اتالعان كەش ۇلتتىق مادەنيەتىمىزدىڭ ەڭ باي ءارى كورنەكتى قازىنالارىن دارىپتەيتىن ماڭىزدى مادەني ءىس-شارا بولدى. وعان ەلىمىزدىڭ ۇزدىك ارتىستەرى مەن ونەر قايراتكەرلەرى قاتىسىپ, قازاق حالقىنىڭ بي جانە مۋزىكا ونەرىنىڭ وزىق ۇلگىلەرىن ۇسىندى. كونتسەرت كورەرمەندەردى حالقىمىزدىڭ مادەني مۇراسىنىڭ التىن قورىنا ساياحات جاساتىپ, قازاقتىڭ ءبيى مەن كۇيىنىڭ ەرەكشە ۇندەستىگىن تانىستىردى. ءار شىعارمادا ۇلتتىق بي ءداستۇرىنىڭ كەرەمەت شەبەرلىگى مەن كومپوزيتورلاردىڭ ءتول تۋىندىلارىنىڭ ۇيلەسىمدىلىگى ايقىن كورىنەدى.
كەش باعدارلاماسىنا حالقىمىزدىڭ اتاقتى كومپوزيتورلارىنىڭ شىعارمالارى مەن ۇلتتىق بيلەرى ەنگەن. قۇرمانعازى, سۇگىر, تاتتىمبەت, نۇرعيسا تىلەنديەۆ, كەنجەبەك كۇمىسبەكوۆ سىندى ۇلى تۇلعالاردىڭ كۇيلەرى «شالقىما» حالىق بي ءانسامبلى مەن «سارىارقا» حالىق مۋزىكا ءانسامبلىنىڭ شەبەر ورىنداۋىندا كورەرمەن نازارىنا ۇسىنىلدى. كونتسەرتتەگى بي نومىرلەرىن قويۋشى شەبەرلەر – قازاق كسر حالىق ءارتىسى شارا جيەنقۇلوۆا, قازاقستاننىڭ حالىق ءارتىسى زاۋىربەك رايباەۆ, قازاقستاننىڭ ەڭبەك سىڭىرگەن ءارتىسى جانات بايدارالين, باسقا دا تانىمال حورەوگرافتار. ولار ءار شىعارمانىڭ تەرەڭ فيلوسوفياسىن, ۇلتتىق بي ونەرىنىڭ سۇلۋلىعى مەن ۇيلەسىمىن كورەرمەنگە جەتكىزە العانى انىق.
اتالعان كەش قازاق مادەنيەتىنىڭ بايلىعى مەن سۇلۋلىعىن دارىپتەپ, حالقىمىزدىڭ رۋحاني مۇراسىنىڭ ءمان-ماڭىزىن اشۋعا باعىتتالعان. «التىن قور – بي قازىناسى» جوباسى قازاقتىڭ بي جانە كۇي ونەرىن ءبىر ساحنادا ۇندەستىرۋ ارقىلى ۇلتتىق مۇرانى زاماناۋي كورەرمەندەرگە جاقىن ەتىپ جەتكىزەدى. وسىلايشا, قازاق مادەنيەتىنىڭ كوپقىرلى جانە باي مۇراسىنا دەگەن قىزىعۋشىلىقتى ارتتىرىپ, وسكەلەڭ ۇرپاقتى ۇلتتىق ونەرگە باۋلۋعا مۇمكىندىك بەرگەنى ءسوزسىز.
