جاس بۋىندى مەملەكەت بىرلىگىن كۇزەتۋگە, قوعامدىق كەلىسىمدى ساقتاۋداعى قۇندىلىقتاردى يگەرۋگە ۇندەي وتىرىپ, جاڭا مۇمكىندىكتەر ساتىسىنا جەتەلەپ كەلەمىز. ءبىلىم الۋعا جانە ەڭبەك ەتۋگە قۇرمەتپەن قاراۋ قاعيداتتارىن ولاردىڭ بويىنان كورۋگە اركەز تالپىنامىز.
مەملەكەت باسشىسى قازاقستان حالقى اسسامبلەياسىنىڭ جاستار باستامالارىن دامىتۋ ماسەلەلەرىنە قحا-نىڭ XXXIII سەسسياسى اياسىندا باسا نازار اۋدارىپ, جاستار مەن ۆولونتەرلىك جوبالاردى قولداۋدىڭ ماڭىزدىلىعىن اتاپ وتكەن ەدى. سەسسيا ناتيجەسى بويىنشا اسسامبلەيانىڭ جاستار الەۋەتىن دامىتۋعا باعىتتالعان «جاڭا تولقىن» جوباسى قۇرىلدى. اتالعان جوبا نەگىزىندە قازاقستان حالقى اسسامبلەياسىنىڭ زاماناۋي كەلبەتىن قالىپتاستىرۋعا, ەتنومادەني بىرلەستىكتەر كوشباسشىلارىنىڭ كادرلىق رەزەرۆىن كەڭەيتۋگە جول اشاتىن باستامالار ىسكە اسىرىلىپ جاتىر.
ءبىزدىڭ ۇيىم «قازاقستان حالقى اسسامبلەياسى كوشباسشىلار مەكتەبى» باستاماسى اياسىندا كوپتەگەن ءىس-شارالار وتكىزەدى. قازىرگى ۋاقىتتا بۇل جوبانىڭ ايماقتىق كەزەڭى كورىنىس تابۋدا. بەلسەندى جاستارىمىز ەلدىڭ ءار وڭىرلەرىندە, سونىڭ ىشىندە اۋىل-ايماق جاستارى ءۇشىن ترەنينگتەر جانە موتيۆاتسيالىق كەزدەسۋلەر ۇيىمداستىرادى. اسىرەسە الماتى, جامبىل, جەتىسۋ جانە تۇركىستان وبلىستارىندا ەتنوستار ءجيى شوعىرلانعان جەرلەردە جۇمىس ىستەۋگە كوپ كوڭىل ءبولىندى. جالپى, بۇگىندە مەدياتسيا, ەتنوسارالىق كوممۋنيكاتسيا بويىنشا داعدىلاردى 25 مىڭنان استام ادامعا ۇيرەتىپ ۇلگەردىك. جاستاردىڭ زاماناۋي بىلىمگە قول جەتكىزۋى جولىندا باسەكەگە قابىلەتتى بىلىك-داعدى مەڭگەرتە الدىق.
سونىمەن قوسا, ۆولونتەرلەر باعىتى قارقىندى دامىپ كەلەدى. ماسەلەن, «اسسامبلەيا جاستارى» كومانداسى باتىس قازاقستان وبلىسىندا «مەكتەپكە جول» اتتى اۋقىمدى اكتسيا وتكىزدى. سۋ تاسقىنى كەزىندە زارداپ شەككەن وتباسىلاردان شىققان 350 بالاعا جاڭا وقۋ جىلى قارساڭىندا Freedom Holding Corp قىزمەتكەرلەرىنىڭ دەمەۋشىلىگىمەن نوۋتبۋكتەر مەن مەكتەپ جيىنتىقتارى تارتۋ ەتىلدى. سونداي-اق, وزگە دە وزەكتىلىگى جوعارى باستامالار «تازا قازاقستان» اكتسياسى اياسىندا جۇزەگە اسىرىلىپ جاتىر. اسسامبلەيا ەرىكتىلەرى اعاش وتىرعىزۋعا, جاعالاۋ ايماقتارى مەن تاريحي نىسانداردى تازارتۋعا بەلسەندى قاتىسادى.
