سۋرەت: El.kz/ميراجان ماحان
كونسۋلدىقتىڭ باستى ماقساتى – ەكى ەلدىڭ مەملەكەتتىك قۇرىلىمدارى مەن بيزنەس سالاسىنداعى ءوزارا بايلانىستى ارتتىرىپ, ينۆەستيتسيا جانە ساۋدا قاتىناستارىن دامىتۋ. اتاپ ايتساق, بۇل ەكىجاقتى ەكونوميكالىق, مادەني قاتىناسقا باعىتتالعان, سونداي-اق ەلىمىزدەگى سينگاپۋر ازاماتتارىنىڭ مۇددەسىن قورعايدى. قازىر ەل اۋماعىندا 100-دەن اسا سينگاپۋرلىق كومپانيا جۇمىس ىستەيدى. كونسۋلدىق ولاردىڭ قۇقىقتارىن قورعاپ, كەڭەس بەرەدى.
سونىمەن قاتار سينگاپۋر رەسپۋبليكاسىنىڭ قازاقستانداعى ەلشىسى زۋلكيفلي باحارۋدين استانا مەن الماتىدا اشىلعان كونسۋلدىق دوستىق پەن ارىپتەستىككە نەگىزدەلگەن قارىم-قاتىناستى نىعايتا تۇسەدى دەپ سەنىم ءبىلدىردى.
– سينگاپۋر مەن قازاقستان 30 جىلدان اسا ۋاقىت ءوزارا ءتيىمدى ىسكەرلىك بايلانىس جۇرگىزىپ كەلەدى. ءبىز تۋريزم, بيزنەس, لوگيستيكا, اۋىل شارۋاشىلىعى, قۇرىلىس جانە مادەنيەت سالاسىندا بىرىككەن جوبالاردى بىرىگىپ ىسكە اسىرۋعا مۇددەلىمىز. قازىر قازاقستان – ورتالىق ازياداعى ەڭ ءىرى ساۋدا ارىپتەسىمىز. تابيعي رەسۋرستارعا باي جانە ورتالىق ازياعا جول اشار ەل رەتىندە قازاقستان سينگاپۋرعا مول مۇمكىندىك ۇسىنىپ وتىر, – دەدى ەلشى كونسۋلدىقتىڭ سالتاناتتى اشىلۋ راسىمىندە.
ەكى ەلدىڭ سىرتقى ىستەر مينيسترلىكتەرىنىڭ كەلىسىمىمەن ەلىمىزدىڭ ەكى قالاسىنداعى سينگاپۋردىڭ قۇرمەتتى كونسۋلى قىزمەتىنە تالعات چينيكەەۆ تاعايىندالدى. ول حالىقارالىق بيزنەس پەن ىنتىماقتاستىق سالاسىنداعى مول تاجىريبەسىمەن ەرەكشەلەنەدى.
– ەڭ الدىمەن ەكى ەل اراسىنداعى بەرىك دوستىق پەن ءوسىپ كەلە جاتقان سەرىكتەستىكتى نازارعا الا وتىرىپ, سينگاپۋردىڭ اتىنان وكىلدىك ەتۋدى, ونىڭ ەلىمىزدەگى ەكونوميكالىق جانە مادەني مۇددەلەرىن ىلگەرىلەتۋدى ماقتان تۇتامىن. «العا سينگاپۋر» جانە ء«ادىل قازاقستان» تۇجىرىمداماسىنىڭ قوعامدى بەرىك جانە ىنتىماقتا ۇستاۋ, سونداي-اق دامۋدىڭ جەتىستىكتەرىمەن ءبولىسۋ سياقتى ستراتەگيالىق نۇسقاۋلار مەن جالپىۇلتتىق قۇندىلىقتار رەتىندە كوپتەگەن ۇقساستىقتارى بار. قازىر «قازاقستان تەمىر جولىمەن» سينگاپۋردىڭ ءىرى كومپانياسى بىرىگىپ, اۋقىمدى جوبانى جۇزەگە اسىرىپ جاتىر. الماتى وبلىسىندا «الاتاۋ سيتي» دەگەن قالا سالىنباقشى. الماتىدان قوناەۆ قالاسىنا دەيىن 900 شارشى مەتر اۋماقتا بوي كوتەرەتىن ۇلكەن قالانىڭ باس جوسپارىن سينگاپۋردىڭ كومپانياسى جاساپ بەردى, – دەدى سينگاپۋردىڭ قازاقستانداعى قۇرمەتتى كونسۋلى تالعات چينيكەەۆ.
