الداعى بەيسەنبىدە سەنات دەپۋتاتتارى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە سوت جۇيەسىن رەفورمالاۋ جانە پروتسەستىك زاڭنامانى جەتىلدىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭدى قارايدى. بۇل زاڭعا دەپۋتاتتار باستاماشى بولدى. اتالعان قۇجات سوتتا قورعالۋ قۇقىعىن ىسكە اسىرۋدىڭ قۇقىقتىق كەپىلدىكتەرىن كۇشەيتۋگە جانە سوت تورەلىگىن ىسكە اسىرۋ ساپاسىن, سۋديالار كورپۋسىنىڭ كاسىبيلىگىن جانە ولاردىڭ جاۋاپكەرشىلىگىن ارتتىرۋعا باعىتتالعان ءتيىستى زاڭنامالىق تەتىكتەردى ازىرلەۋ ارقىلى سوت جۇيەسىن ودان ءارى جەتىلدىرۋدى كوزدەيدى.
سونداي-اق بيىلعى ماۋسىمدا قابىلدانعان «قازاقستان رەسپۋبليكاسىنىڭ كەيبىر كونستيتۋتسيالىق زاڭدارىنا وزگەرىستەر مەن تولىقتىرۋلار ەنگىزۋ تۋرالى» كونستيتۋتسيالىق زاڭ دەربەس كاسساتسيالىق سوتتار قۇرۋدى جانە ولاردىڭ سوت اكتىلەرىن قاراۋ جونىندەگى وكىلەتتىكتەرىن قاراستىرادى. وسىعان بايلانىستى زاڭ ارقىلى قىلمىستىق-پروتسەستىك كودەكسكە, ازاماتتىق پروتسەستىك كودەكسكە, اكىمشىلىك راسىمدىك-پروتسەستىك كودەكسكە, سونداي-اق باسقا دا بىرقاتار زاڭعا تۇزەتۋ ەنگىزىلەدى.
پالاتانىڭ ءىس-شارالار جوسپارىنا سايكەس سەناتورلار وسى اپتادا كەزدەسۋلەر وتكىزەدى. ولاردىڭ قاتارىندا اقمولا وبلىسىندا وتەتىن قۇقىق بۇزۋشىلىقتاردىڭ الدىن الۋ جانە قوعامدىق قاۋىپسىزدىكتى قامتاماسىز ەتۋگە, سونداي-اق قىزىلوردا وبلىسىندا ۇيىمداستىرىلاتىن اەروعارىش سالاسىن دامىتۋعا قاتىستى ماسەلەلەرگە ارنالعان كوشپەلى وتىرىستار بار.
سونىمەن قاتار سەنات كوميتەتتەرىنىڭ «پروكۋراتۋرا تۋرالى» كونستيتۋتسيالىق زاڭدى ىسكە اسىرۋ جونىندەگى وتىرىستارى, «ەڭبەك ادامى – ۇلتتىق ەكونوميكانىڭ ءوسۋى مەن ۇلت وركەندەۋىنىڭ نەگىزى» تاقىرىبىنا ارنالعان پارلامەنتتىك تىڭداۋعا دايىندىق اياسىندا اقمولا وبلىسىنىڭ ارشالى اۋدانىنا ساپار جانە قازاقستانداعى اگروونەركاسىپتىك كەشەن ونىمدەرىن قايتا وڭدەۋ ماسەلەلەرى بويىنشا مەملەكەتتىك ورگاندار باسشىلىعىمەن كەزدەسۋ جوسپارلانعان.
بۇعان قوسا بيۋرودا ماجىلىستەن كەلىپ تۇسكەن زاڭدار جۇمىس ءۇشىن تۇراقتى كوميتەتتەرگە ءبولىنىپ بەرىلدى.