ەتنوسارالىق قارىم-قاتىناس ءتىلى رەتىندە مەملەكەتتىك ءتىل مارتەبەسىن كوتەرۋ ماڭىزدى باعىت سانالاتىنى بارشاعا بەلگىلى. «ۇيدە سويلە» اۋلا كلۋبتارى, قازاق ءتىلىن ۇيرەنۋگە ارنالعان باسقا دا الاڭدار ءوز جۇمىسىن جەمىستى جالعاستىرىپ كەلەدى. ءارتۇرلى ۇلت وكىلدەرىنەن قۇرىلعان «بىرىككەن اسسامبلەيا قۇراماسى» كومانداسى «جايدارمان» ۇلتتىق ليگاسىنىڭ فينالىنا شىعىپ قۋانتتى.
«اسسامبلەيا جاستارى» ۇيىمىنىڭ قىزمەتى حالىقارالىق ىنتىماقتاستىقتى دامىتۋعا, ونىڭ ىشىندە يۋنەسكو ۇيىمىنىڭ جەلىسى بويىنشا قىزمەت اتقارۋعا باعىتتالعان. ءبىز ورتالىق ازيا ەلدەرىنىڭ جاستارىمەن بايلانىس جاساۋعا ۇدايى ۇمتىلامىز. بۇل ماڭىزى زور باعىت, ويتكەنى ايماقتاعى قوعامدىق ديپلوماتيانىڭ باعىتى مەن دامۋى ەلدەر اراسىنداعى تاتۋلىق پەن ينتەگراتسيانىڭ نەگىزگى شارتى سانالادى.
قازاقستان رەسپۋبليكاسىنىڭ پرەزيدەنتى قاسىم-جومارت توقاەۆتىڭ تاجىكستانعا مەملەكەتتىك ساپارى كەزىندە «اسسامبلەيا جاستارى» رقب مەن تاجىكستان جاستار وداعى اراسىندا ىنتىماقتاستىق تۋرالى مەموراندۋمعا قول قويىلدى. بۇل ماڭىزدى ءارى تاريحي وقيعا رەتىندە ەستە قالدى. سەبەبى جاستار ۇيىمدارى قۇجاتقا العاش رەت قوس مەملەكەت باسشىسىنىڭ قاتىسۋىمەن ءوزارا مامىلە جاسادى. ءبىز, وسىلايشا, ورتالىق ازيا ەلدەرىنىڭ جاستار ۇيىمدارى اراسىنداعى ءوزارا ءىس-قيمىل فورماتىن وركەندەتە باستادىق. وسى ورايدا, بيىل الماتى قالاسىندا «Jastar Generation – 2024» حالىقارالىق جاستار لاگەرىن وتكىزدىك. بۇندا جاستارىمىز قىرعىزستان, تاجىكستان, تۇرىكمەنستان جانە وزبەكستان جاستارىنىڭ كوشباسشىلارىمەن جۇزدەسىپ, دۇنيەتانىمىن كەڭەيتە الدى.
جالپى, «اسسامبلەيا جاستارى» ۇيىمى ەلىمىزدەگى جالىندى جاستاردىڭ باسىن ءبىر ارناعا توعىستىرىپ, دامۋعا جەتەلەيدى. مەنىڭ ويىمشا, ءاربىر جوبانىڭ جۇزەگە اسۋى نا, ونىڭ پايدالى بولۋىنا ەرەكشە ءمان بەرىلۋى كەرەك. سول سەبەپتى ءبىز «اسسامبلەيا جاستارى» بەلسەندىلەرىنىڭ وزەكتى قىزمەت باعىتتارىن انىقتاۋداعى وي-پىكىرىن ارقاشان ەسكەرەمىز. ءبىز باستامالارىمىزدىڭ بارلىق جاستار قاۋىمى ءۇشىن قىزىقتى بولۋى جولىندا كۇش-جىگەر ايامايمىز.
تيمۋر جۇمىرباەۆ,
«اسسامبلەيا جاستارى» رقب توراعاسى
