كەزدەسۋگە تۇركيا رەسپۋبليكاسى پرەزيدەنت باسقارماسىنىڭ «مانساپ» ورتالىعى باسشىسى ساليم اتاي, الماتى قالاسىنداعى تۇركيا باس كونسۋلى ەنۆەر مۋدەرريسولۋ, تۇرىك فيرمالارى جانە مەكەمە وكىلدەرى, جاستار قاتىستى.
«مانساپ» ورتالىعىنىڭ باسشىسى ساليم اتاي 34 جىل بۇرىن العاش رەت قازاق جاستارىمەن كەزدەسكەنىن ەسكە الدى.
«سوناۋ 1990 جىلدارى ستۋدەنتتەر مۇعالىمدەرمەن بىرگە ەرىپ كەلگەن. سول كەزدە كامەلەت جاسقا تولعان جاستاردىڭ ۇستازدارىنىڭ جەتەگىندە جۇرگەنىن تۇسىنە الماي, تاڭ قالعانىمىز بار. بۇگىن ستۋدەنتتەردىڭ بولاشاعىن وزدەرى بولجاپ, الداعى جوسپارلارىن جاساۋعا تالپىنىستارى جوعارى ەكەنىن اڭعارىپ وتىرمىن. ولاردىڭ بويىنداعى تالاپ-تىلەكتەرىنىڭ ەركىن بولۋى حالىقارالىق دەڭگەيگە شىعۋعا دايىن ەكەنىن كورسەتەدى» دەدى.
الماتى قالاسىنداعى تۇركيا باس كونسۋلى ەنۆەر مۋدەرريسولۋ ءىس-شاراعا كەلگەن مەيماندار مەن جاستارعا ريزاشىلىعىن ءبىلدىردى.
«جىل سايىن ءار ءتۇرلى ەلدەردە ۇيىمداستىرىلاتىن TalentforBiz مانساپتىق جارمەڭكەسى الەمنىڭ ءار تۇكپىرىنەن كەلگەن تالانتتى جاستاردى حالىقارالىق ارەنادا جۇمىس ىستەيتىن تۇرىك كومپانيالارىنىڭ مانساپتىق مۇمكىندىكتەرى تۋرالى اقپاراتتاندىرۋ ماقساتىندا وتكىزىلەدى. بۇل ءبىزدىڭ كومپانيالار ءۇشىن دە, جاستار ءۇشىن دە جەتىستىككە جەتۋگە سەپتىگىن تيگىزەدى», دەدى.
ونىڭ سوزىنشە, شاراعا كەلگەن جاستار وزدەرىن قىزىقتىرعان ساۋالدارعا جاۋاپ الىپ, تۇرىكتىڭ تانىمال كومپانيالارىنىڭ وكىلدەرىمەن سۇحباتتاسۋ مۇمكىندىگىنە يە بولىپ وتىر. بۇدان باسقا, كومپانيا وكىلدەرى كەلۋشىلەرمەن ءتۇرلى پرەزەنتاتسيالار, اقپاراتتىق سەسسيالار جانە كىرىسپە كەزدەسۋلەر وتكىزىپ, ءوز كوزقاراستارىمەن بولىسەدى. ەگەر كومپانيا تالابى مەن جاستاردىڭ ءوتىنىشى ءبىر جەردەن شىقسا, جۇمىسقا ورنالاسۋعا جانە تاعىلىمدامادان وتۋگە وتىنىمدەر قابىلدانادى.
«وسىعان وراي مەن ءىس-شارادا وتە جوعارى برەند قۇندىلىعىمەن ۇسىنىلعان قۇرمەتتى كومپانيا وكىلدەرىنە جانە ەلىمىزدىڭ وسۋىنە, دامۋىنا جانە وركەندەۋىنە ەلەۋلى ۇلەس قوسىپ كەلە جاتقان بارلىق ىسكەر ادامدارىمىزعا العىسىمدى بىلدىرگىم كەلەدى. ءبىز قازىردىڭ وزىندە بارلىق سالالاردا, اسىرەسە ءبىلىم بەرۋ, ساۋدا جانە ەكونوميكا سالالارىندا بەرىك ورنىققان بايلانىستارىمىزدى ودان ءارى نىعايتىلعان ستراتەگيالىق سەرىكتەسىمىز باۋىرلاس قازاقستانمەن بايلانىستىرامىز, وسىلايشا ەكى ەل اراسىنداعى ىنتىماقتاستىق نىعايا تۇسەدى», دەدى ەلشى.
ونىڭ ايتۋىنشا, ەكونوميكالىق سالادا ەكى ەلدىڭ ساۋدا كولەمى 1992 جىلى نەبارى 100 ميلليون دوللاردى قۇرادى. بىلتىر جىل سوڭىنا قاراي بۇل سوما 6 ميلليارد دوللاردان اسقان. قوس مەملەكەتتىڭ ورتاق ماقساتى – ەكىجاقتى ساۋدا كولەمىن قىسقا مەرزىمدە 10 ميلليارد دوللارعا دەيىن ارتتىرۋ. ساۋدا مەن ينۆەستيتسيانىڭ ماڭىزدى بولىگى الماتى قالاسى مەن وبلىسىنا تيەسىلى. تۇرىك ازاماتتارىنىڭ باسىم كوپشىلىگى الماتىدا تۇرادى.
«پرەزيدەنتىمىزدىڭ باسشىلىعىمەن ءبىز ەكىجاقتى قارىم-قاتىناستارىمىزدى ودان ءارى نىعايتۋدىڭ جولدارىن ىزدەپ كەلەمىز. ونىڭ مىسالى, بۇگىنگى ءىس-شاراداعىداي تەحنولوگيامەن قامتاماسىز ەتىلگەن مۇمكىندىكتەردى پايدالانۋعا جول اشۋ. سوندىقتان ىنتىماقتاستىقتىڭ ماڭىزدى مۇمكىندىگى رەتىندە كورمەمىزدىڭ جەمىستى جانە تابىستى بولۋىن تىلەيمىن», دەپ تۇيىندەدى ءسوزىن ەنۆەر مۋدەرريسولۋ.
ايتا كەتۋ كەرەك, قوس ەلدىڭ ىنتىماقتاستىعىن ارتتىرۋعا باعىتتالعان كورمەگە Turkish Airlines, Turkish Aerospace Industries, Aselsan, Havelsan, Halk Bankası, Türk Telekom سياقتى ءتۇرلى سالالارداعى جەتەكشى تۇرىك كومپانيالارى, سونداي-اق قازاقستاندا جۇمىس ىستەيتىن Abdi İbrahim, Esan Eczacıbaşı, Ziraat Bankası جانە Pro Yapı سياقتى كومپانيالار قاتىستى.
كومپانيا وكىلدەرى مەن قازاقستاننىڭ جاستارى تۇركيانىڭ كادر رەسۋرستارىن قۇرۋ جانە نىعايتۋ سالاسىنداعى تاجىريبەسى مەن جەتىستىكتەرى تۋرالى ەگجەي-تەگجەيلى ماعلۇمات الىپ, قوس ەلدەگى پەرسپەكتيۆالى جاستاردىڭ مانسابىن دامىتۋعا ايتارلىقتاي ۇلەس قوسىپ كەلەدى.
