«شىعىس قازاقستاننىڭ اڭىز-ءاپسانالارى» جيناعىنا شىعىس قازاقستاننىڭ وزەن-كول, تاۋ اتاۋلارىنىڭ شىعۋ تاريحى تۋرالى توپونيميكالىق اڭىزدار, كيەلى ورىندار مەن تاريحي تۇلعالار جايلى اڭىزدار, ەرتەدە ولكەمىزدە ءومىر سۇرگەن عاجايىپ تا سيقىرلى كەيىپكەرلەر جونىندەگى ءاپسانالار ەنگەن.
اسىرەسە, كاتونقاراعاي وڭىرىندەگى جايلاۋدىڭ التىقىز اتانۋى, ەرتىس پەن ءۇلبىنىڭ اينىماس ماحابباتى, تاۋدىڭ «التاي» اتالۋ سەبەبى, قاندىسۋ وزەنىنىڭ تاريحى سىندى ولكەمىزگە قاتىستى كوپتەگەن اڭىزدار كەز كەلگەن وقىرمان ءۇشىن قىزىقتى بولارى ءسوزسىز.
جيناقتىڭ قۇراستىرۋشىسى - ولكەتانۋشى, «مادەنيەت سالاسىنىڭ ۇزدىگى», «كىتاپحانا ءىسىنىڭ ارداگەرى» توسبەلگىلەرىنىڭ يەگەرى سلياموۆا زيزا مۇحتارحانقىزى شىعىس قازاقستاننىڭ تاريحي مۇراسىن ۇزاق جىلدار بويى زەرتتەپ, ساقتاۋمەن اينالىسىپ كەلەدى.
اڭىزداردىڭ ءۇش تىلدە شىعارىلۋى ىشكى-سىرتقى ءتۋريزمنىڭ دامۋىنا وڭ اسەرىن تيگىزىپ, اقپاراتقا دەگەن قولجەتىمدىلىكتى قامتاماسىز ەتەدى.
زيزا مۇحتارحانقىزى ءوز سوزىندە مادەني مۇرانى ساقتاۋ مەن جاستاردى تۋعان ەل اڭىزدارىن زەرتتەۋگە تارتۋدىڭ ماڭىزىنا توقتالدى. شاراعا قاتىسۋشىلار ولكەنىڭ تاريحى مەن بولمىسىن تانۋ ءۇشىن توپونيميكالىق زەرتتەۋلەردىڭ ماڭىزىن تالقىلادى.
تۇساۋكەسەردە كوپتەگەن وڭ پىكىرلەر مەن ىزگى تىلەكتەر ايتىلىپ, قوناقتار مۇنداي شارالاردىڭ الداعى ۋاقىتتا دا جالعاسىن تاباتىنىنا سەنىم ءبىلدىردى.
«شىعىس قازاقستاننىڭ اڭىز-ءاپسانالارى» جيناعى كىتاپحانا قورىن بايىتىپ قانا قويماي, وبلىسىمىزدىڭ مادەني مۇراسىن ساقتاۋ مەن ناسيحاتتاۋعا قوسىلعان ماڭىزدى ۇلەسكە اينالادى.
