سۋرەت: gov.kz
ج.اسانوۆ وزبەكستاننىڭ ورتالىق سايلاۋ كوميسسياسىنىڭ دايىندىعىن جوعارى باعالادى جانە اشىق ءارى ءراسىمى رەتتەلگەن سايلاۋ وتكىزۋگە ەلەۋلى ۇلەس قوسقانىن اتاپ ءوتتى. ونىڭ ايتۋىنشا, سايلاۋدى ۇيىمداستىرۋ مەن تەحنيكالىق قولداۋ دەڭگەيىنىڭ جوعارى بولۋى سايلاۋ زاڭناماسى جانە سايلاۋ وتكىزۋ ستاندارتتارىن ساقتاۋعا ەرەكشە ءمان بەرىلگەنىن كورسەتەدى.
دەپۋتات داۋىس بەرۋ جانە داۋىستى ساناۋ راسىمدەرىنىڭ اشىقتىعىمەن قوسا, سايلاۋ ۇدەرىسى كەزەڭدەرىندە بارلىق زاڭناما ەرەجەسىن ۇستانۋعا ەرەكشە نازار اۋداردى. وزبەكستانداعى دەموكراتيا مەن ساياسي تۇراقتىلىقتى نىعايتۋداعى ماڭىزدى قادام بولعانى جانە ەكىجاقتى قاتىناستاردىڭ دامۋى مەن باۋىرلاس ەلدەر اراسىنداعى جالپى سەنىم احۋالىنا وڭ اسەرى اتاپ ءوتىلدى.
ج.اسانوۆ بايقاۋ قورىتىندىسى بويىنشا وزبەكستانداعى سايلاۋ ينستيتۋتتارىنىڭ ودان ءارى دامۋىنا سەنىم ءبىلدىرىپ, دەموكراتيا ۇدەرىستەرىن نىعايتۋ ەلدىڭ تۇراقتىلىعى مەن وركەندەۋىنە بەرىك نەگىز بولاتىنىن اتاپ ءوتتى. وسىنداي بايقاۋ ميسسيالارى قازاقستان مەن وزبەكستاننىڭ مەملەكەتتىك ينستيتۋتتارى اراسىنداعى ارىپتەستىك قاتىناستى تەرەڭدەتۋگە جانە تاجىريبە الماسۋعا مۇمكىندىك بەرەدى.
قازاقستان پارلامەنتى سەناتى توراعاسىنىڭ ورىنباسارى وزبەكستانعا ساپار اياسىندا مەملەكەتارالىق قاتىناستى نىعايتۋدى كوزدەيتىن بىرقاتار كەزدەسۋ وتكىزدى. جاقىپ اسانوۆ وزبەكستان ولي ءماجىلىسى سەناتى توراعاسىنىڭ ءبىرىنشى ورىنباسارى سوديك سافوەۆپەن كەزدەسۋ بارىسىندا قازاقستان مەن وزبەكستان اراسىنداعى وداقتاستىق قاتىناستى نىعايتۋدىڭ ستراتەگيالىق ماڭىزىن اتاپ ءوتتى. ول كۇشىنە ەنەتىن وداقتاستىق قاتىناس تۋرالى شارت ەلدەر اراسىنداعى سەنىم مەن اشىقتىقتى تەرەڭدەتۋدەگى ماڭىزدى قادام بولاتىنىن جەتكىزدى.
سونىمەن قاتار ج.اسانوۆ وزبەكستان ماحاللالار قاۋىمداستىعىنىڭ باسشىسى كاحرامون قۇربونباەۆپەن كەزدەسۋ بارىسىندا وزبەكستاندا جەرگىلىكتى ءوزىن ءوزى باسقارۋ تەتىگى رەتىندە قۇرىلعان «ماحاللا جەتىلىگى» دەپ اتالاتىن قۇرىلىمنىڭ ماڭىزىنا توقتالدى.
