كەشتى «بولاشاق» حالىقارالىق باعدارلاماسى بويىنشا برەمەن قالاسىنىڭ Constructor ۋنيۆەرسيتەتىندە ءبىلىم الىپ جۇرگەن قازاقستاندىق ازاماتتار ۇيىمداستىردى. مەرەكەلىك كەشكە قازاق جاستارى مەن اعا بۋىن وكىلدەرىنەن 70-كە جۋىق ادام قاتىستى.
كەشتە ۇلتتىق مەرەكە – رەسپۋبليكا كۇنىنىڭ ءمان-ماڭىزى مەن تاريحى جايلى پرەزەنتاتسيا كورسەتىلىپ, تانىستىرۋ جاسالدى. سونىمەن قاتار ءان شىرقالىپ, كۇي تارتىلىپ, دومبىرانىڭ قوڭىر اۋەنى قالىقتادى.
– مەن استانا قالاسىنداعى س.سەيفۋللين اتىنداعى قازاتۋز-ءدىڭ «تەحنولوگيالىق ماشينالار مەن جابدىقتار» كافەدراسىنىڭ مەڭگەرۋشىسى بولىپ قىزمەت اتقارامىن. مەملەكەتىمىز ۇيىمداستىرىپ وتىرعان «500 عالىم» جوباسى اياسىندا گەرمانيانىڭ برەمەن قالاسىنا كەلىپ, عىلىمي تاعىلىمدامادان ءوتىپ جاتقانىمىزعا 9 ايداي ۋاقىت بولدى. بۇگىن 25 قازان – رەسپۋبليكا كۇنىنە وراي Constructor ۋنيۆەرسيتەتىندە وتە تاماشا مەرەكەلىك كەش ءوتتى. ەلدەن الىس جۇرسەك تە مەرەكەلىك كەشتى ۇيىمداستىرعان ازاماتتارعا ريزاشىلىعىمدى ءبىلدىرىپ, العىس ايتامىن. مەرەكەلىك كەش تەك رەسمي تۇردە عانا ەمەس قازاقتىڭ ۇلتتىق تاعامدارى قويىلعان سالتاناتتى داستارحانعا ۇلاستى. كەشكە كەلگەن جاستار مەن اعا بۋىن وكىلدەرى جاقسى اسەر الىپ قايتتى, تاعلىمى مول كەزدەسۋ بولدى, - دەدى «بولاشاق» حالىقارالىق باعدارلاماسىنىڭ «500 عالىم» جوباسى اياسىندا Constructor ۋنيۆەرسيتەتىندە تاجىريبەدەن ءوتۋشى عالىم مۇراتبەك وسەرباەۆ.
ال برەمەن قالاسىنداعى Constructor ۋنيۆەرسيتەتىنىڭ 3-كۋرس ستۋدەنتى مەرەي ەسەنعاليەۆا وندا بۇرىن مۇنداي كەش ۇيىمداستىرىلماعانىن العا تارتتى.
– مەن كومپيۋتەر عىلىمدارى ماماندىعى بويىنشا 3-كۋرستا وقىپ ءجۇرمىن. وسى ماماندىقتى يگەرگەن سوڭ تاعى دا بىرنەشە جىل ەۋروپا ەلدەرىندە تاجىريبە جيناپ, سوسىن ەلگە بارىپ بيزنەس اشقىم كەلەدى. بۇگىن ءبىزدىڭ ءبىر شارۋالارىمىز بار ەدى, بىراق وسى كەشكە ارنايى ۋاقىت ءبولىپ كەلگەنبىز. وتە جاقسى اسەر الدىق. بۇرىن-سوڭدى بۇگىنگىدەي كەش ۇيىمداستىرىلعان جوق. رەسپۋبليكا كۇنىنە ارنايى ۇيىمداستىرىلعان كەشىمىز كەرەمەت ءوتتى. ءوزىمىزدىڭ قاراگوزدەرىمىزدى كورىپ, ەلگە دەگەن ساعىنىشىمىزدى باستىق, - دەيدى ول.
ءىس-شارا سوڭىندا جاستار وزدەرىنىڭ العان اسەرلەرىن ايتىپ, ۇيىمداستىرۋشىلارعا ريزاشىلىق ءبىلدىردى. مەرەكەگە ارنالعان جيىن سوڭى جاستاردىڭ بي كەشىنە ۇلاستى.
ايبارشا جاقسىلىق, برەمەن قالاسى
