار باسپانا الا الماي ءجۇر – سەناتور

ونىڭ ايتۋىنشا, بالالار ۇيىنەن شىققان جاسوسپىرىمدەر ومىردە ءوز ورنىن تاۋىپ, اياققا تۇرىپ كەتكەنشە مەملەكەت تاراپىنان قولداۋ ءتيىستى دارەجەدە كورسەتىلۋ كەرەك. سونداي-اق دەپۋتات ەلىمىزدە جەتىم بالالاردىڭ باسىم بولىگى باسپانالى بولا الماي جۇرگەنىن اتاپ ءوتتى.

«ونەركاسىپ جانە قۇرىلىس مينيسترلىگى جەتىم جانە اتا-اناسىنىڭ قامقورلىعىنسىز قالعان بالالارعا باسپانا الۋعا ارنالعان ءتۇرلى مەملەكەتتىك باعدارلامالارمەن جەڭىلدىكتەر قاراستىرىلعانى تۋرالى اقپارات بەرىپ جاتىر. الايدا, 2022 جىلى شەكتى جاسقا تولعان جەتىم بالالاردىڭ 61 471-ءى مەملەكەتتىك تۇرعىن ءۇي قورىندا كەزەكتە تۇرسا, ونىڭ 852-ءسى عانا باسپانالى بولعان. ءدال سولاي, 2023 جىلى كەزەكتە تۇرعان 62 290 ازاماتتىڭ 809-ى عانا باسپاناعا قول جەتكىزگەن», دەيدى دەپۋتات. 

سونىمەن قاتار گەننادي شيپوۆسكيح جەتىم بالالاردىڭ ساپالى وقۋ ورىندارىنا ءتۇسۋ مەن جۇمىسقا ورنالاسۋ ماسەلەسىن تىلگە تيەك ەتتى.

«بۇل ۋاقىتتا جەتىم بالالاردىڭ كوللەدجدەر مەن جوعارى وقۋ ورىندارىنا ءتۇسۋى ءۇشىن بولىنەتىن گرانت كۆوتاسىن كوبەيتۋ مانىزدى. الايدا, بۇل ارادا شەشۋشى ءارى ماڭىزدى ءرول اتقاراتىن ماسەلە – جۇمىسپەن قامتۋدىڭ شەشىمىن تابۋ. وكىنىشكە قاراي, بۇگىنگى كۇنى ورتا مەكتەپتى بىتىرگەن جەتىم بالالاردىڭ جۇمىسقا ورنالاسۋ كورسەتكىشى كوڭىل كونشىتپەيدى», دەيدى ول.

اتالعان ماسەلەلەردى ەسكەرە وتىرىپ, دەپۋتات كەلەسى ۇسىنىستارىن ورتاعا سالدى:

• شەكتى جاسقا جەتكەن جەتىم بالالاردىڭ باسپانا كەزەگىنىڭ بىرنەشە جىلدارعا سوزىلىپ كەتۋىنە بايلانىستى ارنايى باسپانا باعدارلاماسىن ازىرلەپ, جۇمىس الگوريتمىن ۇسىنۋ;
• جاستايىنان تاعدىردىڭ تالكەگىنە تۇسكەن جەتىمدەرگە وقۋ ورنىنان كەيىنگى ارنايى جۇمىسپەن قامتۋ باعدارلاماسىن ازىرلەۋ.

«تاعدىر تالكەگىنە تاپ بولعان تاستاندى جانە جەتىم بالالاردىڭ جاي-كۇيى بارشامىزدى بەيجاي قالدىرمايدى دەپ سەنەمىن», دەپ ءسوزىن تۇيىندەدى دەپۋتات.