فوتو: pixabay.com
بايقاۋ ءۇشىنشى جىل قاتارىنان ۇيىمداستىرىلىپ كەلەدى, وعان مەكتەپ مۇعالىمدەرى دە, كوللەدجدەر مەن جوعارى وقۋ ورىندارىنىڭ وقىتۋشىلارى دا قاتىسا الادى.
اتالعان باستاما ەل پەداگوگتەرىنە پلاتفورما اۋديتورياسىمەن ءوز تاجىريبەلەرىن بولىسۋگە مۇمكىندىك بەرەدى. وتكەن جىلدارداعى بايقاۋ جەڭىمپازدارى بوتاگوز وماروۆا, يگور گنوەۆ, حايدار مىرزاحمەتوۆ ءوز بەينەروليكتەرى ارقىلى ميلليونداعان لايك جيناپ, الەۋمەتتىك جەلى قولدانۋشىلارىنىڭ ىقىلاسىنا بولەنگەن ەدى.
«بايقاۋ ارقىلى مەن ءبىلىم بەرۋ مازمۇنىن قۇرۋدىڭ جاڭا تاسىلدەرىن تابۋدى جانە ءوز ءبىلىمىمدى ءبولىسۋدى ۇيرەندىم. بۇل ماعان ءداستۇرلى وقىتۋ شەڭبەرىنەن شىعىپ, وقۋشىلارعا كۇردەلى تاقىرىپتاردى تۇسىنىكتى جانە قىزىقتى جەتكىزۋدىڭ جولىن تابۋعا مۇمكىندىك بەردى. وقۋشىلارىمنىڭ فيزيكانى تالقىلاپ, ءوز ويلارىمەن ءبولىسىپ, ءتىپتى ەكسپەريمەنت ءۇشىن جاڭا يدەيالار ويلاپ تاۋىپ جاتقانىن كورۋ مەن ءۇشىن ەرەكشە قۋانىش بولدى», دەيدى 2023 جىلعى بايقاۋدىڭ جەڭىمپازى, فيزيكا ءپانىنىڭ مۇعالىمى حايدار مىرزاحمەتوۆ.
بايقاۋعا TikTok-تا تانىمدىق كونتەنت جاسايتىن نەمەسە ونى باستاعىسى كەلەتىن مەكتەپ مۇعالىمدەرى مەن كوللەدجدەر, جوعارى وقۋ ورىندارىنىڭ وقىتۋشىلارى قاتىسادى. قاتىسۋشىلار 4 قاراشا - 3 جەلتوقسان ارالىعىندا پلاتفورمادا ءوز ءپانى بويىنشا قىسقا تانىمدىق بەينەروليكتەر جاريالاۋى قاجەت. روليكتەردىڭ ۇزاقتىعى كەمىندە 30 سەكۋند بولۋى كەرەك. سونداي-اق #قازاقستانمۇعالىمدەرى حەشتەگىنىڭ كورسەتىلۋى ماڭىزدى.
بيىل ۇلتتىق بايقاۋدىڭ ءۇش جەڭىمپازى بولادى. ولار كريتەريلەر جيىنتىعى نەگىزىندە, سونىڭ ىشىندە لايك, قارالىم سانى, بەينەروليك ساپاسى جانە وقىتىلاتىن پانگە سايكەستىگى نەگىزىندە باعالانادى.
بايقاۋ جەڭىمپازدارى iPhone 16 Pro سمارتفوندارىنا يە بولادى, بۇل ولارعا ودان دا جاقسى بەينەكونتەنت جاساۋعا كومەكتەسەدى.
