اقتاۋ قالاسى اكىمدىگىنىڭ حابارلاۋىنشا, قازىرگى تاڭدا تۇرعىنداردى جىلۋ, ىستىق سۋمەن ۇزدىكسىز قامتاماسىز ەتۋ ماقساتىندا 11,3 شاقىرىم قۇبىر اۋىستىرىلعان, بۇل جۇمىستارعا 17 ملرد تەڭگە بولىنگەن. اقتاۋدا جۇمىستاردىڭ جۇرگىزىلۋىنە بايلانىستى شاعىن اۋدانداردا ءىشىنارا كەدەرگى بولعانمەن, جالپى جىلۋ بەرۋ ماۋسىمى 15 قازاندا باستالدى.
– بۇعان دەيىن وبلىس اكىمدىگىنىڭ telegram-ارناسىندا تۇرعىنداردىڭ جىلۋ جوقتىعىنا قاتىستى پىكىرلەرى كوبەيىپ كەتكەن ەدى, ال قازىر تۇرعىندار كوممۋنالدىق قىزمەتكەرلەرگە العىس ايتىپ جاتىر. مىسالى, ءتورت بالانىڭ اناسى, وبلىس ورتالىعىنداعى 28-شاعىن اۋدان تۇرعىنى تىلەكتەس ىبىراەۆا: ء«ۇي جىلى. باسقا اۋدانداردا تۇراتىن دوستارىمنان دا سۇرادىم. بارلىعىندا جىلۋ بار. ءيا, كەيبىر ۇيلەردە ادامدار ءالى كۇتىپ وتىر, بىراق كوممۋنالدىق قىزمەتكەرلەر تۇرعىنداردى جىلۋمەن تولىقتاي قامتاماسىز ەتۋ جولىندا كۇنى-ءتۇنى جۇمىس ىستەپ جاتىر, مەنىڭشە, بۇگىن-ەرتەڭ جىلۋ بەرىلەدى. سوندىقتان قالاداعى تۇرعىنداردىڭ ءبارى جىلۋسىز وتىرعانى جونىندەگى اقپاراتتىڭ شىندىققا جاناسپايتىنىن ايتقىم كەلەدى», دەدى, اقتاۋ قالاسىنىڭ تۇرعىنى الەۆتينا گولوۆينا: «مەن 5-شاعىن اۋداندا تۇرامىن. ءبىزدىڭ ۇيگە 19 قازاندا جىلۋ كەلدى. بۇعان دەيىن اقاۋلار بولدى. ول كەزدە اپاتتىق بريگادالاردىڭ ولاردى جويۋ ماقساتتا جۇمىس اتقارىپ جاتقانىن ءبارىمىز كوردىك. انام كورشى ۇيدە تۇرادى, ولارعا جىلۋ بىزدەن دە ەرتە بەرىلدى», دەيدى. ال زەينەتكەر گۇلميرا يساەۆا ءبىر اپتا شاماسىندا كۇتكەن سوڭ قالاداعى 19-شاعىن اۋدانعا جىلۋ بەرىلگەندىگىن, تۇرعىندارعا اقاۋلار جويىلعان بويدا ۇيلەرىنە جىلۋ بىردەن كەلەتىنى جونىندە ۇنەمى قۇلاقتاندىرىلىپ, قازىردە پاتەرى جىلى عانا ەمەس, قاتتى ىستىقتان تەرەزەلەردى اشىپ وتىرعاندىعىن ايتتى», دەيدى ماڭعىستاۋ وبلىستىق ىشكى ساياسات باسقارماسى اقپاراتتىق ساياسات ءبولىمىنىڭ باسشىسى ر.جۇبانازاروۆ.
ءبولىم باسشىسىنىڭ ايتۋىنشا, ماڭعىستاۋ وبلىسى اكىمدىگىنىڭ Telegram-ارناسى تۇرعىندارعا جەلىدەگى اقاۋلار مەن ولاردىڭ جويىلۋ جۇمىستارى تۋرالى اقپارات الۋعا ارنالعان الاڭعا اينالعان. تۇرعىندار وزدەرىنىڭ ماڭايىنداعى اقاۋلار تۋرالى اقپاراتتى جەدەل جىبەرۋ ارقىلى كوممۋنالدىق قىزمەتكەرلەرگە كومەكتەسەدى. كەيبىر تۇرعىندار ۇيدە جىلۋ بەرىلگەنىن, بىراق كەيبىر پاتەردە, ءتىپتى بولمەلەردە جىلۋ جوق ەكەنىن جەتكىزىپ جاتىر. تۇرعىن ءۇي-كوممۋنالدىق شارۋاشىلىق سالاسىنىڭ ماماندارى قازىر ىشكى جۇيەلەردى رەتتەۋدى قىزمەت كورسەتۋ ۇيىمدارىنىڭ قىزمەتكەرلەرى – وسي نەمەسە كسك جۇرگىزەتىنىن اتاپ ءوتتى.
