سونداي شارالاردىڭ ءبىرى, ۇقك شەكارا قىزمەتى الماتى وبلىسى بويىنشا دەپارتامەنتىنە قاراستى قاراساي اۋدانى شەكارا باسقارماسىنىڭ اقجارداعى تەحنيكالىق جانە كاسىبي-دايارلىق بولىمىندە ءوتتى. جاس جاۋىنگەر سىنىن ءساتتى ەڭسەرگەن 500-دەن اسا جاس ساربازدى دەپارتامەنت باستىعى پولكوۆنيك ءا.كايۋپوۆ, «گەنەرالدار كەڭەسى» رەسپۋبليكالىق قوعامدىق بىرلەستىگىنىڭ توراعاسى وتستاۆكاداعى گەنەرال-لەيتەنانت ب.سارسەكوۆ, قازاقستان رەسپۋبليكاسى ماس-رەستلينگ (تاياق تارتۋ) فەدەراتسياسىنىڭ ۆيتسە-پرەزيدەنتى ت.قاناليەۆ, زاپاستاعى پولكوۆنيك د.مامىرحانوۆ باستاعان شەكاراشى ارداگەرلەر قۇتتىقتادى.
ۇقك شەكارا قىزمەتىنىڭ الەۋمەتتىك جەلىدەگى رەسمي سايتى ارقىلى رەسپۋبليكا جۇرتشىلىعى تىكەلەي ەفيردەن تاماشالاعان ءراسىمنىڭ جوعارى دەڭگەيدە وتكەنىن, اتا-انالاردىڭ قۋانىشتى جۇزدەرىنەن بايقاۋعا بولادى. سولاردىڭ ءبىرى, 75 جاستاعى ب.دۇيسەعاليەۆا تۇڭعىش نەمەرەسىنىڭ ماڭىزدى قادامىنا ورتاقتاسۋ ءۇشىن باتىس قازاقستان وڭىرىنەن كەلىپتى.
«بۇگىن ەرەكشە كۇن, جاس ساربازدار انت قابىلداپ جاتىر. تاۋەلسىز ەلدىڭ شەكاراسىن قورعايتىن دا وسى جاستار. اعا بۋىن اتىنان ايتارىم, اتا-بابالارىمىزدان امانات بولىپ قالعان ۇلان-عايىر جەرىمىزدىڭ ءاربىر سۇيەمىن كوزدىڭ قاراشىعىنداي قورعاۋ, حالقىمىزدىڭ كەيىنگى ۇرپاققا ارتقان سەنىمدەرىن اقتاۋ وسى ۇلانداردىڭ قولىندا», دەيدى ءوزىنىڭ سانالى عۇمىرىن ەلىمىزدىڭ قاۋىپسىزدىگىنە ارناعان «گەنەرالدار كەڭەسى» رەسپۋبليكالىق قوعامدىق بىرلەستىگىنىڭ توراعاسى بەكسۇلتان سارسەك ۇلى.
ايتۋ كەرەك, بۇگىن «سروچنيك 2.0» باعدارلاماسىنا قاتىسقان «كۇز-2023» شاقىرىلىمىنىڭ ەكى ساربازى, قاتارداعى جاۋىنگەرلەر ا.ارتىقجانوۆ پەن ە.تىلەۋبەككە دەپارتامەنت باستىعى پولكوۆنيك الىبەك كايۋپوۆ سەرتيفيكات تاپسىردى. بۇل سەرتيفيكاتتار قوس شەكاراشىنىڭ ەلىمىزدەگى وزدەرى تاڭداعان جوعارى وقۋ ورىندارىندا ءبىلىم الۋعا بەرىلگەن جولداما. سونداي-اق, بۇگىنگى شارا كەزىندەگى تاعى ءبىر ايشىقتى وقيعا, جاقىندا وقۋ ورتالىعىندا وتكەن «تاياق تارتۋ» سايىسىنىڭ جەڭىمپازى اتانعان بىرنەشە ساربازدى قر ماس-رەستلينگ (تاياق تارتۋ) فەدەراتسياسىنىڭ ۆيتسە-پرەزيدەنتى ت.قاناليەۆ ماقتاۋ قاعازى جانە مەدالمەن ماراپاتتادى.
ءارى قاراي, شارا شەكارا باسقارماسىنىڭ ارنايى ماقساتتاعى ۇتقىر ءىس-قيمىلدار توبىنىڭ جاۋىنگەرلىك ۇرىس قيمىلدارىنا ارنالعان ساحنالىق كورىنىستەرىنە ۇلاستى. وتانىن قورعاۋ ءۇشىن وتتان دا, سۋدان دا تايسالمايتىن سايىپقىرانداردىڭ ساپتىق الاڭداعى ءابجىل قيمىلدارى ولاردىڭ الدىڭعى شەپتە جۇرەر الداسپان جاساق, اسكەر ەليتاسى ەكەنىن پاش ەتىپ تۇردى. سونداي-اق, ۇقك شەكارا قىزمەتى قىزمەتتىك كينولوگيا باسقارماسىنىڭ كينولوگتارى جۇرتشىلىقتىڭ الدىندا شەبەرلىك ءدارىسىن كورسەتتى. يەسىنىڭ ءاربىر بۇيرىعىن قالت ەتكىزبەي ورىنداعان شەكاراشى يتتەردىڭ ونەرى كوپشىلىكتى ءتانتى ەتتى.
مىنە, جاس ازاماتتاردىڭ ومىرىندەگى ماڭىزدى ساتتەردىڭ بىرىنە اينالعان انت قابىلداۋ راسىمىنەن كەيىن ساربازدار اتا-انا, تۋعان-تۋىستارىمەن قاۋىشىپ, مارە-سارە بولدى. «شەكاراشى بولدىم, مىنەكي» دەگەن ماقتانىشتى جۇزدەرىنەن «جاسىرا» الماعان بولاشاق ەل قورعاندارى دا وسىناۋ ءساتتى قالاي اسىعا توستى, دەسەڭىزشى؟!
تامارا داۋلەتباەۆا,
ۇقك شەكارا قىزمەتىنىڭ زاپاستاعى پودپولكوۆنيگى
