ارينە, وراق ەندى باستالعان تامىزدىڭ ەكىنشى جارتىسىنان بەرى ۇزىلمەي تۇرىپ العان نوسەر سالدارىنان استىق جينالماس دەگەن قاۋىپ بولعانى راس. تالاي ديقانداردىڭ قاباعى ءتۇيىلىپ, سويلەسۋگە دە زاۋقى سوقپاي قالعان ەدى. ءتىپتى بيداي ساباعىنان ءورىپ كەتە مە دەگەن دە قاۋىپتى جورامال دا جاسالدى. ايتەۋىر قىركۇيەكتىڭ باسىنان تۇرعان اشىق كۇندەر استىقتى جيناپ الۋعا مۇمكىندىك بەردى-اۋ.
وبلىستىق اۋىل شارۋاشىلىعى باسقارماسىنىڭ مالىمەتى بويىنشا, بيدايدىڭ وبلىستاعى ورتاشا بەرەكە گەكتارىنا 18 تسەنتنەردەن اينالعان. ال ۇقىپتى شارۋالار كەيبىر ەگىس القابىنان 40-50 تسەنتنەردەن استىق جينادى. سونىڭ ىشىندە گەكتارىنان 31 تسەنتنەردەن استىق العان تيميريازەۆ اۋدانىنداعى «Baiterek SK» جشس, گەكتارىنان 39,2 تسەنتنەردەن جيناعان اققايىڭ اۋدانىنداعى «سيمارگل» جشس, گەكتار بەرەكەسىن 40 تسەنتنەردەن اينالدىرعان مامليۋت اۋدانىنداعى «رۋسلان» شارۋا قوجالىعى بار. ال ايىرتاۋ اۋدانىنداعى بايتاس قازىبەكوۆ باسقاراتىن «شانگال» جشس استىقتى گەكتارىنان 50 تسەنتنەردەن جينادى.
بۇلار – مينەرالدى تىڭايتقىشتاردى ءوز ۋاقىتىندا جەتكىزىپ, ارامشوپتەردى ۋاقىتىندا جويىپ, وسكىندى كوزىنىڭ قاراشىعىنداي قورعاپ وتىرعان, وزىق تەحنيكالارمەن جۇمىس ىستەگەن شارۋاقور ديقاندار. ولار بيىل ەگىس القاپتارىنا 257 مىڭ توننا مينەرالدى تىڭايتقىش جەتكىزدى. ال جەردى تىڭايتۋدى ويلامايتىن, وعان مال تۇسسە قورعايتىن كۇزەتشىگە دە شىعىن شىعارعىسى كەلمەيتىن, ءارامشوبى وسكىندى باسىپ كەتسە دە, ونى حيميالىق ارناۋلى سۇيىقتىقتارمەن جويۋدى بىلمەگەن, تەك جەردى سورىپ, الۋدى عانا بىلگەن شارۋالاردىڭ استىعى جۇتاڭ بولدى.
سۋرەتتى تۇسىرگەن – ەرلان ومار, «EQ»
وبلىستىق اۋىل شارۋاشىلىعى باسقارماسى باسشىسىنىڭ ورىنباسارى جالعاس سۇلەيمەنوۆتىڭ ايتۋىنا قاراعاندا, بۇگىندە وبلىستىڭ بارلىق ەلەۆاتورىنا 1,6 ملن توننا استىق جەتكىزىلىپتى. سونىڭ 1,2 ملن تونناسى – بيداي. وبلىس اۋماعىندا 3,2 ملن توننا استىق ساقتايتىن 46 ەلەۆاتور بار. سونىمەن بىرگە اگروقۇرىلىمداردا وزدەرىنىڭ 3,7 ملن توننا استىق ساقتايتىن قويمالارى بار. ۇلتتىق ستاتيستيكا باسقارماسى وراق باستالماي تۇرعاندا وبلىستىڭ استىق قويمالارىندا 1,4 ملن تونناعا جۋىق بىلتىرعى استىق جاتقانىن جاريالاعان. ەندى ۇشى-قيىرسىز جاڭا استىق قۇيىلسا, ساقتايتىن ورىندار تارلىق ەتەدى.
ج.سۇلەيمەنوۆ ازىرگە تۇسكەن استىقتىڭ 41 پايىزى ءۇشىنشى كلاستىق, 47 پايىزى ءتورتىنشى كلاستىق سۇرىپقا جاتاتىنىن ايتتى. «بۇل – وراق ناۋقانى كەزىندە اۋا رايىنىڭ جاۋىن-شاشىندى بولعانى سەبەپتى استىقتىڭ بويىنداعى ىلعالدىڭ مولدىعىنان. قازىر ەلەۆاتورلار مەن قويمالارعا استىقتى قۇرعاتۋ جۇمىستارىنا پايدالانۋ ءۇشىن جەڭىلدەتىلگەن باعامەن 20 مىڭ توننا ديزەلدى وتىن, 5 مىڭ توننا سۇيىتىلعان گاز بوساتتىق. وبلىستا ءبىر تاۋلىكتە 255 مىڭ توننا استىقتى قۇرعاتا الاتىن بارلىعى 332 قۇرعاتقىش تەحنيكا بار. ولار قازىر تاۋلىك بويى جۇمىس ىستەپ جاتىر», دەدى ول.
باسقارما وكىلى قازىردىڭ وزىندە 2025 جىلعى ەگىسكە 470 مىڭ توننا تۇقىم قۇيىلعانىن جەتكىزدى. بۇل – وبلىس شارۋالارىنا تولىق جەتەدى دەگەن ءسوز. العاشقى بوزقىراۋ وتسە دە جينالا بەرەتىن كەيبىر مايلى داقىلداردى ورۋ ءالى جالعاسىپ جاتىر. ازىرگە ونىڭ جينالعان كولەمى 15 پايىزعا دا جەتپەيدى. جينالعان زىعىر, راپس, كۇنباعىس كولەمى 600 مىڭ تونناعا جەتكەن. بيىل 7,4 مىڭ كارتوپ, 100 گەكتارداي جەرگە قىزىلشا, 251 گەكتار جەرگە ءسابىز ەگىلىپ, قازىر ولار دا تولىق جينالعان.
ال مال ازىعى ءۇشىن وبلىس بيىل 415 مىڭ توننا پىشەندەمە, 509 مىڭ توننا سۇرلەم, 1 ملن 244 مىڭ توننا ءشوپ ءۇيىپ الدى. بۇل – الداعى جىلعا ەركىن جەتىپ, ءتىپتى ارتىلىپ قالۋعا ءتيىستى كولەم.
سولتۇستىك قازاقستان وبلىسى
