مازمۇندى ءىس-شارا بارىسىندا ەلىمىزدىڭ 17 وڭىرىنەن كەلگەن 2500-دەن استام قاتىسۋشى جاساندى ينتەللەكت, بلوكچەين, ويىنداردى ازىرلەۋ جانە «Telegram mini-apps» سەكىلدى نەگىزگى تەحنولوگيالىق باعىتتارعا ارنالعان يننوۆاتسيالىق ازىرلەمەلەرىن ۇسىندى. ءبىر جاعىنان, مۇنداي جيىن ەلىمىزدىڭ وزىق تەحنولوگيالار سالاسىنداعى ايماقتىق كوشباسشى رەتىندەگى ۇستانىمىن نىعايتا تۇسەدى. سونداي-اق بۇل – ەلىمىزدىڭ جاساندى ينتەللەكتىنى دامىتۋ تۇجىرىمداماسى اياسىندا ىسكە اساتىن «Generative Nation» قوزعالىسىنىڭ ءبىر بولىگى. سونىڭ شەڭبەرىندە جاساندى زەردە تەحنولوگيالارىن ودان ءارى دامىتاتىن «AI Movement» باستاماسى جۇزەگە اسىپ وتىر.
بىلتىرعى ءىس-شاراعا 12 وڭىردەن 1500-دەن اسا قاتىسۋشى كەلىپ, ۇلكەن تابىسقا قول جەتكىزگەن ەدى. بۇل وتاندىق ازىرلەۋشىلەردىڭ زور الەۋەتىن كورسەتتى. بيىل ونىڭ اياسى كەڭەيىپ, بارلىق 17 ءوڭىردى قامتىدى.
سالتاناتتى ءىس-شارانىڭ اشىلۋىندا تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترى جاسلان ماديەۆ جاساندى ينتەللەكتىنى دامىتۋ اياسىندا ىسكە اسىپ جاتقان باستامالار تۋرالى ايتتى.
«Generative Nation» قوزعالىسى بۇكىل ەلدى قامتيتىن AI-ترانسفورماتسيانى ىسكە اسىرۋعا باعىتتالعان. بۇعان ءار ءوڭىردىڭ قاتىسۋى ماڭىزدى. سونداي-اق «Decentrathon» – ەلىمىزدىڭ بارلىق ايماعىن قوساتىن العاشقى IT ءىس-شارا. بۇل – جاساندى ينتەللەكت پەن تسيفرلىق تەحنولوگيالار سالاسىنداعى ەلىمىزدىڭ كوشباسشىلىعىن نىعايتۋعا جاسالعان قادام», دەدى ول.
سونىمەن قاتار ءىس-شارا اياسىندا اتالعان مينيسترلىك «Blockchain and AI Technology Center-پەن» بىرلەسىپ «Decentrathon-عا» قاتىساتىن ينجەنەرلەر مەن ەلىمىزدىڭ IT تۇلەكتەرىنە ارنالعان ءتورت اپتالىق تەگىن «AI-driven» ماڭساپ بۋتكەمپىن ىسكە قوساتىنىن جاريالادى. وندا پراكتيكالىق شەبەرلىك سىنىپتار مەن جەتەكشى تەحنولوگيالىق كومپانيا وكىلدەرىمەن كەزدەسۋلەر ءوتىپ, قاتىسۋشىلار قانداي داعدىلاردى دامىتۋ كەرەكتىگىن ۇيرەنەدى. ءبىر سوزبەن ايتقاندا, وسىنداي ءىس-شارا ەلىمىزدىڭ تەحنولوگيالىق ءوندىرىس سالاسىنداعى ادامي كاپيتالدى ايتارلىقتاي نىعايتۋعا كومەكتەسەدى.
