اتالعان ءوندىرىس ورنىنىڭ نەگىزگى كاسىپورىندارى اقتوعاي مەن بوزشاكولدە ورىن تەپكەن. از ۋاقىتتىڭ ىشىندە الدىڭعى قاتارلى دامۋ كورسەتكىشتەرىن ايگىلەپ وتىرعان «KAZ Minerals» قورىنىڭ باسىم بولىگى الەمدىك دەڭگەيدەگى اشىق تۇردەگى كەنىشتەردەن تۇراتىن كومپانياعا اينالدى. ءسۋلفيدتى كەندى قايتا وڭدەۋ قۋاتىن ەكى ەسە ارتتىراتىن اقتوعايدى كەڭەيتۋ جوباسى 2021 جىلدىڭ قازان ايىندا ىسكە قوسىلىپ, جەلتوقسان ايىندا تۇتىنۋشىلارعا العاشقى ءونىمىن جەتكىزدى. بۇگىندە «KAZ Minerals»-تا قازاقستان مەن قىرعىزستانداعى كاسىپورىن قىزمەتكەرلەرىن قوسا ەسەپتەگەندە شامامەن 14 000 ادام جۇمىس ىستەيدى.
2014 جىلى 31 قازاندا كومپانيانى قايتا قۇرۋ جۇمىسى مارەسىنە جەتتى. 2015 جىلدىڭ جەلتوقسان ايىندا اقتوعايدا العاشقى كاتودتى مىس وندىرىلسە, وسى كەنىش ورنىندا ءبىرىنشى ءسۋلفيدتى فابريكا ىسكە قوسىلىپ, جۇمىس اياسىن كەڭەيتتى. ءسۋلفيدتى كەندى قايتا وڭدەۋ جونىندەگى جىلدىق قۋاتى 25 ملن تونناعا دەيىن ءوستى. 2015 جىلى شىعىس قازاقستان مەن بوزىمشاقتاعى كاتودتى مىستىڭ جالپى ءوندىرىس كولەمى 81 مىڭ توننانى قۇرادى. ىلەسپە ءونىم رەتىندە 94 مىڭ توننا كونتسەنتراتتاعى مىرىش, تۇيىرشىك تۇرىندەگى 3,14 ملن ۋنتسيا كۇمىس پەن قۇيما تۇرىندەگى 35 مىڭ ۋنتسيا التىن الىندى. 2016 جىلدىڭ اقپانىندا اشىلعان پاۆلودار وبلىسىندا ورنالاسقان اشىق تيپتەگى ءىرى اۋقىمدى كەنىشتىڭ بىرەگەيى رەتىندە بوزشاكول كەن بايىتۋ كەشەنى ىسكە قوسىلدى. وسى جوبالار اياسىندا قارقىندى دامۋ كورسەتكىشتەرى ءوسىپ, «KAZ Minerals»-تى الەمدىك دەڭگەيدە اشىق تۇردەگى كەنىشتەردەن تۇراتىن كومپانياعا اينالدىردى.
قىرعىزستانداعى بوزىمشاق مىس-التىن كەنىشىندە 2017 جىلى مىستىڭ جالپى ءوندىرىس كولەمى 259 مىڭ توننانى قۇراپ, ىلەسپە ءونىم رەتىندە 58 مىڭ توننا كونتسەنتراتتاعى مىرىش, 179 مىڭ ۋنتسيا التىن مەن 3,506 ملن ۋنتسيا كۇمىس ءوندىرىلدى.
«2024 جىلدىڭ ءبىرىنشى جارتىجىلدىعىندا «KAZ Minerals» توبى 191 مىڭ توننا مىس ءوندىردى. مىس ءوندىرىسى 4%-عا ازايدى. دەگەنمەن كەندەگى مەتالل مولشەرىنىڭ جوسپارلى تومەندەۋى ونىمدىلىكتىڭ ارتۋىمەن ءىشىنارا وتەلدى. وسى كەزەڭدە توپ رەكوردتىق 47,5 ملن توننا كەندى وڭدەدى, بۇل 2023 جىلدىڭ ءبىرىنشى جارتىجىلدىعىمەن سالىستىرعاندا 7%-عا ارتىق. ەسەپتى كەزەڭدە كۇمىس پەن مىرىش ءوندىرىسى 5 جانە 6%-عا ازايدى, ويتكەنى شىعىس ءوڭىر مەن بوزىمشاقتا كەن ءوندىرۋ مەتالل مولشەرى تومەن ۋچاسكەلەردە جۇرگىزىلدى. اشىق كارەردەگى جۇمىستار توقتاپ, جاڭا جەراستى كەنىشىنىڭ قۋاتتىلىعىن ارتىرىپ جاتقان بوزىمشاقتا ءوندىرىستىڭ باسەڭدەۋىنە بايلانىستى التىن ءوندىرىسى 3%-عا ازايدى», دەيدى «KAZ Minerals» توبى كورپوراتيۆتىك بايلانىستار دەپارتامەنتىنىڭ مەنەدجەرى ەرمەك ديۋزكەنەۆ.
