ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمەتىنشە, ەلىمىزدە 732,1 مىڭ مۇگەدەكتىگى بار ادام تۇرادى. ونىڭ ىشىندە 381,3 مىڭى ەڭبەككە قابىلەتتى جاستا. الەۋمەتتىك كودەكسكە سايكەس جەرگىلىكتى اتقارۋشى ورگاندار مۇگەدەكتىگى بار ادامدار ءۇشىن اۋىر جۇمىستارداعى, ەڭبەك جاعدايلارى زياندى, قاۋىپتى جۇمىستارداعى جۇمىس ورىندارىن ەسەپكە الماعاندا, جۇمىسشىلاردىڭ جالپى سانىنىڭ 2-4 %-نا دەيىن (جالدامالى جۇمىسكەرلەردىڭ جالپى سانى كەمىندە 50 ادام بولعان كەزدە) كولەمدە جۇمىس ورىندارىنا كۆوتا بولەدى. بيىلعى توعىز ايدا بولىنگەن كۆوتا ناتيجەسىندە مۇگەدەكتىگى بار 5,4 مىڭ ادام جۇمىسقا ورنالاستىرىلدى.
سونداي-اق ەرەكشە قاجەتتىلىگى بار ادامدار جۇمىسپەن قامتۋعا جاردەمدەسۋدىڭ شارالارىنا دا بەلسەندى قاتىسىپ كەلەدى. بيىلعى 1 قازانداعى كورسەتكىش بويىنشا تۇراقتى جۇمىسقا 5,9 مىڭ ادام ورنالاسسا, جاستار پراكتيكاسىنا – 505, الەۋمەتتىك جۇمىس ورىندارىنا – 654, قوعامدىق جۇمىستارعا – 5,9 مىڭ, «كۇمىس جاس» جوباسىمەن – 828, «العاشقى جۇمىس ورنى» جوباسىمەن – 183 ادام, «ۇرپاقتار كەلىسىمشارتى» جوباسىمەن 6 ادام جۇمىسپەن قامتىلدى.
مۇگەدەكتىگى بار ازاماتتاردىڭ اراسىندا قىسقامەرزىمدى كاسىپتىك وقىتۋعا – 272, «باستاۋ بيزنەس» جوباسى ارقىلى كاسىپكەرلىكتىڭ قىر-سىرىن مەڭگەرۋ كۋرسىنا 5 مىڭ ادام جازىلعان. حالىقتىڭ الەۋمەتتىك وسال توپتارىنا ەنەتىن ازاماتتارعا ءوز كاسىبىن اشىپ, شارۋاسىن جۇرگىزۋگە 400 اەك-كە دەيىنگى (1,4 ملن تەڭگە) مولشەرىندە مەملەكەتتىك گرانتتار بەرىلەدى. بۇگىندە وسى يگىلىكتى قولداۋدى مۇگەدەكتىگى بار 1 470 ادام كورىپ, كاسىبىن دوڭگەلەتىپ وتىر.
ەلىمىزدە 2018 جىلدان باستاپ حالىقارالىق تاجىريبە نەگىزىندە مۇگەدەكتىگى بار ادامدارعا ارنايى جۇمىس ورنىن جاراقتاندىرۋ قولعا الىندى. ناتيجەسىندە, جۇمىس بەرۋشىلەردىڭ شىعىندارىن سۋبسيديالاۋ ىسكە اسىرىلىپ, بيىل وسىنداي ارنايى 71 جۇمىس ورنى قۇرىلدى.
