بۇل ۆيزا زاماناۋي كوشپەلىلەرگە - ساياحاتتاپ, قاشىقتان جۇمىس ىستەيتىن شەتەلدىك تۋريستەرگە ارنالعان. جاڭا ۆيزالىق رەجيم پاندەميادان كەيىن وسىنداي باعدارلامالاردى ءساتتى ەنگىزگەن 50-دەن استام ەلدىڭ حالىقارالىق تاجىريبەسىن نازارعا العان.
Neo Nomad ۆيزاسىن الۋ ءۇشىن شەتەلدىك ازامات قازاقستاننان تىس جەردە تۇراقتى كىرىسىنىڭ بار ەكەنىن دالەلدەۋى كەرەك, ونىڭ مولشەرى ايىنا كەمىندە 3 000 اقش دوللارى بولۋى كەرەك. سونىمەن قاتار نەگىزگى كىرىس تالاپتارىنان باسقا, شەتەلدىك ءوتىنىش بەرۋشىدەن مەديتسينالىق ساقتاندىرۋ جانە سوتتىلىعىنىڭ جوق ەكەنى تۋرالى انىقتاما تالاپ ەتىلەدى.
ۆيزا قاشىقتان جۇمىس ىستەيتىن تۋريستەرگە, ياعني باعدارلامالاۋ, ماركەتينگ, قارجى, كونسالتينگ, ديزاين جانە ەلەكتروندى كوممەرتسيا سياقتى ءتۇرلى سالالاردا قىزمەت ەتەتىن شەتەلدىك ازاماتتارعا ارنالعان. ۆيزا يەلەرىنىڭ ءبىر جىلعا دەيىن قازاقستاندا تۇرۋعا مۇمكىندىگى بار. وسى ۋاقىت ىشىندە ولار شەتەلدىك كومپانيالاردا جۇمىس ىستەي الادى. بۇل شەتەلدىك تۋريستەرگە قازاقستان مادەنيەتى مەن تۇرمىسىن جاقىنىراق تانۋعا مۇمكىندىك بەرسە, ەلگە ەكونوميكالىق پايدا اكەلەدى دەپ جوسپارلانىپ وتىر.
ۆيزا ەنگىزىلگەن جاعدايدا جىلىنا 500 ادام ونى السا, ەكونوميكالىق اسەر شامامەن 3,6 ميلليارد تەڭگە بولادى دەپ بولجانىپ وتىر. Neo Nomad ۆيزاسىن پايدالاناتىن شەتەلدىك ازاماتتار قازاقستاندا تۇرىپ, قاراجاتىن وسىندا جۇمسايدى, بىراق وتاندىق ەڭبەك نارىعىنا اسەر ەتپەيدى.