كومپانيا 2016 جىلدان باستاپ دەمەۋشىلىكپەن دە اينالىسىپ كەلەدى. 2016 جىلى سەمەي قالاسىنداعى سپورت نىساندارىنىڭ قۇرىلىسىنا 861 ملن تەڭگە قارجى ءبولدى. 2018 جىلى تاسقىن سۋدان زارداپ شەككەندەرگە كومەك قولىن سوزدى. كومپانيا بولگەن 50 ملن تەڭگەگە اياگوز اۋدانىنىڭ ورتالىعىندا 12 جەكەمەنشىك ءۇي مەن پاتەر ساتىپ الىندى. بىلتىرعى ءورت وقيعالارى كەزىندە دە مەكەمە قىزمەتكەرلەرى اباي وبلىسىندا زارداپ شەككەندەرگە ماتەريالدىق كومەك كورسەتۋدە بارىنشا بەلسەندىلىك تانىتتى. كاسىپورىن ەسەبىنەن ايماقتاعى ءورت سالدارىن جويۋعا 135 ملن تەڭگە ءبولىنىپ, ماتەريالدىق كومەك كورسەتۋگە جانە تابيعي اپات كەلتىرگەن زالالدى جويۋعا جۇمسالدى.
اياگوز اۋدانىنداعى اقتوعاي جانە قوپا اۋىلدارىنداعى جول جوندەۋ جانە كوشەت وتىرعىزۋ ناۋقانىنا قارجى ءبولدى. جاس كوشەتتەردى ساتىپ الۋعا 2,8 ملن تەڭگە جۇمسادى. سونىمەن قاتار اياگوز قالاسىنداعى پوليتەحنيكالىق كوللەدج جاتاقحاناسىن سالۋ, اقتوعاي جانە قوپا اۋىلدارىنىڭ مەكتەپتەرىنە مۋزىكا اسپاپتارىن جانە كومپيۋتەر جابدىقتارىن ساتىپ الۋ, اياگوز اۋدانىنىڭ جەرگىلىكتى ستۋدەنتتەرىنە شاكىرتاقى مەن گرانتتار تاعايىنداۋ, اقتوعايداعى ءورت ءسوندىرۋ ءبولىمىن قايتا جاڭعىرتۋ جۇمىستارىن دا اتاپ وتۋگە بولادى.
ايماق باسشىسىنىڭ باستاماسىمەن وبلىس ورتالىعىندا بوي كوتەرگەن IT مەكتەپ-ليتسەيىنىڭ قۇرىلىسىنا «KAZ Minerals» 9 ملرد تەڭگە قارجى اۋدارعان. 1 200 وقۋشىعا ارنالعان جاڭا وقۋ ورداسىندا ينفورماتيكا, مۋلتيمەديا, روبوتتەحنيكا, گرافيكا, مودەلدەۋ, توكارلىق-سلەسارلىق شەبەرحانا, قىش بۇيىمدار جاساۋ مەن اسپازدىق جانە تىگىنشىلىككە باۋليتىن 48 وقۋ كابينەتى بار.
«قازانشۇڭقىردان باستاپ, زاماناۋي سىنىپتاردى جابدىقتاۋعا دەيىنگى بارلىق جۇمىس 10 ايعا جۋىق ۋاقىتتا اياقتالدى. مەردىگەرلەر جانە وڭىرلىك مەملەكەتتىك ورگاندارمەن بىرلەسكەن قاجىرلى ەڭبەك پەن ءتيىمدى ءوزارا ءىس-قيمىلدىڭ ارقاسىندا بۇل جوبانى رەكوردتىق مەرزىمدە ىسكە اسىرا الدىق. وقۋشىلار ءۇشىن مەكتەپتىڭ بارىنشا جايلى جانە قاۋىپسىز بولۋى وتە ماڭىزدى. مۇندا زاماناۋي ينفورماتيكا مەن روبوتتەحنيكا سىنىپتارى, كەڭ اكت زالى مەن اسحانا, سپورت زالدارى, اشىق الاڭدار بار. سونداي-اق بالالار قارىم-قاتىناس جاساي الاتىن, شىعارماشىلىقپەن اينالىساتىن نەتۆوركينگ ايماعى بار. مەكتەپ سۇرانىسقا يە بولاتىنىنا سەنىمدىمىز. بۇل مەكتەپ سەمەيدىڭ بەتكە ۇستار وقۋ ورنىنا اينالىپ, ابايدىڭ وتانىندا جاڭا ءۇردىس قالىپتاستىرادى دەپ ۇمىتتەنەمىز», دەيدى «KAZ Minerals Management» باسقارما توراعاسى ەلدار مامەدوۆ.
اباي وبلىسى
