ءىس-شاراعا مەملەكەت باسشىسىنىڭ تاپسىرماسى بويىنشا قر مادەنيەت جانە اقپارات ءمينيسترى ايدا بالاەۆا قاتىسىپ, پرەزيدەنت قاسىم-جومارت توقاەۆتىڭ قۇتتىقتاۋ حاتىن وقىپ بەردى.
ء«سوز ونەرىنىڭ ساردارى سانالى عۇمىرىن ۇلتىنىڭ دۇنيەتانىمىن بايىتۋعا ارنادى. ادەبيەت الەمىنە قۇبىلىس بولىپ ەنگەن سۇڭعىلا سۋرەتكەر قازاق پروزاسىنا ەرەكشە قولتاڭباسىن قالدىردى. كوزى تىرىسىندە-اق كلاسسيك اتانعان جازۋشى قالامگەرلەردىڭ جاڭا بۋىنىنا ۇلگى-ونەگە كورسەتىپ, وزىندىك مەكتەبىن قالىپتاستىردى. ابەڭنىڭ ءار تۋىندىسىنان تۋعان جەرگە دەگەن رياسىز سۇيىسپەنشىلىگى ايقىن كورىنەدى. ونىڭ «قان مەن تەر», «سوڭعى پارىز» سەكىلدى روماندارىن ءوز زامانىنىڭ ايناسى دەۋگە بولادى. ارال ارقىلى قازاقتىڭ, قازاق ارقىلى بارشا ادامزاتتىڭ ماسەلەسىن كوتەرگەن بۇل شىعارمالار – الەم وركەنيەتىنە قوسىلعان قۇندى قازىنا», – دەلىنگەن قۇتتىقتاۋ حاتتا.
ءوز سوزىندە ايدا بالاەۆا قالامگەردى ەسكە الۋعا ارنالعان ءىس-شارانىڭ ماڭىزىن اتاپ ءوتتى.
«پرەزيدەنت اتاپ وتكەندەي, ءابدىجامىل نۇرپەيىسوۆ – قازاق ادەبيەتىن الەمدىك دەڭگەيگە كوتەرگەن تۇلعا. بۇل سوزىمىزگە ونىڭ شەت تىلدەرگە اۋدارىلعان شىعارمالارى, الەم وقىرماندارىنىڭ جوعارى باعاسى دالەل بولا الادى. بۇگىنگى كونفەرەنتسيا جازۋشىنىڭ شىعارماشىلىعىن جاڭا قىرىنان زەردەلەۋگە جول اشادى دەگەن ۇمىتتەمىن», دەدى مينيستر.
سونداي-اق, جازۋشىنىڭ ءجۇز جىلدىق مەرەيتويىنا وراي ەلىمىزدىڭ بارلىق وڭىرىندە ىرگەلى ءىس-شارالار, ادەبي كەشتەر ۇيىمداستىرىلعانىن ايتتى. كەيىنگى ءۇش ايدىڭ وزىندە وڭىرلەردە 50-گە تارتا ءىس-شارا ءوتتى. باسىلىم بەتتەرىندە قالامگەردىڭ ءومىرى مەن شىعارماشىلىعى تۋرالى 200-دەن استام ماقالا جارىق كورىپ, تەلەارنالاردان «ورىندالماعان امانات», «ابىز عۇمىر» اتتى دەرەكتى فيلمدەر جانە ءتۇرلى سيۋجەتتەر كورسەتىلدى.
حالىقارالىق عىلىمي-پراكتيكالىق كونفەرەنتسياعا قازاقستان جازۋشىلار وداعىنىڭ توراعاسى مەرەكە قۇلكەنوۆ, حالىقارالىق تۇرىكسوي ۇيىمىنىڭ باس حاتشىسى سۇلتان راەۆ, كورنەكتى مەملەكەت جانە قوعام قايراتكەرلەرى, اقىن-جازۋشىلار, مادەنيەت-ونەر وكىلدەرى قاتىستى.
كونفەرەنتسيا اياسىندا ءابدىجامىل نۇرپەيىسوۆتىڭ تۇرعان ۇيىنە ىلىنگەن ەسكەرتكىش تاقتانىڭ جانە دوستىق ۇيىندە فوتوكورمەنىڭ اشىلۋى ءوتتى.
