مەملەكەت باسشىسى ابيبۋللا جاكۋداەۆپەن قاتار 24 مۇعالىمگە «قازاقستاننىڭ ەڭبەك سىڭىرگەن ۇستازى» اتاعىن تاپسىردى. سوندا پرەزيدەنت مۇعالىمنىڭ مارتەبەسى قاشاندا بارىنەن بيىك ەكەنىن ايتا كەلىپ: « ۇلى تۇلعالاردىڭ ءوزى ۇستازىنىڭ الدىندا شاكىرت بولىپ قالا بەرەدى. ءبىر سوزبەن ايتساق, بارشا جەتىستىكتىڭ باستاۋىندا ۇستاز تۇر. ۇلتتىڭ بولاشاعى – ۇستازدىڭ قولىندا. مەنىڭ ماقساتىم – ۇستازدى قوعامىمىزدىڭ باستى كەيىپكەرى رەتىندە دارىپتەۋ. مۇعالىمدەردىڭ تاباندى ەڭبەكتەرى ەرەكشە قۇرمەت پەن جوعارى ماراپاتقا لايىق», دەدى.
التى جۇزدەن استام وقۋشىنى وليمپياداعا دايىنداپ, تالاي تالانتتىڭ توماعاسىن سىپىرعان ابيبۋللا مىڭاسار ۇلى وسى كۇنى تۇركىستان وبلىسى, ورداباسى اۋدانى, تەمىرلان اۋىلىنداعى شوقان ءۋاليحانوۆ اتىنداعى مەكتەپ-گيمنازيادا قىزمەت ەتەدى.
– بۇل اتاق – مەن ءۇشىن تەك جوعارى ماراپات ەمەس, ەڭ اۋەلى ۇلكەن جاۋاپكەرشىلىك. ەتكەن ەڭبەكتىڭ ەلەنگەنى, ارينە, كوڭىل قۋانتادى. سونداي-اق ماعىنالى قىزمەتتى جالعاستىرۋعا قۇلشىنىسىمدى ارتتىردى. ۇشاقتان تۇسكەن ساتتە قۋانىشىمدى بولىسۋگە كەلگەن ارىپتەستەرىمنىڭ, شاكىرتتەرىمنىڭ جانارىنداعى وتتى كورىپ, وتكەن كۇندەر ەستەلىگى جۇرەگىمدى تەربەپ, كوزىمنەن جاس بولىپ ىرشىپ شىقتى. ول سەزىمدى سوزبەن ايتىپ جەتكىزۋ ءتىپتى مۇمكىن ەمەس. جيىرما جىل بۇرىن انام مەن زايىبىم ومىردەن وزدى. ودان كەيىن وتاۋ قۇرمادىم. قوس قىزىمدى قوس قاراشىعىمداي ساقتاپ, ءوسىردىم. سونىڭ ءبارى سول ساتتە ويعا ورالىپ, كوڭىل تولقىتقانى راس, – دەيدى ا.جاكۋداەۆ.
تاعدىردىڭ تاۋقىمەتىنە تايسالماعان ابيبۋللا مىڭاسار ۇلى بۇل كۇنى تالاي شاكىرتتىڭ سۇيىكتى ۇستازى. كاسىبي مامان ءار بالانىڭ جۇرەگىنەن ورىن تاۋىپ, پانگە دەگەن قىزىعۋشىلىعىن وياتۋدىڭ ءوزى تاجىريبەمەن كەلەتىنىن ايتادى.
– ەڭبەك جولىن ەندى باستاعان پەداگوگتەرگە ايتار باستى كەڭەسىم – وسى باستان وقىتۋدى تەك اقپارات جەتكىزۋ دەپ قاراماي, وقۋشىلارمەن تىعىز بايلانىس ورناتىپ, ارقايسىسىنىڭ جەكە ەرەكشەلىگىن ەسكەرۋ قاجەت. ءجۇسىپ بالاساعۇننىڭ ء«اربىر بالا – ءبىر جۇلدىز, جارقىراۋىنا جاردەم ەت» دەگەنى وسىندايدا ويعا ورالادى. سوندىقتان ۇستاز شاكىرتتەرىنە اركەز جىلى شىراي مەن شىدامدىلىق تانىتىپ, ىزدەنىس ۇستىندە جۇرۋگە ءتيىس. بالا سەنى مويىنداماسا, سەن پەداگوگ ەمەسسىڭ. ول مويىنداۋ جاقسى ساباق بەرۋىڭمەن عانا كەلمەيدى. سويلەۋ مانەرىڭنەن باستاپ, ءجۇرىس-تۇرىسىڭ, وي-ءورىسىڭ ءبارى كوزگە كورىنبەي, بالاعا ءسىڭىپ جاتاتىن رۋحاني ءنار. سونىڭ بىرىنەن قۇر الاقان بولساڭ, ۇستازدىق تۇلعاڭا ءمىن. ءاربىر بالانىڭ ىشكى جان دۇنيەسىن ءتۇسىنۋ, قولداۋ كورسەتۋ, قاجەتتىلىكتەرىنە نازار اۋدارۋ ارقىلى جاسوسپىرىمدەردىڭ بويىنداعى اگرەسسيانى ازايتا الامىز. جاقسى وقۋشىنى جانىمداي كورەتىن ادەتىم. قيىن كلاسىڭ قيماس كلاسىڭا اينالاتىن كەزدەر دە بولادى. ازامات بولىپ, ومىردەن ءوز ورنىن تاپقان وقۋشىلارىڭدى كورگەندە, بويىڭدى قۋانىش بيلەپ, ءماز بولاسىڭ. «ەڭبەك ەش كەتكەن جوق» دەيمىز وسىندايدا. ءالى كۇنگە دەيىن ءوزىمنىڭ بولات قوجاگەلديەۆ, رۋسلان كەنجەبەكوۆ, باقىتجان تورەحانوۆ سىندى وقۋشىلارىممەن ماقتانامىن. ولار قازىر الەمدىك كومپانيالاردا بەدەلدى قىزمەت اتقارادى, – دەدى ول.
