فوتو: bilim-all.kz
قاراقات ابدەن ۇكىمەت باسشىسى ولجاس بەكتەنوۆكە قاراتا قويعان ساۋالىندا ەلدەگى گەندەرلىك تەڭدىك ساياساتى ءجيى ايتىلعانمەن, تاۋەلسىزدىك العالى بەرى ساياسي قىزمەتتەردى اتقارعان ايەلدەردىڭ ۇلەسى ەشقاشان 15 پايىزدان اسپاعانىنا نازار اۋداردى.
IPU Parline رەيتينگىن العا تارتقان دەپۋتاتتىڭ دەرەگىنشە, قازاقستان ايەلدەردىڭ ساياساتتاعى وكىلدىگى بويىنشا 183 ەلدىڭ ىشىندە نەبارى 124-ورىنعا تۇراقتاعان.
2023 جىلى مەملەكەتتىك قىزمەتشىلەر اراسىندا ايەلدەردىڭ ۇلەسى 55,7% بولسا, ولاردىڭ اراسىندا باسشىلىق قىزمەتتەگىلەردىڭ ۇلەسى- 20,3% قۇراعان.
قاراقات ابدەن بۇل تۇرعىدا كورشىلەس وزبەكستانداعى زاڭ شىعارۋشى ورگانداردا قىزمەت اتقاراتىن ايەلدەردىڭ ۇلەسى 38 پايىزدى قۇراعانىن اتاپ ءوتتى.
ول وبلىستارداعى باسقارمالاردىڭ باسشىلارى تولىقتاي ەر ادامدار ەكەنىن تىلگە تيەك ەتىپ, ايەلدەر نەگىزىنەن «جۇمىسشى اتتارداي» كۇردەلى ىستەردى اتقارىپ جۇرگەنىنە ەرەكشە نازار اۋداردى.
ول ساۋالىن قورىتىندىلاي كەلە ەلىمىزدەگى ايەلدەردىڭ جۇمىس ىستەۋ ۋاقىتىن قىسقارتۋدى ۇسىندى.
«سكانديناۆيا ەلدەرىنىڭ تاجىريبەسىنە نازار اۋدارا وتىرىپ, ايەلدەر ءۇشىن قىسقارتىلعان جۇمىس ۋاقىتىن ەنگىزۋدى قاراستىرۋ كەرەك. بۇل جۇمىس ىستەيتىن ايەلدەردىڭ بالا تاربيەسىنە كوبىرەك كوڭىل بولۋىنە مۇمكىندىك بەرەدى. سونداي-اق, بالا كۇتىمىنە بايلانىستى اقىلى دەمالىستى ەكى جىلعا دەيىن ۇزارتۋدى ۇسىنامىن», دەدى قاراقات ابدەن.
