ارالبەك جاڭا قىزمەتىنە ەندى عانا كىرىسكەن كەزدە مەكتەپ جابىلۋدىڭ از-اق الدىندا تۇرعان ەدى. 5-سىنىپ وقۋشىلارى كوبەيتۋ كەستەسىن بىلمەيتىن, ال جوعارى سىنىپ وقۋشىلارى 6-سىنىپ دەڭگەيىندەگى تاپسىرمالاردى ورىنداي المايتىن. وسىلايشا, Aidyn&Anar Rakhimbayev Foundation جانە الەمدىك دەڭگەيدەگى پەداگوگيكالىق ۋنيۆەرسيتەتتەردىڭ ءبىرى Michigan State University (MSU) قولداۋىمەن «YBYRAI MEKTEBI» جوباسى باستاۋ الدى.
«YBYRAI MEKTEBI» - وقۋشىلاردى, اتا-انالاردى جانە مۇعالىمدەردى بىرىكتىرەتىن يننوۆاتسيالىق ءبىلىم بەرۋ ەكوجۇيەسى. اۋىلدىڭ تىرەگىنە اينالعان كوميۋنيتي-ورتالىق اتا-انالاردى وقۋ پروتسەسىنە بەلسەندى تۇردە تارتىپ, ولاردى ارنايى كۋرستاردان وتكىزىپ, بالالارىن تاربيەلەۋ جانە دامىتۋ جولىندا قولداۋ كورسەتەدى. سونىمەن قاتار بۇل ورتالىق اۋىل بالالارىنا روبوتوتەحنيكا, گيدروپونيكا, ەكولوگيا, مەديا-ساۋات سياقتى بۇرىن قولجەتىمسىز بولعان ۇيىرمەلەرگە قاتىسۋ مۇمكىندىگىن بەرىپ وتىر. MSU-مەن بىرلەسىپ ازىرلەنگەن ءبىلىم بەرۋ ادىستەمەلەرىن قولدانۋ ارقىلى اۋىلدىق جەرلەردە دە الەمدىك دەڭگەيدەگى ءبىلىم الۋعا جاعداي جاسالىپ وتىر.
2022 جىلى مەكتەپ پەن كوميۋنيتي-ورتالىقتى جاڭارتۋعا $1,1 ملن ءبولىندى. سونىڭ ارقاسىندا ينفراقۇرىلىم جاڭارتىلىپ, زاماناۋي تەحنولوگيالار ەنگىزىلدى. 15 جاڭا ۇيىرمە اشىلىپ, 173 وقۋشى تۇراقتى تۇردە قاتىسىپ ءجۇر.
ماگيستر دارەجەسى بار مۇعالىمدەردىڭ ۇلەسى 15%-دان 25%-عا دەيىن ءوستى. بۇل پەداگوگتاردىڭ بىلىكتىلىگىن ارتتىرىپ, وقۋ پروتسەسىنە زاماناۋي ادىستەردى ەنگىزۋگە ىقپال ەتتى.
2023 جىلى ءۇش وقۋشى وبلىستىق دارىندى بالالارعا ارنالعان مەكتەپكە, ءبىر وقۋشى IQanat High School Burabay-عا قابىلداندى. سوڭعى ەكى جىلدا ۇبت بويىنشا ورتاشا بالل 53-تەن 102-گە دەيىن ءوستى.
«مەنىڭ باستى ماقساتىم - ءاربىر وقۋشىنىڭ الەۋەتىن اشۋعا مۇمكىندىك بەرەتىن ءبىلىم بەرۋ ەكوجۇيەسىن قۇرۋ, ال اتا-انالار مەن مۇعالىمدەر بۇل پروتسەستىڭ بەلسەندى قاتىسۋشىلارى بولادى. ءبىز ءبىلىم بەرىپ قانا قويماي, قازىرگى زامانعا بەيىمدەلىپ, باسەكەگە قابىلەتتى تۇلعا قالىپتاستىرۋدى كوزدەيمىز. ءبىز «YBYRAI MEKTEBI» جوباسىن ودان ءارى دامىتىپ جاتىرمىز, مەن ونى اۋىلدىق ءبىلىم بەرۋدىڭ بولاشاعى دەپ سانايمىن», دەيدى ارالبەك بەرىك ۇلى.
24 قازاندا MSU جانە ى.التىنسارين اتىنداعى ۇلتتىق ءبىلىم اكادەمياسى وكىلدەرىنىڭ قاتىسۋىمەن جوبا ناتيجەلەرىنە ارنالعان كونفەرەنتسيا ءوتتى. MSU پروفەسسورى BetsAnn Smith جوبانىڭ قازاقستانداعى اۋىلدىق ءبىلىم بەرۋ ءۇشىن ماڭىزدىلىعىن اتاپ ءوتتى: «YBYRAI MEKTEBI - بۇل جاڭاشىلدىق پەن قوعام قولداۋى ءتىپتى ەڭ شالعاي ايماقتارداعى ءبىلىم بەرۋ جۇيەسىن وزگەرتە الاتىنىن كورسەتەتىن مىسال. ءبىز اتا-انالار مەن جەرگىلىكتى كوشباسشىلاردى تارتۋ ارقىلى اۋىلدىق جەرلەردە تۇراقتى ءبىلىم بەرۋ مودەلىن قالىپتاستىرىپ جاتقانىمىزدى كورەمىز».
ارالبەك جوباداعى كەلىسىمشارتى اياقتالعانىنا قاراماستان, اۋىلدا قالۋ تۋرالى شەشىم قابىلداعان. ول ەلورداداعى ومىردەن باس تارتىپ, وقۋشىلارىنىڭ جوعارى ناتيجەلەرگە قول جەتكىزۋى ءۇشىن ق ۇلىنجوندا جۇمىسىن جالعاستىردى. ەندى ول مەكتەپتى كەڭەيتۋ جانە شالعاي اۋىلداردان كەلەتىن وقۋشىلارعا ارنالعان جاتاقحانا سالۋدى كوزدەپ وتىر.
