«استانا سازى» قازاق مەملەكەتتىك فولكلورلىق ءانسامبلى – ەلىمىزدىڭ جەتەكشى شىعارماشىلىق ۇجىمدارىنىڭ ءبىرى. فولكلورلىق انسامبل مۋزىكانتتارى تىڭداۋشىلاردى دومبىرا, قوبىز, شەرتەر, شاڭقوبىز, سازسىرناي, سىبىزعى, اساتاياق, داۋىلپاز, تۇياقتاس, قوڭىراۋ, ت.ب. حالىق مۋزىكالىق اسپاپتارىنىڭ ۇنىمەن تانىستىرىپ كەلەدى. ءانسامبلدىڭ كوركەمدىك جەتەكشىسى – نۇركەن ياقياەۆ.
انسامبل وتاندىق مۋزىكا سالاسىندا وزىندىك ورنى بار, كورەرمەن تاراپىنان زور سۇرانىسقا يە ۇزدىك ۇجىم رەتىندە «قازاقكونتسەرتتىڭ» برەندىنە اينالدى. «استانا سازى» تىڭداۋشىلارعا حالىق شىعارماشىلىعىنىڭ ۇلتتىق بوياۋىن ساقتاي وتىرىپ, زاماناۋي وڭدەۋلەرىن ۇسىنىپ ءجۇر.
«استانا سازى» ءانسامبلىنىڭ رەپەرتۋارى ءتۇرلى حالىقتىڭ ءداستۇرلى اسپاپتىق مۋزىكاسىنا جانە زاماناۋي اۆتورلىق شىعارمالارعا باي. ۇجىم ارتىستەرى تاجىكستان, وزبەكستان, قىرعىزستان, تاياۋ شىعىس ەلدەرىندە ونەر كورسەتىپ, كوپتەگەن ءىس-شاراعا بەلسەندى قاتىسىپ كەلەدى.
قازاق حالىق شىعارماشىلىعىنىڭ دامۋىنا, دارىپتەلۋىنە زور ۇلەس قوسىپ جۇرگەن انسامبل جينالعان قاۋىم نازارىنا ۇلتتىق ونەرىمىزدىڭ جاۋھارلارى مەن ءوز رەپەرتۋارىنداعى تانىمال شىعارمالارىن ۇسىندى. بۇل رۋحاني كەش – مادريد قالاسىنداعى ەرەكشە مادەني وقيعا عانا ەمەس, سونىمەن قاتار قازاقستان مەن يسپانيا اراسىنداعى شىعارماشىلىق بايلانىستاردى نىعايتۋعا باعىتتالعان ماڭىزدى قادام بولعانى ءسوزسىز.
