سالتاناتتى تابىستاۋ راسىمىنە قاتىسقان مادەنيەت جانە اقپارات ءمينيسترى ايدا بالاەۆا مەملەكەت ازاماتتاردى تۇرعىن ۇيمەن قامتاماسىز ەتۋ ماسەلەسىنە ەرەكشە كوڭىل بولەتىنىن اتاپ ءوتتى.
«پرەزيدەنتتىڭ باسشىلىعىمەن تەك تۇرعىن ءۇي سالاسى عانا ەمەس, الەۋمەتتىك ساياساتتىڭ باسقا دا باعىتتارى قارقىندى دامىپ كەلەدى. ادال ەڭبەك ەتكەن ازامات مەملەكەت پەن قوعامنىڭ قولداۋىن ارقاشان سەزىنەتىندەي جاعداي جاسالىپ جاتىر. ماسەلەن, 2021 جىلدان باستاپ ازاماتتار زەينەتاقى جيناقتارىن پايدالانىپ, تۇرعىن ءۇي ساتىپ الۋعا مۇمكىندىك الدى. وسى ۋاقىت ىشىندە 2 ميلليونعا جۋىق ازامات بۇل مۇمكىندىكتى پايدالاندى. ساتىپ الۋ قۇقىعىمەن جالعا بەرىلەتىن تۇرعىن ءۇي كولەمى ايتارلىقتاي ارتتى. ۇكىمەت مۇنداي تۇرعىن ءۇي كولەمىن ءتورت ەسە ارتتىرۋدى جوسپارلاپ وتىر. بىلتىر ەل پرەزيدەنتىنىڭ اتىنان بۇقارالىق اقپارات قۇرالدارىنىڭ قىزمەتكەرلەرىنە 65 پاتەردىڭ كىلتى تابىستالعان ەدى. بيىل بۇل باستاما جالعاسىن تاۋىپ, 67 جاڭا پاتەر بەرىلدى. بۇگىنگى مادەنيەت سالاسى قىزمەتكەرلەرىنە پاتەر سەرتيفيكاتتارىن تاپسىرۋ – مەملەكەت باسشىسى ساياساتىنىڭ زاڭدى جالعاسى. مادەنيەت سالاسى – قوعام دامۋىنىڭ ماڭىزدى ەلەمەنتى, سوندىقتان بۇل مەملەكەتتىڭ نازارىندا بولادى. سىزدەرگە جاڭا ۇيدە بەرەكە-بىرلىك, دەنساۋلىق جانە باقىت تىلەيمىن», دەدى مينيستر.
نەگىزىنەن پاتەر يەگەرلەرى – ەرەكشە قاجەتتىلىكتەرى بار قىزمەتكەرلەر, مۇمكىندىگى شەكتەۋلى بالالاردى تاربيەلەپ وتىرعان وتباسىلار, كوپ بالالى وتباسىلار, سونداي-اق جالعىزباستى انالار.
جاڭا پاتەرگە يە بولعان جانداردىڭ ءبىرى – سامال ءاجمۇراتوۆا. ول – 5 بالانى تاربيەلەپ وتىرعان كوپ بالالى انا. قازاق ۇلتتىق ونەر ۋنيۆەرسيتەتىندە 16 جىلدان بەرى پەداگوگ بولىپ جۇمىس ىستەيدى.
«بۇگىن – مەنىڭ وتباسىم ءۇشىن جاڭا ءبىر كەزەڭنىڭ باستاۋى, ويتكەنى ءبىزدىڭ ءوز ءۇيىمىز بولعان جوق. پاتەر الۋعا كومەكتەسكەندەرگە شىن جۇرەكتەن العىسىمدى بىلدىرەمىن. مۇنداي باستاما – ءوز ەلىنىڭ يگىلىگى ءۇشىن ەڭبەك ەتىپ جۇرگەن قىزمەتكەرلەرگە ۇلكەن قولداۋ», دەدى س.ءاجمۇراتوۆا.