اقتاۋ قالاسى اكىمدىگى 26 قازانعا قاراي الەۋمەتتىك نىسانداردىڭ 97%-ى (115-ءتىڭ 112-ءسى) جىلۋمەن قامتاماسىز ەتىلگەنىن, ال قالاداعى 1500 تۇرعىن ءۇيدىڭ 34-ىندە جىلۋ جوق ەكەنىن حابارلادى.
– جاز بويى نەگىزگى جىلۋ جۇيەلەرى اۋىستىرىلدى. بۇل وتكەن جىلدارداعىداي جىلۋ مەن ىستىق سۋ بەرۋدە ءۇزىلىس بولماۋى ماقساتىندا جاسالدى. جەلىلەردىڭ ابدەن توزۋى سالدارىنان جوندەۋ ەمەس, تولىق اۋىستىرۋ جونىندە شەشىم قابىلداندى. اۋقىمدى اۋىستىرۋ قازان ايىندا اياقتالدى. وسى ۋاقىتقا دەيىن قۇبىرلار قۇرعاق بولعاندىقتان, سىناقتاردى وتكىزۋ مۇمكىن ەمەس. سۋ بەرىلىسىمەن ىشكى جەلىلەردىڭ توزۋى 79% بولۋىنا بايلانىستى جارىلىستار باستالدى. الەۋمەتتىك جەلىلەردە قالانى سۋىق الىپ جاتىر دەگەن شاعىمداردى ءجيى ەستيمىن. ۇيلەردىڭ باسىم كوپشىلىگى جىلۋمەن قامتاماسىز ەتىلگەن. اپات بولعان ۇيلەردە قازىرگى ۋاقىتتا جەدەل توپتار اقاۋلاردى جويۋ جۇمىستارىن جۇرگىزىپ جاتىر, – دەدى اقتاۋ قالاسىنىڭ اكىمى ابىلقايىر بايپاقوۆ.
جىلىتۋ ماۋسىمى باستالعالى شاعىن اۋداندارداعى جەلىلەردە 121 جارىلىس تىركەلىپ, ونىڭ 100-ءى جوندەلدى. بۇگىنگى تاڭدا اقاۋلاردى جويۋدا 110 ادام مەن 49 تەحنيكا جۇمىس ىستەپ جاتىر. اقتاۋ قالاسىنىڭ كوممۋنالدىق قىزمەتكەرلەرىنە كومەك رەتىندە جاڭاوزەن قالاسىنان 8 بريگادا كەلدى. تۇرعىنداردىڭ ۇيلەرىنە جىلۋ جەتكىزۋ جونىندەگى توتەنشە جاعداي بريگادالارى كۇندىز-ءتۇنى جۇمىس ىستەيدى. ال قالالىق كاسىپكەرلەر كوممۋنالدىق جۇمىسشىلاردى قولداۋ ماقساتىندا ىستىق شاي مەن ءبالىش ۇسىنادى.
«وزەنمۇنايسەرۆيس» مەكەمەسىنىڭ دانەكەرلەۋشىسى قازيحان بايبوزوۆتىڭ ايتۋىنشا, اقتاۋعا جاڭاوزەن قالاسىنان «وزەنمۇنايسەرۆيس» كومپانياسىنىڭ سەگىز جۇمىس توبى كەلگەن. ولار جەرگىلىكتى ماماندارعا ءار شاعىن اۋدانداعى جارىلعان جەرلەردى جويۋعا كومەكتەسىپ جاتىر.
اقتاۋدا قىس قارساڭىندا قاربالاس جۇمىس. قىر استىنداعى قاھارلى ماۋسىمنان قىسىلماي, جايلى-كۇيلى شىعۋ – بارشاعا قاجەتتى جاعداي.
ماڭعىستاۋ وبلىسى
