پرەزيدەنت قۇتتىقتاۋىندا وتانداستارىمىز جازۋشىنى ءوزىنىڭ بىرەگەي قولتاڭباسىمەن قالىڭ وقىرماننىڭ جۇرەگىنەن ورىن العان قارىمدى قالامگەر, دارىندى دراماتۋرگ رەتىندە قۇرمەتتەيتىنى اتاپ وتىلگەن.
ء«سىز كوپ جىل بويى ۇلتتىق ادەبيەتىمىز بەن مادەنيەتىمىزدى وركەندەتۋگە سۇبەلى ۇلەس قوسىپ كەلەسىز. قالامىڭىزدان شىققان تارتىمدى تۋىندىلارعا زاماننىڭ ءۇنى, قوعامنىڭ تىنىسى جانە ادامداردىڭ جان دۇنيەسى مەن اسىل قاسيەتتەرى ارقاۋ بولدى. ءسىزدىڭ قولتاڭباڭىزدا قايسار مىنەزدى ابزال انا, قايراتكەر ايەل بەينەسىن جاساۋداعى سۋرەتكەرلىك شەبەرلىگىڭىز انىق بايقالادى. «ماڭگىلىك بالا بەينە», «فاريزا», «بوپاي حانىم» جانە باسقا درامالىق شىعارمالارىڭىز تەاتر ساحناسىندا قويىلىپ, كورەرمەن تاراپىنان جوعارى باعاسىن الدى. الداعى ۋاقىتتا وقىرمانداردى جاڭا تۋىندىلارىڭىزبەن قۋانتا بەرۋىڭىز ءۇشىن سىزگە شىعارماشىلىق شابىت تىلەيمىن», دەلىنگەن مەملەكەت باسشىسىنىڭ قۇتتىقتاۋىندا.
م.اشىمباەۆ ءوز سوزىندە ر.مۇقانوۆانىڭ شىعارماشىلىعى قازاق ادەبيەتىنىڭ قازىناسىنا اينالعان ناعىز كلاسسيكا ەكەنىن اتاپ ءوتتى. قالامگەردىڭ تۋىندىلارى مەن كوپتەگەن پەساسى وقىرمان قاۋىمنىڭ جوعارى باعاسىن الىپ, شەتەلدەردە دە مويىندالعانى بەلگىلى. وعان جازۋشى شىعارمالارىنىڭ حالىقارالىق فەستيۆالدەردە العان جۇلدەلەرى ايقىن دالەل.
«روزا مۇقانوۆانىڭ تۋىندىلارىندا ايەل تاعدىرى ايرىقشا ورىن الادى. سونداي-اق قالامگەر رۋحاني ماسەلەلەرگە نازار اۋدارىپ, ادامگەرشىلىك, ىزگىلىك, مەيىرىمدىلىك سياقتى دۇرىس قۇندىلىقتاردى دارىپتەۋگە باسىمدىق بەرەدى. شىعارمالارىنىڭ باسىم بولىگى شەتەلدەردە دە كەڭىنەن تانىمال. ولاردىڭ كوبى تەاتر ساحنالارىندا قويىلىپ ءجۇر. وسىلايشا, روزا قاجىعالىمقىزى ءوز تۋىندىلارى ارقىلى قازاق دراماتۋرگياسى مەن مادەنيەتىن دامىتۋعا ۇلكەن ۇلەس قوستى», دەگەن م.اشىمباەۆ جازۋشىعا زور دەنساۋلىق, باق-بەرەكە جانە سارقىلماس شابىت تىلەدى.
سونىمەن قاتار ءىس-شارا بارىسىندا زيالى قاۋىم وكىلدەرى, قالامگەرلەر جانە قوعام قايراتكەرلەرى ءسوز سويلەپ, مەرەيتوي يەسىنىڭ شىعارماشىلىق ءومىرى تۋرالى ايتتى جانە جىلى لەبىزىن ءبىلدىردى.
