جۇمىس توبىنىڭ شەشىمىمەن 21 قاتىسۋشىنىڭ اراسىنان جارتىلاي فينالعا 10 ۇمىتكەر ىرىكتەلگەن. ولاردىڭ جوباسى وڭىرلىك برەند-كوميتەت كەڭەسىندە قارالىپ, 4 ۇزدىك جوبا رەسپۋبليكالىق جانە حالىقارالىق كورمەلەرگە جولداما الدى. ولار جوبانىڭ ەرەجەسىنە سايكەس بيزنەستى باستاۋ مەن دامىتۋعا 5 ملن تەڭگەگە دەيىن مەملەكەتتىك گرانت الۋ مۇمكىندىگىنە يە بولدى. سونىمەن بىرگە ەلەكتروندىق كوممەرتسيانى وقىتۋ, وزدەرى شىعاراتىن ءونىمنىڭ تۇساۋكەسەرىن ۇيىمداستىرۋ, ماماندار تاراپىنان بيزنەستى وركەندەتۋ جونىندە ۇسىنىستار بەرىلىپ, تولىق ماركەتينگتىك قولداۋعا قول جەتكىزدى.
ء«بىر اۋىل – ءبىر ءونىم» كورمە-جارمەڭكەسى – وبلىستىق كاسىپكەرلەر پالاتاسىنىڭ JICA حالىقارالىق ىنتىماقتاستىق جونىندەگى جاپون اگەنتتىگىمەن بىرلەسىپ جۇزەگە اسىرىپ جاتقان جوبالاردىڭ ءبىرى. جاپون ەلىنىڭ بىلىكتى ماماندارى اتالعان جوبانىڭ دامۋىنا جان-جاقتى ۇلەس قوسىپ, تاماق رەتسەپتەرىن ۇسىنۋ مەن ماركەتينگ جۇرگىزۋدە قولعابىس ەتىپ وتىر. باستاپقى ساتىدا ەكەنىمىز بەلگىلى, بىراق باسقا ەلدەر تاجىريبەسىنە قارايتىن بولساق, جوبانىڭ الەۋەتى زور», دەيدى اباي وبلىسى كاسىپكەرلەر پالاتاسىنىڭ ديرەكتورى ماقسات انۋاربەك ۇلى.
مەملەكەتتىك گرانت يەگەرى اتانعان تورتتىكتىڭ ءبىرى – اعاشتان جاسالعان بۇيىمدارى تۋريستەردىڭ قىزىعۋشىلىعىن تۋدىرعان, سەمەيلىك شەبەر ايدار ەلۋباەۆ. بىلىكتى ۇستا مەكتەپتە «ەڭبەك» پانىنەن ساباق بەرىپ, ۇلتتىق مۋزىكالىق اسپاپتاردى, ەسكى كولىكتەردى, ەرەكشە كادەسىيلاردى جاسايدى. وتىز جىلعا تارتا قولونەرمەن اينالىسقان ول العاشىندا بۇل ءىستىڭ جاي عانا قىزىعۋشىلىق بولعانىن, سۇرانىس كوبەيگەن سوڭ, ءوز قولىنان جاسالعان بۇيىمداردى ساۋداعا شىعارا باستاعانىن ايتادى. ءارتۇرلى كادەسىي دۇكەندەرى مەن ماسكەۋ قالاسىنان تۇسكەن كوممەرتسيالىق ۇسىنىس كاسىپكە مويىن بۇرعىزىپ, بيزنەسكە ءبىرجولا كەلگەن.
جوبا فينالىنا شىققان جەكە كاسىپكەردىڭ ءبىرى – راۋشان مۇراتحانقىزى. «ادال اس» اتىمەن تانىلعان ونىڭ كاسىپورنى 15 جىلدان بەرى 100-دەن استام ءونىم ءتۇرىن شىعارىپ كەلەدى. جوبانىڭ تاعى ءبىر جەڭىمپازى, كورمە تاماشالاۋشىلاردى تاڭعالدىرعان ءونىم اۆتورى – ماقسات كوشەباەۆ. مالدىڭ تەزەگى مەن كوڭىنەن كومىر جانە وڭدەلگەن مال ازىعىن جاسايتىن جەكە كاسىپكەر اباي وبلىسى اقسۋات اۋدانىنداعى ەكپىندى اۋىلىندا ەكولوگيالىق وتىننىڭ جاڭا ءتۇرىن ويلاپ تاپقان. ارنايى ستانوك ويلاپ تاۋىپ, بيىل جوباعا ەكىنشى مارتە قاتىسىپ وتىر. ەكولوگيانى تازا ۇستاۋ مەن تازارتۋ ماقساتىندا جاڭا باستاماعا كىرىسكەن ونىڭ ويى ماقۇلدانىپ, گرانت يەلەندى.
جاڭا باستامالار مەن جوبالارعا باعا بەرۋشىلەردىڭ نازارىن اۋدارىپ, مەملەكەتتىك قولداۋعا يە بولعان جەكە كاسىپكەردىڭ ءبىرى – گۇلميرا ايعوجينا. كيىز بۇيىمدارىن وڭدەۋدى مەڭگەرگەن مامان يەسى برەند-كوميتەتتىڭ جوعارى باعاسىنا يە بولعان. ول ۇلتتىق ناقىشتاعى كىلەم مەن باسكيىم, باسقا دا تابيعي بۇيىمدار جاسايدى. بالالار ۇيىندە قوسىمشا ءبىلىم بەرەتىن گۇلميرا ءوز ءىسىن ۇيرەتىپ, تالاپتى جاندارعا تابىس تابۋعا دا كومەكتەسىپ ءجۇر.
شالعايداعى كاسىپكەرلەر مەن اۋىل تۇرعىندارىنىڭ كاسىپكەرلىك الەۋەتىن ارتتىرۋ, ولاردىڭ ءال-اۋقاتى مەن ءومىر ءسۇرۋ دەڭگەيىن جاقسارتۋ ماقساتىندا قولعا الىنعان جوبا الداعى ۋاقىتتا دا مەملەكەتتىك گرانتتار ۇسىنىپ, ەل ەكونوميكاسىن جاقسارتۋعا ۇلەس قوسادى دەگەن ءۇمىت باسىم.
اباي وبلىسى
