«اتامەكەن» ۇكپ, ۇلتتىق ەكونوميكا مينيسترلىگى مەن جاپونيانىڭ JICA اگەنتتىگى بىرلەسىپ جۇزەگە اسىرىپ جاتقان جوبانىڭ تاعى ءبىر ماقساتى – جەرگىلىكتى رەسۋرستاردان وڭىرلىك ءونىمدى انىقتاۋ مەن دامىتۋ. سونداي-اق اۋىلداعى ءوندىرىس تەحنولوگيالارىن جەتىلدىرۋگە, ءونىمدى سىرتقى-ىشكى نارىقتارعا جىلجىتۋعا جاردەمدەسۋدى كوزدەيدى. مۇنداي جوبانى وتكەن عاسىردىڭ 70-جىلدارىندا ويتا پرەفەكتۋراسى گۋبەرناتورى موريحيكو حيراماتسۋ باستاعان. ول تابيعي رەسۋرستاردى پايدالانۋ ارقىلى اۋىلدى ەكونوميكالىق قۇلدىراۋدان شىعارۋ جولدارىن ۇسىنعان.
44 تاۋار ءوندىرۋشى ورگانيكالىق ازىق-ت ۇلىكتەن باستاپ يننوۆاتسيالىق اۋىل شارۋاشىلىعى ونىمدەرىنە دەيىن كورمەگە قويدى.
«بۇل ءىس-شارا اۋىلداعى دارىنداردى قولداپ, ۇلتتىق يننوۆاتسيالاردى كەڭىنەن پايدالانىپ, ەل يگىلىگى ءۇشىن كادەگە جاراتۋعا مۇمكىندىك تۋدىرادى. وعان قوسا, جەرگىلىكتى كاسىپتى دامىتىپ, ايماق ەكونوميكاسىنىڭ ورىستەۋىنە سەپتىگىن تيگىزەدى», دەيدى «اتامەكەن» ۇكپ باسقارما توراعاسىنىڭ ورىنباسارى تيمۋر ناقىپبەكوۆ.
جىل باسىنان بەرى ەلىمىزدىڭ 19 ايماعىندا 800-گە جۋىق ءوندىرۋشى جوباعا قاتىستى. ولاردىڭ قاتارىندا اعاش وڭدەۋ ونەركاسىبى, تۇيە ءسۇتى, جەنت, قىمىز, بال ونىمدەرى, شوپتەر مەن جاڭعاق سياقتى جەرگىلىكتى شيكىزاتتى پايدالاناتىن تاماق ونەركاسىبى بار.
«قاراعاندىنىڭ تۋماسىمىن. قوي جۇنىنەن ءتۇرلى قولونەر ءونىمىن جاساۋمەن 12 جاسىمنان بەرى شۇعىلدانامىن. اۋەلى جاقسى ءجۇندى تاڭداپ الىپ, ونى جۋىپ, تازالاپ, بويايمىز. بۇل ىستە انام مەن اكەم كومەكشى. دايىن بولعان شيكىزاتتان كوڭىلىم تارتقان بۇيىمنىڭ ءبارىن دەرلىك جاساۋعا بولادى. اياقكيىم, كيىم-كەشەك, كارتينا, تەكەمەت, كىلەمشەلەردىڭ ءبارى ءوز قولىمان شىققان», دەيدى قاراعاندى تەحنولوگيا جانە سەرۆيس كوللەدجىنىڭ مودەلەر-ءپىشۋشى ماماندىعىندا وقىپ جۇرگەن 17 جاستاعى كاسىپكەر گۇلباقىت قۇتتىباەۆا.
دامىس بولاتحان 5 جىلدان استام ۋاقىت بويى تازا بىلعارىدان سومكە تىگەدى. جوباعا قاتىسىپ, جابدىق ساتىپ الۋعا قاراجات تاپتى.
«كاسىپكەرلىكتى قولداۋ باعدارلامالارى مەن بيزنەستى قالاي جۇرگىزۋ كەرەكتىگىن, وعان قوسا ەسەپ بەرۋ تۋرالى مۇلدە بەيحابار ەدىم. قازىر ءتۇرلى كورمەگە قاتىسىپ تۇرامىن. استانادا دۇكەن اشتىم. اقىرىنداپ دامىپ جاتىرمىز», دەيدى دامىس.
سايان احمەتجان اباي وبلىسى سپورتشىلارى اراسىندا تانىمال بولىپ كەلە جاتقان «اstal» كوكتەيلىن شىعارادى. ول تالقاننان (قۋىرىلعان ارپا نە بيدايدان جاسالعان) وندىرىلەدى.
ء«بىز ء«بىر اۋىل – ءبىر ءونىم» ارقىلى كاسىپكەرلەر پالاتاسىمەن تىعىز جۇمىس ىستەپ ءجۇرمىز. باستاپقىدا بىزگە بيزنەستى قۇرۋعا جانە ماركەتينگ بويىنشا كومەك كورسەتتى. ءونىمدى قازىر اباي وبلىسىنىڭ بارلىق وڭىرىنەن ساتىپ الۋعا بولادى. جاقىن كۇندە رەسپۋبليكالىق دەڭگەيگە شىعۋعا ءۇمىتىمىز بار», دەدى.
2023 جىلى «اتامەكەن» ۇكپ ەلىمىزدىڭ بارلىق وڭىرىندە وسى جوبانى اۋقىمدى ىسكە اسىردى. ناتيجەسىندە, 519 ءوندىرۋشىنىڭ قاتىسۋىمەن 20 وڭىرلىك كورمە وتكىزىلدى. ولاردىڭ اراسىنان 60 فيناليست ىرىكتەلدى. فينالعا شىققان 60 ۇمىتكەردىڭ 34-ءى ازىق-ت ۇلىك ءونىمىن شىعارسا, 17-ءسى ۇلتتىق ونىممەن, 9-ى بيوونىممەن اينالىسادى. بىلتىرعى فيناليستەر 196 ءونىم ءتۇرىن شىعارادى.
بىلتىر شاعىن كاسىپتە 107-گە جۋىق جۇمىس ورنى قۇرىلدى. ون ايەلدىڭ كاسىپ اشۋىنا مۇمكىندىك بەردى. برەندتىك ونىمدەرگە ارنالعان 60 جوبا ازىرلەندى.
