ءبىرىنشى وقىلىمدا دەپۋتاتتارعا ءبىلىم بەرۋ جانە بالانىڭ قۇقىقتارىن قورعاۋ ماسەلەلەرى بويىنشا ۇكىمەتتىڭ تۇزەتۋلەرى مەن اسكەري-پاتريوتتىق تاربيەگە قاتىستى پارلامەنت دەپۋتاتتارى ۇسىنعان زاڭ جوباسىن قاراۋ ۇسىنىلادى. بۇل زاڭ جوباسىندا جەتىم بالالار مەن اتا-اناسىنىڭ قامقورلىعىنسىز قالعان بالالاردى بالامالى تۇردە كاسىبي قابىلداۋشى وتباسىنا ورنالاستىرۋ كوزدەلەدى. بالالار انىقتالعان ساتتەن باستاپ مۇنداي وتباسىنا بالالار ۇيىنە جىبەرىلمەي-اق, قامقورشى نەمەسە قورعانشى ورگان مەن قابىلداۋشى تاربيەشىلەر اراسىنداعى كەلىسىمشارت نەگىزىندە بەرىلەدى.
اسكەري-پاتريوتتىق تاربيە ماسەلەلەرى جونىندەگى دەپۋتاتتار باستاماشى بولعان زاڭ جوباسى ازاماتتاردى اسكەري-پاتريوتتىق تاربيەلەۋدىڭ بىرىڭعاي جۇيەسىن قۇرۋعا جانە وسى جۇمىسقا بارلىق مەملەكەتتىك ورگان مەن ۇيىمدى تارتۋعا باعىتتالعان. وسى ماقساتتا قورعانىس مينيسترلىگى مەن جەرگىلىكتى اتقارۋشى ورگاندار جانىنان اسكەري-پاتريوتتىق تاربيە جونىندەگى ۇيلەستىرۋ كەڭەستەرىن قۇرۋ ۇسىنىلادى. بۇعان قوسا ازاماتتارعا اسكەري جيىندارعا شاقىرتۋسىز جانە كۇندەلىكتى جۇمىستارىنان قول ۇزبەي-اق, تۇرعىلىقتى جەرىندە اسكەري وقۋ ورىندارىندا, ءبىلىم ۇيىمدارى جانىنداعى اسكەري كافەدرالاردا (فاكۋلتەتتەردە), سونداي-اق اسكەري-تەحنيكالىق مەكتەپتەردە اقىلى نەگىزدە اسكەري دايىندىقتان ءوتۋ مۇمكىندىگى بەرىلەدى. وقۋ جۇمىستان تىس ۋاقىتتا جانە وندىرىستەن قول ۇزبەي جۇرگىزىلەدى.
سونىمەن قاتار ءماجىلىس تاۋەلسىز مەملەكەتتەر دوستاستىعىنا قاتىسۋشى مەملەكەتتەردىڭ سىبايلاس جەمقورلىققا قارسى ءىس-قيمىلداعى ىنتىماقتاستىعى تۋرالى كەلىسىمدى راتيفيكاتسيالاۋ تۋرالى زاڭ جوباسىن جۇمىسقا الادى.
